Янги институт ва коллекция, 50 млрд сўмлик танлов ҳамда қўшимча қабул: Президент кимё ва биологияга алоқадор қарор имзолайди

Президентнинг “Кимё ва биология йўналишида амалга оширилаётган илмий-тадқиқотлар ва инновация ишлари натижадорлигини оширишнинг қўшимча чора-тадбирлари тўғрисида”ги қарори лойиҳаси муҳокама учун жойлаштирилди.

Қуйидагилар белгиланади:

а) кимё илм-фанини янада ривожлантиришнинг энг муҳим йўналишлари этиб:

кимё йўналишидаги илмий-тадқиқотлар учун барча зарур шарт-шароитларни яратиш асосида соҳанинг илмий-инновацион салоҳиятини ошириш, рақобатбардош илмий ҳажмдор маҳсулотлар яратиш учун замонавий инфратузилмалар яратиш;

кимё ва фармацевтика саноати корхоналарида замонавий илмий-таҳлилий асбоб-ускуналарга эга бўлган тажриба-ишлаб чиқариш лабораторияларини ташкил этиш асосида юқори самарадор кимёвий технологияларни тармоқ корхоналарига жорий этиш кўламини кенгайтириш;

глобал иқлим ўзгаришлари шароитларида янги авлод комплекс ўғитлари ва биостимуляторларини яратиш ва қишлоқ хўжалиги экинларининг ўғитлаш нормаларини тубдан қайта тадқиқ қилиш;

органик синтез, биоорганик, коллоид, нанополимерлар ва аналитик кимёсига асосланган тадқиқотларни қайта ташкил қилиш ва бунинг учун зарур шарт-шароитларни яратиш;

кимё йўналишидаги илмий-тадқиқот муассасаларининг мавжуд илмий йўналишларини тармоқ корхоналари эҳтиёжлари ва бозор талабларидан келиб чиқиб, тубдан қайта кўриб чиқиш асосида рангли ва ноёб металлар кимёси, силикат материаллар кимёси, нефть кимёси, табиий моддалар кимёси, тиббиёт кимёси каби каби илмий йўналишларга устувор аҳамият қаратиш, нодир металлар ва нанокимё йўналишида инновацион технологияларни яратиш;

жаҳоннинг илғор тажрибаларига мувофиқ янги композит материаллар ва инновацион кимё технологиялари асосида қурилиш материаллари технологияларини яратиш;

жаҳон стандартлари даражасида катта ҳажмли кимёвий маълумотларни таҳлили ва кимёвий бирикмаларнинг молекуляр тузилишини юқори даражада таҳлил қилиш имкониятига эга миллий лабораториялар тармоғини ташкил этиш асосида яқин истиқболда юқори самарадор технологияларни яратилиши ва келгусида илмий ҳажмдор маҳсулотларнинг экспортини кенгайтириш;

кимё йўналишида фан-таълим-ишлаб чиқариш интеграциясини чуқурлаштиришнинг таъсирчан амалий механизмларини ишлаб чиқиш ва жорий этиш;

кимё йўналишида юқори малакали илмий ва илмий-педагог кадрлар тайёрлаш самарадорлигини ошириш, кадрлар малакасини ошириш ва қайта тайёрлаш тизимини янада такомиллаштириш;

кимё йўналишида ёш иқтидорли олимларни тайёрлаш ва уларни илм-фанга кенг жалб қилиш мақсадида ўқув ва ўқув-ишлаб чиқариш базаларини ривожлантириш.

б) биология илм-фанини янада ривожлантиришнинг энг муҳим йўналишлари этиб:

биология соҳасидаги устувор фундаментал, амалий ва инновацион лойиҳаларни шакллантириш ва амалга ошириш учун шарт-шароитлар яратиш;

глобал илмий муҳитга интеграция қилиш учун илмий-тадқиқотлар даражаси ва натижадорлигини ошириш, шу жумладан янги илмий йўналишларни ривожлантириш;

тупроқ биологияси, физикаси, механикаси, агрокимёси ва микробиологиясига оид тупроқ унумдорлигини оширилиш ва мониторингига йўналтирилган замонавий тадқиқотларни амалга ошириш;

