«Ред Булл Зальцбург» клуби ҳужумчиси Такуми Минамино «Ливерпуль» аъзосига айланди. Бу ҳақда мерсисайдлар клуби расмий сайти хабар берди.
24 ёшли япониялик футболчи 1 январдан қишки трансфер ойнаси очилгач, клуб либосида майдонга тушиш имкониятини қўлга киритади. Келишув шартлари очиқланмаяпти. Такуми янги клуби сафида 18-рақам остида тўп суради.
Такуми Минамино янги клубидаги илк таассуротлари билан ўртоқлашди.
«Ливерпул»га ўтиш орзуим эди. Ниҳоят, бу дамлар етиб келганидан бахтиёрман. Премьер-лигада тўп суриш бош мақсадларимдан бири бўлган. Бу чемпионатни дунёнинг энг кучли лигаси деб биламан. Англияда тўп суриш ҳақида кўп ўйлаганман, аммо «Ливерпул» шарафини ҳимоя қилиш имконияти пайдо бўлиши хаёлимга ҳам келмаган. Майдонга тушишни сабрсизлик билан кутаяпман.
Чемпионлар лигаси доирасидаги «Ливерпул»га қарши ўйинлар ҳақида гапирсам, ўша баҳсларда бу жамоа футболчилари қай даражада юқори техникага эга эканлигини билдим. Ўшанда Чемпионлар лигаси ғолибларига қарши тўп сураётганлигимни сезганман. Бу жамоанинг бир бўлаги эканлигимдан фахрланаман. Мақсадим – Премьер-лига ва Чемпионлар лигасида ғолиб бўлиш ҳамда клуб муваффақиятига ўз ҳиссамни қўшишдан иборат» - дейди Минамино клуб расмий сайтига берган интервьюсида.
Олдинроқ Минаминонинг «Ливерпул»га ўтиши клубга 8 миллион еврога тушиши ҳақида хабар берилганди. Футболчининг «Ред Булл Зальцбург» клуби билан шартномасидаги товон пули айнан шунчани ташкил этади.
«Ливерпуль» устози Юрген Клопп ЕЧЛ гуруҳ босқичида рақиб бўлган жамоа етакчиларидан бирини трансфер қилишда ташаббус кўрсатган. Минамино Ливерпулда мерсисайдликлар дарвозасига урилган голлардан бирига муаллифлик қилганди.
Минамино 2015 йилнинг январь ойида Япониянинг «Сересо Осака» клубидан «Ред Булл Зальцбург» сафига ўтганди. Ўшанда трансфер суммаси 800 минг еврони ташкил этган.
Маълумот учун, япониялик футболчи жорий мавсумда Австрия чемпионатида 14 ўйинда 5 гол урган, у шунингдек, Чемпионлар лигаси гуруҳ босқичидаги 6 ўйинда 2 гол уриб, 3 голга узатма берган.
