Порошенко “қочоқлик”дан кейин яна Украинага қайтди 

Украинани июль охирида бутун оиласи билан тарк этган собиқ президент Пётр Порошенко 7 августга ўтар кечаси Киевга қайтди. Бу ҳақда “Страна.ua” нашри хабар берди. 
 
Таъкидланишича, Порошенко самолёти Дубайдан кечки пайт учиб, соат 02:30да Жуляни аэропортига қўнган. Журналистлар Порошенко ўз автомобилларида аэропортни тарк этаётганини тасвирга олишга муваффақ бўлишган.

28 июлда Порошенко, унинг тўнғич ўғли Алексей ва келини Юлия ҳамда набираси чартер рейс билан Киевдан Истанбулга учиб кетишган. Бир соатдан кейин ушбу рейс Дубайга йўналтирилган, сўнгра кузатув тизимларидан ғойиб бўлган. Бундан бир ҳафта олдин эса Украинани Порошенконинг рафиқаси, қизлари ва кенжа ўғли тарк этган.

Бутун оиланинг Украинада Порошенкога нисбатан терговлар олиб борилаётган бир вақтда мамлакатни тарк этиши собиқ президентнинг мамлакатдан қочиб кетгани ҳақидаги гаплар пайдо бўлишига олиб келган. 

Бундан ташқари, Украина ОАВда Порошенко қамалиши мумкинлиги сабабли Украинадан кетиб, фуқаролигини олган давлатлардан бирида яшириниши мумкинлиги таъкидланган. Elise Journal нашри маълумотларига кўра, собиқ президентда Украина паспортидан ташқари яна 5 та давлат паспорти бор.