глобал иқлим ўзгаришлари шароитларида қишлоқ хўжалиги экинларидаги биокимёвий ва физиологик ўзгаришларни кенг тадқиқ қилиш, моделлаштириш ва шунга мувофиқ юқори температурага, сув танқислигига, шўрланишга ва янги пайдо бўлаётган касаллик ва зараркунандаларга чидамли генотиплар яратиш;

иқлим ўзгаришининг тирик организмларга таъсири ва атроф-муҳитни муҳофаза қилишга, шунингдек уларнинг иссиқхона эффекти оқибатларига чидамлилигини ошириш мақсадида ўсимликлар физиологияси, генетик, геномик ва биотехнологик тадқиқотларни кенгайтириш;

соғлом овқатланиш ва соғлом турмуш тарзи физиологияси соҳасидаги тадқиқотларни кенгайтириш;

Ўзбекистоннинг доривор ўсимликлар базасини ўрганиш, уларнинг интродукциясини ривожлантириш, ноёб ўсимлик олами хилма-хиллиги, микроб уюшмалари, ноёб ёввойи ҳайвонлар турларининг миллий коллекцияларини қайта тиклаш, мавжудларини янгилаш;

халқаро стандартлар асосида табиий биологик хилма-хиллик объектлари бўйича миллий биологик коллекцияларни шакллантириш, уларни сақлаш шароитларини яхшилаш, рақамлаштирилган маълумотлар базасини яратиш ҳамда халқаро маълумотлар базаларига интеграция қилиш;

чўллашиш билан боғлиқ биологик таксонларнинг климатогеник динамикаси ва эволюциясини ўрганиш ҳамда амалий тавсиялар ишлаб чиқиш;

“ёввойи” табиат феноменларини ўрганиш орқали “биологик деҳқончилик” ривожланишини назарий ва амалий томонларини талқин қилиш мақсадида “тупроқ-микроорганизм-ўсимлик” триадасини тизимли ўрганиш бўйича тадқиқотларни кенг йўлга қўйиш;

молекуляр филогения ва тизимлаштиришни, популяцион генетика ва биогеографияни ривожлантириш;

ДНК штрих-кодлаш ва биологик хилма-хиллик объектларини генетик сертификатлаш;

микобиоталарни тадқиқ этиш ва биологик фаоллик механизмларини ўрганиш;

биология фанлари соҳасида кадрлар тайёрлаш, малакасини ошириш ва қайта тайёрлаш тизимини янада такомиллаштириш.

Инновацион ривожланиш вазирлиги, Фанлар академияси, Молия вазирлиги, Иқтисодиёт ва саноат вазирлиги, Қишлоқ хўжалиги вазирлиги, Соғлиқни сақлаш вазирлиги, Энергетика вазирлиги, Олий ва ўрта махсус таълим вазирлиги, “Ўзкимёсаноат” АЖ, “Ўзбекнефтгаз” АЖ, “Ўзсаноатқурилишматериаллари” уюшмасининг:

давлат илмий муассасаси шаклида юридик шахс мақомига ва замонавий инфратузилмага эга бўлган Янги композит материаллар ва замонавий кимё технологиялари асосида инновацион қурилиш материаллари технологияларини яратиш Миллий лабораториясини ташкил этиш;

минерал ресурслардан фойдаланиш самарадорлигини ошириш мақсадида “Ўзбеккўмир” АЖ ҳузурида юридик шахс мақомига эга бўлган “Кўмир ва материаллар кимёси” илмий-тажриба лабораториясини ташкил этиш, Фанлар академиясининг Умумий ва ноорганик кимё институтида “Кўмир кимёси ва технологияси” ва Ўсимлик моддалари кимёси институтида “Нозик органик синтез ва технологияси” янги илмий йўналишлари фаолиятини йўлга қўйиш;

“Ўзкимёсаноат” АЖ ва “Ўзбекнефтгаз” АЖ тизимидаги йирик корхоналар ҳузурида замонавий илмий-таҳлилий асбоб-ускуналарга эга бўлган тажриба-ишлаб чиқариш лабораторияларини ташкил этиш асосида юқори самарадор кимёвий технологияларни тармоқ корхоналарига жорий этиш кўламини кенгайтириш;

