25 февраль куни Ўзбекистон инсон ҳуқуқлари «Эзгулик» жамияти раиси Абдураҳмон Ташанов «Жаслиқ»қа бориб маҳкум Искандар Худойберганов билан учрашди. У Kun.uz мухбири билан суҳбатда учрашув тафсилотлари ҳақида айтиб берди.
«Искандар Худойберганов билан учрашиш учун билдирилган мурожаат пайсалга солинмай, ўз вақтида кўриб чиқилди. Мен учрашувни белгилашда қийинчиликларга дуч келмадим. Худойберганов билан суҳбатимиз тахминан 40 дақиқа давом этди», – дейди инсон ҳуқуқлари фаоли.
1974 йилда Тошкент шаҳрида туғилган Искандар Худойберганов 2002 йил 28 ноябрь куни Тошкент шаҳар суди томонидан Жиноят кодексининг 155-моддаси 3-қисми («Терроризм»), 156-моддаси 2-қисми («Миллий, ирқий, этник ёки диний адоват қўзғатиш»), 159-моддаси 4-қисми («Ўзбекистон Республикаси Конституциявий тузумига тажовуз қилиш»), 161-моддаси («Қўпорувчилик»), 242-моддаси 2-қисми («Жиноий уюшма ташкил этиш»), 247-моддаси 3-қисми («Ўқотар қурол, ўқ-дорилар, портловчи моддалар ёки портлатиш қурилмаларини қонунга хилоф равишда эгаллаш»), 248-моддаси 1-қисми («Қурол, ўқ-дорилар, портловчи моддалар ёки портлатиш қурилмаларига қонунга хилоф равишда эгалик қилиш»)да кўзда тутилган жиноятларни содир этишда айбланиб ўлим жазосига ҳукм қилинган, кейинроқ Ўзбекистон Республикаси Олий суди ажримига асосан ҳукм ўзгартирилиб, 25 йил муддатга озодликдан маҳрум этилган.
Худойберганов белгиланган жазони Ўзбекистон Ички ишлар вазирлиги Жазони ижро этиш Бош бошқармаси тизимидаги 64/71-сонли («Жаслиқ») муассасасида ўтамоқда.
Абдураҳмон Ташановнинг айтишича, маҳкумга нисбатан қийноқлар ишлатилаётгани, унинг соғлиғи оғирлашиб, яшаш шароити қийинлашгани каби асоссиз тарқатилган хабарлар учрашувда ўз тасдиғини топмади.
«Худойберганов сўнгги икки йилда умуман қийноқлар қўлланилмаётгани, унга нисбатан куч ёки босим ишлатилмаганини билдирди. Мен унинг сўзларига шунчаки ишонмадим, барча тафсилотларни бирма-бир сўрадим. Менинг назаримда, у ҳақиқатан ишончли гапирди. Овқатланиш рационини тасвирлаб беришини сўрагандим, алдамай, ростини айтди. Масалан, учрашувга қадар шўр бодринг, пиширилган лавлагидан салат, гречка, тухум ва перловкадан пиширилган овқат берилганини айтди. У кўпгина нон ўртага тўғраб қўйилганини айтди», – дейди Абдураҳмон Ташанов.
