ТДПУ домласи ва мактаб ўқитувчиси ушланди. Улар абитуриентни ўқишга киритиб қўйиш эвазига пул талаб қилган

Низомий номидаги Тошкент давлат педагогика университети

Бош прокуратура ҳузуридаги Департамент ходимлари томонидан тезкор тадбир ўтказилди, деб хабар бермоқда маҳкама матбуот хизмати.

Унда Низомий номидаги Тошкент давлат педагогика университетининг “Технология ва сервис хизмати” кафедраси ўқитувчиси Р.А. ва Зангиота туманидаги 39-сонли мактаб ўқитувчиси М.Р. фуқаро А.У.дан жияни Ж.Т.ни ушбу университетга ўқишга киритиб қўйиш эвазига 7.000 АҚШ долларини талаб қилиб олаётган вақтида ашёвий далиллар билан ушланган.

Мазкур ҳолат юзасидан Р.А. ва М.Р.ларга нисбатан Ўзбекистон Республикаси Жиноят кодексининг тегишли моддалари билан жиноят иши қўзғатилган.

Ҳозирда тергов ҳаракатлари ўтказилмоқда.