хўжалик бошқаруви органлари ва йирик давлат корхоналарининг Инновацион фаолиятни қўллаб-қувватлаш жамғармалари маблағлари ҳисобидан тўғридан-тўғри венчур молиялаштириш механизми асосида юқори самарадор кимёвий технологияларни ишлаб чиқаришга жорий этишга қаратилган инновацион тадбиркорлик субъектларини (шўъба корхоналарини) ташкил этиш;

Генетика ва ўсимликлар экспериментал биологияси институтининг “Ғўза генофонди коллекцияси” ноёб илмий объекти негизида давлат илмий муассасаси шаклида юридик шахс мақомига эга бўлган Фанлар академияси ҳузурида Миллий ғўза генофонди коллекцияси марказини ташкил этиш;

Микробиология институтининг “Саноат аҳамиятига эга микроорганизмларнинг штаммлари коллекциялари”, Генетика ва ўсимликлар экспериментал биологияси институтининг “Фитопатоген микроорганизмлар коллекциялари” негизида Фанлар академияси ҳузурида “Микроорганизмларнинг Миллий коллекцияси”ни ташкил этиш;

кимё-биология соҳаларида илм-фанни ривожлантиришда нуфузли илмий мактабларни ва фан етакчиларининг тўғридан-тўғри иштирокини кенгайтириш ва масъулиятини ошириш мақсадида “Ўзбекистон кимёгарлари”, “Ўзбекистон биологлари”, “Ўзбекистон микробиологлари”, Ўзбекистон тупроқшунослари” каби йўналишларда нодавлат-нотижорат фан жамиятларини ташкил қилиш ва фаолиятини мунтазам йўлга қўйиш тўғрисидаги таклифларига розилик берилади.

Қуйидагилар:

2020-2021 йилларда кимё ва биология йўналишида амалга оширилаётган илмий-тадқиқотлар ва инновация ишлари натижадорлигини ошириш бўйича комплекс чора-тадбирлар дастури;

Кимё ва биология йўналишида илмий-тадқиқотлар ва инновация ишларини ривожлантиришнинг 2025 йилгача мақсадли кўрсаткичлари тасдиқланади.

Қуйидагилар Дастурни молиялаштириш манбалари этиб белгиланади:

Инвестиция дастури доирасида назарда тутиладиган маблағлар;

Давлат бюджети маблағлари;

Инновацион ривожланиш вазирлиги томонидан ўтказилган танловлар натижалари асосида илмий-инновацион лойиҳаларни амалга ошириш учун ажратиладиган маблағлар;

Қорақалпоғистон Республикаси республика бюджети, вилоятлар, Тошкент шаҳар маҳаллий бюджетлари маблағлари;

вазирлик ва идораларнинг бюджетдан ташқари маблағлари;

хўжалик бошқаруви органлари ва йирик давлат корхоналарининг Инновацион фаолиятни қўллаб-қувватлаш жамғармалари маблағлари;

юридик ва жисмоний шахсларнинг ҳомийлик хайриялари;

қонун ҳужжатлари билан тақиқланмаган бошқа манбалар.

Инновацион ривожланиш вазирлиги, Фанлар академияси, “Ўзсаноатқурилишматериаллари” уюшмаси, Давлат активларини бошқариш агентлиги, Тошкент шаҳар ҳокимлигининг:

Тошкент шаҳар, Мирзо Улуғбек тумани, Мирзо Улуғбек кўчаси, 77а-уй манзилида жойлашган Фанлар академиясининг Умумий ва ноорганик кимё институти ҳудудидаги фойдаланилмасдан бўш турган ер майдонининг 0,5 га қисмини “Ўзсаноатқурилишматериаллари” уюшмаси ҳузуридаги “ЎзқурилишматериалЛИТИ” МЧЖ илмий-тадқиқот ва инжиниринг марказига Миллий лабораториянинг бино-иншоотларини қурилиши учун ажратиб бериш;

