Айниқса, Навоий шаҳридаги Алишер Навоий номидаги марказий маданият ва истироҳат боғи бугунги кунда вилоят аҳолиси ҳамда меҳмонларининг асосий кўнгилочар масканларидан бирига айланган.
Истироҳат боғи раҳбарияти ва ходимлари аҳолига хизмат кўрсатиш сифатини янада ошириш мақсадида боғ ҳудудида бир қатор ободонлаштириш, янги аттракционлар билан бойитиш ишларини амалга ошириб келмоқда.
Айни вақтда боғ ҳудудида турли ўйингоҳлар ташкил этилган ва 36 турдаги аттракционлар мавжуд.
«Чархпалак», «Карусель», «Учар стулчалар», «Кичик чархпалак», «Кичик лодка», «Кичик поездча», «Самолётча», «Ракета», «Арғимчоқ», «Электроавтобуслар» каби аттракционлар шулар жумласидандир.
Боғ ҳудудини ободонлаштириш жараёнида барча ёритгичлар янгиланди ва фавворалар қайта таъмирланди. «Аквапарк» сув мажмуасида мавсумолди тайёргарлик ишлари олиб борилди. Ўйингоҳ ва аттракционларда хавфсизликни таъминлаш бўйича доимий равишда тегишли чоралар кўрилмоқда.
Айни вақтда боғ ҳудудида савдо шахобчалари, кафе ва музқаймоқ павильонлари аҳоли хизматида. Бундан ташқари, истироҳат боғида турли маданий тадбирлар мунтазам ташкил этиб келинмоқда.
Айниқса, истироҳат боғи тунги вақтда янада тароватли бўлиб, ташриф буюрувчилар билан гавжум бўлади. Байрамона безатилган саҳналарда вилоят санъаткорлари томонидан ташкил этилган концерт ва шоу дастурлари истироҳат боғига ташриф буюрувчиларнинг кўнглини янада хушнуд этмоқда.
Истироҳат боғи яқинида «Ватанпарвар боғи» ташкил этилган бўлиб, вилоят ёшларини ватанга садоқат ва ватанпарварлик руҳида тарбиялашда муҳим аҳамият касб этмоқда.
Бир сўз билан айтганда, Алишер Навоий номидаги марказий маданият ва истироҳат боғи бугунги кунда ўзгача кўрк ва замонавий қиёфага эга бўлиб, вилоят аҳолисининг бўш вақтларини мароқли ўтказадиган, айниқса, ота-оналар фарзандлари билан маданий ҳордиқ оладиган сўлим масканга айланган.
Реклама ҳуқуқи асосида
Бардошбек САМАД ўғли тайёрлади.
