Чемпионлар лигасининг 1/8 финалига қуръа ташлаш маросими 16 декабрь куни ўтказилади. Гуруҳларида биринчи ўринни эгаллаган жамоалар ва иккинчи ўринни эгаллаган жамоалар алоҳида саватчаларда бўлишади.
Нимчорак финалнинг илк учрашувлари 2020 йилнинг 18/19 ва 25/26 февраль кунларида, жавоб баҳслари — 10/11 ва 17/18 март кунларида ўтказилади.
«Кончилар» ўз тақдирларининг хўжайини эди. Уй учрашувидаги ғалаба жамоага гуруҳда иккинчи ўринни эгаллашни кафолатларди, Загребда параллел кечган учрашувда керакли ҳисоб қайд этилса, дуранг ҳам етарли бўларди. Аммо «Шахтёр»нинг биринчи бўлимда қилган бор иши офсайд туфайли ҳисобга олинмаган гол бўлди. Иккинчи бўлимда эса Жан Пьеро Гасперинининг яхши шаклланган жамоаси ҳақиқий қаҳрамонлик кўрсатиб, 1/8 финалга чиқа олди. Ҳолбуки итальянлар гуруҳдаги дастлабки уч учрашувда мағлубиятга учрашган ва тўртинчи ўйинда дуранг ўйнашганди.
Мавзуга оид
Бу, албатта, рекорд эмас, бундай жасорат 2002 йилда «Ньюкасл» томонидан ҳам кўрсатилганди. Ўшанда, инглизлар ўша вақтдаги тартибга кўра иккинчи босқичдаги гуруҳга ўтишганди. Лекин «Аталанта» — Чемпионлар лигаси дебютанти эканини ҳам ҳисобга олиш керак. Балки бу жамоа айни вақтида, видеотакрорлар қўллана бошлангач турнирга чиққани айни муддао бўлгандир. Агар ВАР бўлмаганида Феликс Цвайер ва унинг жамоаси ўйин тақдирини ҳал қилган биринчи голни ҳисобламаган бўларди. Аммо техника бу гол муаллифи Кастанга пас узатган Гомес офсайдда бўлмаганини кўрсатиб берди.
Мезбонлар учун яна бир ҳал қилувчи зарба Додонинг рақиб футболчисининг юзига ургани учун майдондан четлатилиши бўлди. Бир неча дақиқа ўтиб рақиблар сафидаги украиналик футболчи, «Шахтёр» тарбияланувчиси Малиновскийнинг жарима зарбасидан берган узатмасини Пашалич голга айлантирди. Ўйин охирида меҳмонларнинг тўпурар ҳимоячиси Госенс мезбон ҳимоячилари хатосидан фойдаланиб ўйинга якуний нуқтани қўйди ва «Аталанта» 7 очко билан ҳам гуруҳда иккинчи бўлди. Шу тариқа, Чемпионлар лигаси тарихида илк марта 1/8 финалда Европанинг фақат бешта кучли чемпионати вакиллари иштирок этадиган бўлди.
«Динамо» З — «Манчестер Сити» — 1:4 (Ольмо, 10 — Габриэл Жезус, 34, 50, 54. Фоден, 84).
Загреб ҳам 1/8 финалга чиқишдан умид узмаганди ва яқинда Испания термасида дебют қилган Ольмо ҳисобни очганида жамоа бунга яқинлашганди - онлайн жадвалда хорватияликларда 8 очко жамғарилганди.
Аммо ўйиннинг қолган қисми Габриэл Жезусга бағишланди, у аввалига Маҳрезнинг узатмасига бир тегиниш билан Чемпионлар лигасидаги 10-голини урди. 22 ёшу 252 кунлигида у кўҳна қитъанинг асосий турнирида энг тез икки рақам билан ифодаланадиган гол урган илк бразилияликка айланди. Аввалги рекордчи Неймар турнирдаги 10-голини урганида 23 ёшдан ошганди.
Жезус эса бу билан тўхтаб қолмади ва иккинчи бўлим бошида рақиб ҳимоячиларини осонлик билан доғда қолдириб иккинчи голини урди. Бу чиройли гол унинг профессионал фаолиятидаги 100-гол бўлди. У ҳет-трикни нишонлаганида, бу гол Гвардиола давридаги «Сити»нинг 500-голи бўлди. Бунинг учун «шаҳарликлар» 199 ўйин ўтказиши кифоя қилди.
Леверкузендаги ўйинда «Кекса синьора» дарвозасини Буффон эгаллади. Энди Жижи Чемпионлар лигасида иштирок этган энг кекса иккинчи футболчи - 41 ёшу 317 кун (У фақат яна бир италиялик дарвозабон Марко Балоттадан ортда). Қолаверса у еврокубокда 51-марта «қуруқ» ўйин ўтказди. Бу борада ундан фақат Касильяс (57) олдинда.
Леверкузенликлар эса ўз ўйинида ғалаба қозонишдан ташқари «Локомотив» Мадридда мўъжиза кўрсатишига умид қилиши керак эди. «Ювентус»да эса дарвозасидаги тажрибали футболчидан ташқари ҳужумида ҳам ҳар қандай ўйин тақдирини ҳал қила оладиган футболчи бор эди. Ўйиннинг 75-дақиқасида Криштиану Роналду керак вақтда керак жойда пайдо бўлди ва Дибаланинг узатмасини голга айлантирди. Қўшимча вақтларда эса аргентиналик ёш ҳужумчи бошқа бир аргентиналик тажрибали ҳужумчи Игуаинга гол уришда ёрдам берди, немислар эса Европа Лигаси билан овунадиган бўлишди.