лаборатория ва маъмурий бино-иншоотларни қуриш, уни энг илғор, замонавий хорижий илмий-таҳлилий асбоб-ускуналар билан жиҳозлаш учун “Қизилқумцемент” АЖ – 30,5 млрд. сўм, “Бекободцемент” АЖ – 3,4 млрд. сўм ҳамда “Кварц” АЖ – 4,0 млрд. сўм, жами 37,9 млрд. сўм пул маблағларини корхоналарнинг инновацион фаолиятни қўллаб-қувватлаш жамғармалари ҳисобидан 2020 йилнинг 1 апрелига қадар Марказнинг устав жамғармасини кўпайтириш мақсадида ўтказиб бериш;

Марказга истисно тариқасида, тендер савдолари ўтказмасдан, тўғридан-тўғри шартномалар асосида хорижий ва маҳаллий ишлаб чиқарувчилардан лаборатория асбоб-ускуналари харид қилишга ҳамда қурилиш ишларини лойиҳа ва смета-ҳужжатлари билан параллел равишда олиб борилишига рухсат бериш тўғрисидаги таклифлари маъқулланади.

Энергетика вазирлиги, Фанлар академияси “Ўзбеккўмир” АЖ билан биргаликда “Ўзбеккўмир” АЖ ҳузурида юридик шахс мақомига эга бўлган “Кўмир ва материаллар кимёси” илмий-тажриба лабораториясини ташкил этади. Бунда қуйидагилар назарда тутилади:

илмий-тажриба лабораториясини замонавий илмий-таҳлилий асбоб-ускуналар билан жиҳозлаш;

илмий-тажриба лабораториясидан Фанлар академиясининг Умумий ва ноорганик кимё институти олим ва мутахассислари учун бепул ва жамоавий фойдаланишларига зарур шарт-шароитлар яратиш;

кўмир хом-ашёси ва унинг чиқиндиларини чуқур кимёвий таҳлилини амалга ошириш асосида янги илмий ҳажмдор технологияларни яратиш ва инновацион маҳсулотлар ишлаб чиқаришни ташкил этиш.

Фанлар академияси Инновацион ривожланиш вазирлиги билан биргаликда Фанлар академиясининг Умумий ва ноорганик кимё институти ҳамда Ўсимлик моддалари кимёси институтининг мавжуд илмий йўналишларини тўлиқ инвентаризациядан ўтказиш асосида “Кўмир кимёси ва технологияси” ва “Нозик органик синтез ва технологияси” янги илмий йўналишларининг қисқа муддатли илмий дастурини ишлаб чиқади ва жорий этади.

Иқтисодиёт ва саноат вазирлиги Инновацион ривожланиш вазирлиги билан биргаликда:

“Ўзкимёсаноат” АЖ ва “Ўзбекнефтгаз” АЖ тизимидаги йирик корхоналар ҳузурида замонавий илмий-таҳлилий асбоб-ускуналарга эга бўлган тажриба-ишлаб чиқариш лабораторияларини ташкил этиш бўйича “Йўл харитаси”ни ишлаб чиқиб, Вазирлар Маҳкамасига тасдиқлаш учун киритади;

тажриба тариқасида кимё саноати корхоналарида, хусусан, “Ўзкимёсаноат” АЖ, “Максам Чирчиқ” АЖ, “Навоийазот” АЖ ҳузурида илмий фаолият субъектларининг илмий-инновацион ишланмаларини тўғридан-тўғри венчур молиялаштириш механизми асосида юқори самарадор кимёвий технологияларни ишлаб чиқаришга жорий этишга қаратилган кичик инновацион шўъба корхоналарини ташкил этиш ва келгусида ушбу маҳсулотларни сериялаб ишлаб чиқаришни йўлга қўйиш юзасидан асосланган таклифлар ишлаб чиқади.

Фанлар академияси ҳузуридаги Миллий ғўза генофонди коллекцияси марказининг тузилмаси тасдиқланади.

Миллий марказ директори Фанлар академияси президенти томонидан лавозимга тайинланади ва лавозимидан озод этилади.

