Башар Асад 8 йил ичида илк бор Эронга ташриф буюрди

Сурия президенти Башар Асад 25 февралда Эронга ташриф билан келди. Бу Асаднинг Сурияда 2011 йилда бошланган урушдан кейин қўшни давлатга илк ташрифи бўлди. Асад охирги 8 йил ичида расмий ташриф билан фақатгина Россияга ташриф буюрган.  

Асад ташрифи давомида Эрон президенти Ҳасан Руҳоний билан учрашди. Икки етакчи икки томонлама муносабатларни ва Сочида Сурия бўйича ўтган саммит натижаларини муҳокама қилишган. 

Маълум қилинишича, Руҳоний ва Асад ўзаро муносабатларнинг ривожланишидан мамнуният билдиришган ва барча даражаларда ҳамкорликни давом эттиришга келишиб олишган.

“Руҳоний Теҳрон Сурияга террорчиликка қарши курашни якунлаш ва мамлакатни тиклаш учун барча зарур воситаларни етказишни давом эттиришини таъкидлаб ўтган”, дейилган хабарда.

Ўз навбатида Асад Руҳоний ва Эрон халқига Суриянинг қонуний ҳукуматини қўллаб-қувватлаётганлик учун миннатдорлик билдирган.

Асад, шунингдек, Теҳронда Эроннинг олий диний етакчиси оятуллоҳ Али Ҳоманаий билан учрашган.

Учрашув давомида Ҳоманаий Асадни Сурия армияси ғалабаси билан табриклаган. “Бу ғалабалар Ғарб ва АҚШнинг минтақадаги режаларига ҳал қилувчи зарба берди”, деб айтган Ҳоманаий.

Томонлар бир қатор ғарб давлатларининг минтақада, айниқса Сурия ва Эронда тартибсизлик авж олдиришга уринишларига қарши курашишни давом эттириш истагида эканликларини таъкидлаб ўтишган.