Испания Кубогидаги фиаскодан 3 кун ўтиб «Реал» яна «Сантьяго Бернабеу»да «Барселона»га мағлуб бўлиб (0:1), чемпионлик учун умидини йўқотди.
«Реал» - «Барселона» - 0:1 (0:1)
Гол: Ракитич, 26.
«Реал»: Куртуа, Карвахаль, Варан, Серхио Рамос, Регилон, Модрич, Каземиру (Иско, 76), Кроос (Вальверде, 55), Бэйл (Асенсио, 61), Бензема, Винисиус Жуниор.
«Барселона»: тер Штеген, Сержи Роберто, Лангле, Пике, Жорди Альба, Ракитич, Бускетс (Семеду, 90+2), Артур (Видаль, 71), Месси, Суарес, Дембеле (Коутинью, 78).
Огоҳлантиришлар: Бускетс, 2. Серхио Рамос, 61. Лангле, 63. Асенсио, 82. Карвахаль, 89.
Ҳакам: Ундиано Мальенко.
2 март. Мадрид. «Сантьяго Бернабеу» стадиони.
Вальверденинг тактикаси
«Реал»да Кубок баҳсидаги аламли мағлубиятни унутиш учун атиги 3 кун бор эди. Ўтган ҳафтадаги ўйинда Суарес мадридликларнинг янги юлдузи Винисиусга вазиятлардан қандай фойдаланиш бўйича маҳорат дарси ўтиб берганди. Ёш бразилиялик ўйин давомида каталонияликларнинг ҳимоячиларини алдаб юрган ва дарвоза томон 6 марта зарба йўллаган, лекин бирорта гол уролмаганди. Уругвайлик футболчи эса икки гол уриб, учинчи гол урилишига сабабчи бўлган, «Қироллик клуби» дарвозасига урган голлари сонини 11тага етказганди.
Суареснинг самарадорлиги каталонияликларнинг руҳини кўтарди ва жамоа навбатдаги муваффақият учун тайёрланди. Шанба кунги ўйин тарихий ўйинга айланиши кутилаётганди: шу вақтгача ўтказилган класиколарда тенг кўрсаткич қайд этилаётганди: чоршанба оқшомидаги ўйиндан кейин «Реал» ва «Барса» класиколардаги ғалабалар сони бўйича бир хил натижа кўрсатиб турганди - 95:95. Бу борада яна олдинга чиқиб олиш учун Сантьяго Солари Васкес ўрнига Бэйлни тушириш билангина чекланди. Шунингдек, кубок ўйинларида майдонга тушириладиган Навас ўрнини чемпионат ўйинида Тибо Куртуа эгаллади. Вальверде эса кўпроқ ўзгариш қилди ва классик схемага қайтди: 4-3-3. Сержи Роберто ҳимояда ўтган ўйинда Винисиусга қарши ҳеч нарса қила олмаган Самеду ўрнини эгаллади, майдон маркази Артур ҳисобига кучайтирилди.
Мессининг омадсизлиги ва Ракитичнинг голи
Лекин ўйин бошидаёқ каталонияликларнинг яримҳимояси хатога йўл қўйди ва хатони тўғрилаш учун Бускетс Кроосни йиқитишга мажбур бўлди, бу эса тарихий огоҳлантиришга олиб келди. Ўйин ҳаками Ундиано Мальенко класиколарда ўзининг 13-сариқ карточкасини кўрсатди. Белгиланган жарима зарбасини эса Бэйл кўнгилдагидек ижро этолмади.