Белгилаб қўйилишича:

Миллий марказ давлат илмий муассасаси шаклидаги юридик шахс бўлиб, Ўзбекистон Республикаси давлат герби тасвири туширилган ва ўз номи, давлат тилида ёзилган муҳрга ҳамда шахсий ҳисоб рақамига эга бўлади;

Миллий марказнинг илмий ва раҳбар ходимларининг лавозим маошлари бюджет маблағлари ҳисобига фундаментал, амалий тадқиқотлар ва инновацион ишларнинг давлат илмий-техник дастурларини амалга оширишда иштирок этувчи илмий муассасаларнинг илмий ва раҳбар ходимларининг базавий лавозим маошига, бошқа ходимларнинг лавозим маошлари эса – Ўзбекистон Республикаси Фанлар академияси илмий муассасаларининг тегишли лавозимлари учун белгиланган лавозим маошларига тенглаштирилади;

Ўсимликшунослик илмий-тадқиқот институти, Пахта селексияси, уруғчилиги ва агротехнологияси илмий-тадқиқот институти ва Ўзбекистон Миллий университети генофонд коллексиясида сақланаётган ғўза уруғи намуналари нусхаси узоқ муддатга сақлаш ва рақамлаштирилган маълумотлар базасига жамлаш учун Миллий марказга мунтазам топширилиб борилиши шартлиги қайд этилади;

Инновацион ривожланиш вазирлиги Фанлар академияси томонидан мавжуд ғўза генофонди намуналарини инвентаризациядан ўтказиш ва уларнинг рақамлаштирилган маълумотлар базасини яратиш ҳамда халқаро маълумотлар базаларига интеграция қилиш бўйича асослантирилган лойиҳаларига илмий фаолиятга оид давлат дастурлари доирасида мақсадли грант маблағлари ажратади.

Қуйидагилар Миллий марказни молиялаштириш манбалари этиб белгиланади:

Давлат бюджети маблағлари;

Инновацион ривожланиш вазирлиги томонидан ўтказилган танловлар натижалари асосида илмий-инновацион лойиҳаларни амалга ошириш учун ажратиладиган маблағлар;

халқаро молия ва бошқа муассасалар ҳамда хорижий ташкилотлар грантлари доирасида олинган маблағлар;

хўжалик фаолиятидан олинган маблағлар;

жисмоний ва юридик шахсларнинг хайрия маблағлари, шунингдек қонун ҳужжатларида тақиқланмаган бошқа манбалар.

Республикада қишлоқ хўжалиги экинларининг янги навлари ва гетерозис дурагайларини яратишни тизимли равишда ташкил этиш ҳамда ҳудудларнинг табиий тупроқ-иқлим шароитларига мос қишлоқ хўжалиги экинлари уруғчилиги ва уруғшунослигини ривожлантириш мақсадида Тошкент давлат аграр университети қошидаги “Ғўза уруғчилиги маркази” негизида Инновацион ривожланиш вазирлиги ҳузуридаги Қишлоқ хўжалиги экинлари селекцияси, уруғчилиги ва уруғшунослиги институти ташкил этилади.

Қуйидагилар Институт фаолиятининг асосий вазифалари ва йўналишлари этиб белгиланади:

қишлоқ хўжалиги экинларининг селекцияси, уруғчилиги ва уруғшунослигини ривожлантириш ҳамда юқори сифатли қишлоқ хўжалиги экинлари уруғларини ишлаб чиқариш бўйича илмий-тадқиқот ва инновация ишларини амалга ошириш;

селекция навлари ва юқори гетерозисли дурагайларни ҳамда қишлоқ хўжалиги экинларининг навдорлик даражаси юқори бўлган, униб чиқиш энергияси, касаллик ва зараркунандаларга чидамлилик ва бошқа хусусиятларга эга навларини яратиш;

яратилган қишлоқ хўжалиги экинлари янги навлари ва гетерозис дурагайларни жорий этиш ва кенг оммалаштириш ҳамда қишлоқ хўжалиги экинлари уруғлари маҳаллий бозорида импорт уруғлик материали ўрнига уларнинг юқори сифатли уруғларини ишлаб чиқариш, шу жумладан, рақобатбардошлигини ошириш ва нарх борасида устунлигини таъминлаш;

доривор ўсимликлар уруғшунослигини ривожлантириш;

уруғлар тайёрлашда уруғ сифатини халқаро стандартлар даражасига олиб чиқиш имконини берувчи қуритиш, тозалаш, калибрлаш, зарарсизлантириш, қадоқлаш, капсулалаш, сақлаш ҳамда стимуляторлар ва зарарсизлантирувчи воситалар билан ишлов бериш каби замонавий усулларни кенг кўламда қўлланилишини ташкил этишга кўмаклашиш.

