Тошкентдаги саноат корхоналари кичик ҳалқа йўлидан ташқарига кўчирилади

Тошкентда фаолият кўрсатаётган саноат корхоналари кичик ҳалқа йўлидан ташқарига кўчирилади. Шаҳар ҳокимлигидан Kun.uz’га хабар беришларича, корхоналарни кўчириш бир йилга яқин вақтни олиши мумкин. 

«Аввал корхоналарни инвентаризация қилиш амалга оширилади, кейин Сергели туманидаги махсус саноат зонасида қурилиш бошланади», - дея айтиб ўтди пойтахт маъмурияти вакили.

Масалан, Яккасарой кичик саноат зонаси (собиқ Тошкент тўқимачилик комбинати ҳудуди)дан корхоналарни Сергелидаги махсус саноат зонаси ҳудудига жойлаштириш режалаштирилмоқда. Ерлар тадбиркорларга хусусий мулкка бепул берилади, маблағ етишмаса, ишлаб чиқариш объектлари қурилади ва уларга 7 йилгача бўлган муддатга бўлиб-бўлиб тўлаш шарти билан тақдим этилади.

Ҳокимлик вакилининг сўзларига кўра, пойтахтнинг кичик саноат зоналари корхоналарида меҳнат қилувчи 4 мингдан ортиқ киши ҳар куни Тошкентга келади. Шаҳардаги экологик вазиятни яхшилаш билан бир қаторда, корхоналарнинг кўчирилиши йўлларни бўшатишга имкон беради.

«Тошкент хизмат кўрсатиш, кичик бизнес ва юқори даромадли ишлаб чиқаришга эътибор қаратиши керак», - дея таъкидлашган ҳокимликда.