25—26 май кунлари Тошкент ҳарбий округининг “Чирчиқ” полигонида «Ҳеч бир ижобий ғоя эътибордан четда қолмайди» шиори остида “TECHNO DISCOVERY—2019” фестивали бўлиб ўтди.
Мудофаа қўшинлари фаолиятига замонавий илмий-техник ва рационализаторлик ишланмаларини киритиш мақсадида Ўзбекистон армиясида биринчи бор ўтказилган фестивалда уч юздан ортиқ ҳарбий хизматчи ўзининг янгича ёндашувлари асосида яратган ихтиролари, мавжуд техникаларга киритган ўзгартириш ва қўшимчалари билан иштирок этди, дея хабар бермоқда Kun.uz мухбири.
Фестивалда жумладан, бошқарувни ташкиллаштириш мақсадида қўмондонлик ва тезкор штаб ишини амалга ошириш учун мўлжалланган ўзгарувчан ҳажмга эга мобил қўмондонлик-штаб пункти кўпчиликнинг эътиборини тортди. Ушбу штаб пункти махсус тадбирлар ўтказилувчи жойларда вужудга келаётган вазиятлар ҳақида маълумотлар йиғиш ва уларни қайта ишлаш вазифасини бажаради.
“КамАЗ” юк машинасининг базасига ўрнатилган мазкур пунктни яратишга 400 миллион сўмга яқин маблағ сарфланган бўлиб, бир ёки икки киши уни тўлиқ иш жараёнига тайёрлашига 10 дақиқа сарфлайди.
Фестивалнинг яна бир эътиборли лойиҳаларидан бири — десантчининг ўқув-машғулот комплекси. Мазкур комплекс шахсий таркибни парашютдан сакрашга мукаммал ва ортиқча харажатларсиз тайёрлашга мўлжлланган. Унинг ёрдамида десантчининг учиш аппаратидан сакрашидан бошлаб бажарадиган барча амалий ҳаракатларини ернинг ўзида тўлиқ синаб кўриш мумкин.