Белгилаб қўйилишича, Институт ҳуқуқ ва мажбуриятлар бўйича Тошкент давлат аграр университети қошидаги “Ғўза уруғчилиги маркази”нинг ҳуқуқий вориси ҳисобланади.

Институтга беғараз асосда:

Институт Тошкент вилояти Юқоричирчиқ тумани А.Яссавий маҳаллa фуқаролар йиғини Ш.Рашидов кўчаси, 1-уй манзилида жойлашган Тошкент давлат аграр университети қошидаги “Ғўза уруғчилиги маркази”нинг биноси, иншоотларини унга туташ ҳудуд билан биргаликда оператив бошқарув ҳуқуқи билан;

Тошкент давлат аграр университети қошидаги “Ғўза уруғчилиги маркази”нинг лаборатория ускуналари, мебель, компьютер техникалари ва бошқа мулклари берилади.

Вазирлар Маҳкамаси Инновацион ривожланиш вазирлиги, Қишлоқ хўжалиги вазирлиги билан биргаликда Институт ва унинг филиалларининг фаолиятини йўлга қўйиш юзасидан ҳукумат қарорини қабул қилади.

Фанлар академияси Инновацион ривожланиш вазирлиги, Экология ва атроф-муҳитни муҳофазалаш давлат қўмитаси, Ўрмон хўжалиги давлат қўмитаси билан биргаликда қуйидаги норматив-ҳуқуқий ҳужжатларни белгилаб тартибда тасдиқланишини таъминлайди:

Орол денгизининг қуриган туби ва қўшни қурғоқчилик ҳудудларининг биологик хилма-хиллиги динамикасини кузатиш учун рақамли платформани яратиш дастури;

республика фауна ва флорасининг рақамли кадастрини яратиш бўйича “Йўл харитаси”;

Миллий “Қизил китоб”нинг янги таҳририни нашр этиш бўйича чора-тадбирлар режаси.

Инновацион ривожланиш вазирлиги:

кимё ва биология йўналишининг мавжуд илмий-инновацион салоҳиятидан самарали фойдаланиш асосида инновацион технологиялар яратиш мақсадида илмий-тадқиқот ишларига давлат буюртмаси талабларига мувофиқ илмий лойиҳалар танловини;

илмий-тадқиқот лойиҳаларини хусусий сектор ва тармоқ корхоналари билан тенг шерикликда молиялаштириш амалиётини такомиллаштириш мақсадида “Ўзкимёсаноат” АЖ ва “Ўзбекнефтгаз” АЖнинг 25 млрд сўм ва Инновацион ривожланиш вазирлигининг 25 млрд сўм маблағлари ҳисобига биргаликда тармоқ корхоналари эҳтиёжлари учун юқори самарадор кимё технологиялари ва рақобатбардош илмий ҳажмдор маҳсулотлар яратишга қаратилган умумий ҳажми 50 млрд сўмлик қўшма илмий лойиҳалар танловини;

Оролбўйи ҳудудининг ўсимлик ва ҳайвонот дунёсини ривожлантириш бўйича экостартап лойиҳалар танловини эълон қилади.

