Қўшимча функционаллар
-
Тунги кўриниш
Бош прокуратура Олтинсойдаги аҳоли ва ҳокимият вакиллари ўртасидаги тўқнашув юзасидан баёнот берди
Бош прокуратура баёнотида жароҳатланган фуқаронинг ҳолати ҳақида маълумот йўқ. Воқеа жойидан тарқалган видеоларда эса фуқаронинг юзи қонга бўялганини кўриш мумкин.
Ўзбекистон Бош прокуратураси Сурхондарёнинг Олтинсой туманида фуқаролар ва ички ишлар ходимлари ўртасида 14 февраль куни келиб чиққан жанжал юзасидан расмий маълумот берди.
Унда айтилишича, прокуратура органлари томонидан ер майдонларидан ноқонуний фойдаланиш ва эгаллаб олишнинг олдини олиш бўйича мониторинг ўтказилмоқда.
Олтинсойда ўтказилган мониторинг давомида «Оқ-олтин манзараси» фермер хўжалигига қарашли пахта ва ғаллага мўлжалланган экин ер майдонининг жами 0,39 гектари 6 нафар фуқаро томонидан ўзбошимчалик билан ноқонуний равишда эгаллаб олингани, 235.35 кв.м. майдонда эса яшаш имконияти бўлмаган уй-жой бинолари қуриб олингани аниқланган.
«Ҳолат бўйича 8 февраль куни ишчи гуруҳ аъзолари: туман ҳокими, прокурори, ИИБ бошлиғи, ер ресурслари ва давлат кадастр бўлими бошлиғи ва бошқалар томонидан ноқонуний қурилиш қилган фуқароларга ушбу ер майдони фермер хўжалиги тасарруфидалиги маълум қилиниб, фуқароларнинг ўз ҳисобларидан ўзбошимчалик билан қурилган уйларини бузиб олишларини ва уларга бошқа манзилдан уй қуришлари учун ер берилиши ҳақида тушунтириб ўтилган.
Ноқонуний равишда қурилиш қилиб олган фуқароларнинг илтимосига асосан, уларга ўзлари ҳисобидан биноларни бузиб олишлари учун 2 кун муддат берилган.
14 февраль куни ишчи гуруҳ аъзолари юқорида кўрсатилган манзилга бориб кўрганида, 3 нафар фуқаро ўзбошимчалик билан қурилган уйга яшаш имконияти бўлмаса-да, кўчиб кириб олгани аниқланган.
Ишчи гуруҳ томонидан ноқонуний қурилган уй-жойларни бузиб олишлари тушунтирилганида, аввалдан тўпланиб турган фуқаролар ҳокимият вакили ва ИИБ ходимларига қаршилик кўрсатишган.
Ноқонуний қурилган уйларни бузишни имконияти бўлмагани сабабли ишчи гуруҳ аъзолари ортларига қайтиб кетишган.
Шу куни соат 15:00лар чамасида ишчи гуруҳ томонидан юқоридаги манзилга борилганда юқоридаги фуқаролар ва уларнинг қариндошлари қўлларида бензин, таёқ, белкурак, тош ва бошқа нарсалар билан қуролланган ҳолда ишчи гуруҳ олдига чиқишган. Ушбу ҳолатда жамоат тинчлигини сақлаш ва вужудга келиши мумкин бўлган тартибсизликларнинг олдини олиш мақсадида туман ИИБ ходимлари жалб қилинган.
Ҳокимият вакиллари ва туман ИИБ ходимларининг тушунтиришига қарамасдан, фуқаролар ҳокимият вакиллари ва ИИБ ходимларига қўлларидаги нарсалар билан ташланиб кетишган. Ноқонуний равишда қурилган уй-жойларнинг ишчи гуруҳ томонидан бузилишига имкон бўлмаган.
Бу жараёнда 2 нафар туман ИИБ ходимлари ҳамда 1 нафар фуқаро тан жароҳати олишган», – дейилади Бош прокуратура хабарида.
Аввалроқ Сурхондарё вилоят ИИБ бу жанжалда жароҳатланган икки ходимдан бирининг жароҳати жиддийлиги, у касалхонага ётқизилганини маълум қилган эди.
Бош прокуратура баёнотида жароҳатланган фуқаронинг ҳолати ҳақида маълумот йўқ. Воқеа жойидан тарқалган видеоларда эса фуқаронинг юзи қонга бўялганини кўриш мумкин.
Олтинсой тумани прокуратураси ҳолат юзасидан терговга қадар текшириш ҳаракатларини олиб бормоқда.
Мавзуга оид
20:01 / 11.06.2023
Сурхондарёда дарахтларни кесиб, 5 млн сўмга сотганлар табиатга 550 млн сўм зарар келтирди
13:36 / 04.02.2023
Сурхондарёда иккита боғчанинг бозор баҳоси қарийб 1,7 млрд сўм бўлган бинолари ва ерлари ноқонуний бериб юборилди
21:38 / 25.01.2023
Сурхондарё вилоятида яна тўрт туман ҳокими ўзгарди. Кун давомида 10 та тайинлов амалга оширилди
00:05 / 24.01.2023