В гуруҳи
«Бавария»нинг рекорди ва «Олимпиакос»да йўлланма
Жозе Моуриньони ўтмиш қизиқтирмайди. «Шпорлар» мухлислари Мюнхенга сафарда биринчи даврадаги йирик ҳисобдаги мағлубият (2:7) учун қасос олинишини исташган бўлсада, португалиялик мутахассис фақат келажакдаги ўйинларни ўйлади. У натижаси аҳамиятсиз бўлган ўйинга Алли ва Кейнни олиб кетмади, Сон Хин Мин — ўйинни захира ўриндиғида бошлади.
Натижада мухлислар томошабоп ўйин гувоҳи бўлишди, «Бавария» кўпроқ ҳужум қилди. Лекин мезбонлар 19 ёшли Сессеньонга «Тоттенҳэм»нинг ЕЧЛда гол урган энг ёш футболчиси бўлишига тўсқинлик қила олишмади. Тенглик биринчи бўлим якунига қадар сақланиб қолди, Мюллер жарима майдонидаги тартибсизликдан кейин бўш дарвоза қаршисида қолди ва турнирдаги голлари сонини 44тага етказиб, Дрогбани қувиб ўтди ҳамда турнир тарихидаги энг яхши тўпурарлар рўйхатида 11-ўринга кўтарилди.
Филиппе Коутиньонинг ўзига хос зарбаси жамоага турнирнинг гуруҳ босқичида тарихий натижа кўрсатишига олиб келди, «Бавария» гуруҳ босқичини 100 фоизлик натижа ва голлар нисбатига кўра «+19» билан якунлади. Саккиз йил муқаддам «Реал» ҳам гуруҳда 18 очко тўплаган ва голлар нисбатига кўра «+17» натижасини қайд этган эди.
Вальбуэнасиз ўйнаган грекларга Европа Лигаси йўлланмасини қўлга киритиш учун фақат ғалаба зарур эди, аммо уларнинг биринчи бўлимдаги ҳужумлари белградликларнинг мудофаасидан ўтмади, ўтса ҳам дарвозабон қутқариб турди. Бўлим охирида «Црвена Звезда» қарши ҳужум уюштирди ва Маринни жарима майдони ичида йиқитишди. Аммо Томане 11-метрлик нуқтадан кучли зарба йўллаб дарвоза тўрини йиртмоқчи бўлганида бу зарба фақат устунни титратди.
Иккинчи бўлимда Эл-Арабининг зарбаси ҳам шу устунга тегди. Бошқа вазиятларда эса серблар дарвозасини шу куни фантастик ўйин кўрсатган Борян қаҳрамонлик кўрсатди. Аммо у Эл-Араби пенальтидан берган зарба қаршисида ожиз эди. Пирейликлар Европа Лигасига йўл олишди.
Яна бир гуруҳда плей-офф йўлланмаси аввалги турлара ҳал бўлганди ва сўнгги тур фақат учинчи ўрин эгасини аниқлаб бериши керак эди. Аввалбошдан «Галатасарой»нинг имкониятлари жуда паст баҳоланаётганди. Биринчи бўлимда Неймар ёрқин ўйин кўрсатди. У бошлаган ҳужумни Мбаппе давом эттириб, Икарди якунлади. Кейинги ҳужумлардан бирида бразилиялик футболчи Сарабияга голли пас берди.
Иккинчи бўлим бошида Неймар ташаббусни ўз қўлига олди ва ҳисобни йирик кўринишга келтирди. Дисквалификация туфайли гуруҳ босқичининг биринчи қисмини ўтказиб юборган футболчи учун бу турнирнинг жорий мавсумидаги илк гол бўлди, бу голни у Мбаппенинг товони билан берган қойилмақом паси эвазига амалга оширди. Парижликлар ҳужум учлиги тўла таркибда гол муаллифи бўлиши учун энди Килианнинг ўзи ҳам гол уриши керак эди ва бу муаммо тезда бартараф этилди. Тўртинчи голга Неймар пас бериб қарзини қайтарди. Ўйин охирида эса у мавсумнинг биринчи қисмини жароҳат туфайли ўтказиб юборган ва яқинда тузалиб сафга қайтган, бу ўйинда захирадан майдонга тушган Каванига пенальти тепиш ҳуқуқини бериб, олқишларга сазовор бўлди.
«Реал» эса Европа Лигаси йўлланмасини ҳали ҳал қилмаган «Брюгге»ни кўп қийнаб ўтирмади. Мадридликлар бу мавсумда ҳали бирор ўйинда биринчи бўлимда атиги учта зарба йўллаш билан кифояланмаганди. Лекин бу зарбалардан бири Миньоленинг реакцияси бўлмаганида голга айланиши ҳам мумкин эди, ўз навбатида Ареола ҳам чиройли сэйв амалга оширди, у жуда яқин масофадан берилган кучли зарбани тўсишга эришди.
Иккинчи бўлим бошида Родриго Модричнинг қанотдан ташлаб берган тўпини кучсиз, лекин айланма зарбаси билан дарвоза тўрига жойлади. Лекин кўп ўтмай меҳмонлар ҳужумчиси Фанакен ҳам уникидан кам бўлмаган чиройли гол уриб ҳисобни тенглаштирди. Винисиус Жуниор эса бу ўйин бразилларга аталганини кўрсатиб жамоасини ҳисобда олдинга олиб чиқди, Валенсияга қарши сафар ўйини ва кейинги ҳафтадаги класико олдидан ўз етакчиларини асрашга қарор қилган «Реал» бу ўйинда ёшларга имкон берганди.
Ўйинга якуний нуқтани яна бир чиройли голга муаллифлик қилган Модрич қўйиб берди. Унинг голи мадридликлар жамоасининг Чемпионлар лигаси гуруҳ босқичидаги 308 голи бўлди ва бу рекорд кўрсаткичдир.