Инновацион ривожланиш вазирлиги президент ҳузуридаги Оролбўйи халқаро инновация маркази ва Қишлоқ хўжалиги вазирлиги билан ҳамкорликда:

ўсимликларнинг агротехник, биологик ва кимёвий ишловини амалга ошириш учун республиканинг барча ҳудудларида “тупроқ клиникалари” хизматлари тармоқларини ташкил қилиш;

маҳаллий давлат ҳокимияти органлари билан биргаликда тупроқни таҳлил қилишнинг мобиль лабораторияларини ташкил этиш асосида доимий равишда қишлоқ хўжалигида тупроқнинг агрокимёвий таҳлил қилиш, экин ерлари тупроқлари унумдорлиги ва озуқа моддалари билан таъминланганлик даражасини доимий мониторингини амалга ошириш;

оролбўйи ҳудудларида шўрланган ерларга инновацияларни жорий қилиш ва шўрланган ерлар деградациясига қарши курашиш чораларини кўради.

Шу мақсадда Инновацион ривожланиш вазирлиги илм-фанга оид давлат дастурлари доирасида мақсадли грант лойиҳаларни ажратилишини ҳамда халқаро илмий грантлар ва техник кўмак маблағларини жалб қилинишини таъминлайди.

Инвестициялар ва ташқи савдо вазирлиги Инновацион ривожланиш вазирлиги, Фанлар академияси билан биргаликда:

кимё йўналишида фаолият юритувчи илмий-тадқиқот муассасаларидаги мавжуд лабораторияларни халқаро стандартларга (GLP ва GMP) мос равишда модернизация қилиш учун хорижий грант маблағларини жалб қилиш;

GLP талабларига жавоб берадиган клиник олди синовларини ташкил этиш ва унинг молиялаштириш манбаларини аниқлаш юзасидан таклифлар ишлаб чиқади ва Вазирлар Маҳкамасига киритади.

Соғлиқни сақлаш вазирлиги Инновацион ривожланиш вазирлиги, Фанлар академияси билан биргаликда Эпидемиология, микробиология ва юқумли касалликлар институтининг “Инсон инфекциялари микроорганизми коллекцияси”ни доимий равишда тўлдириб ва янгилаб борилишини, коллекция материаллари асосида чуқур илмий-тадқиқот ишларини олиб борилишини таъминлайди.

Халқ таълими вазирлиги Олий ва ўрта махсус таълим вазирлиги, Инновацион ривожланиш вазирлиги билан биргаликда:

а) таълим муассасаларида кимё фанини ўқитишни такомиллаштириш бўйича;

б) 2020 йилнинг 1 апрелига қадар:

замонавий билим ва технологияларни ҳисобга олган ҳолда биология фанлари бўйича ўқув дастурларини, дарсликларни ва ўқув қўлланмаларини (шу жумладан ўрта мактабларда биология курсини) кўриб чиқиш ва қайта ишлаб чиқиш;

университетларнинг ўқув дастурига биология фанининг янги йўналишларини, шунингдек биология фанининг ҳозирги тенденцияларини қамраб оладиган қўшимча устувор йўналишларини киритиш юзасидан таклифлар ишлаб чиқиб, Вазирлар Маҳкамасига киритади.

Олий ва ўрта махсус таълим вазирлиги ва Инновацион ривожланиш вазирлигининг 2020/2021 ўқув йилидан бошлаб:

а) бакалавриат таълим йўналишлари бўйича:

Миллий университет, Самарқанд давлат университети ва Бухоро давлат университетида “Биотехнология” таълим йўналишига – 50 та, “Кимёвий таҳлил ва экологик хавфсизлик" таълим йўналишига – 25 та;

Тошкент кимё-технологиялар институтида “Кимёвий технология, нефт кимёси ва биотехнологияда энергия ва ресурсларни тежаш жараёнлари” таълим йўналишига – 25 та;

б) магистратура мутахассисликлари бўйича:

Миллий университетда “Микробиология” мутахассислигига – 10 та, “Кимёвий таҳлил ва экологик хавфсизлик” мутахассислигига – 10 та, “Табиий ресурсларни қайта ишлаш” мутахассислигига – 10 та, “Нозик органик синтез” мутахассислигига – 10 та;

Тошкент кимё-технологиялар институтида “Кимёвий технология, нефт кимёси ва биотехнологияда энергия ва ресурсларни тежаш жараёнлари” мутахассислигига – 8 та, “Катализатор ва адсорбентлар технологияси” мутахассислигига – 8 та, “Нозик органик синтез технологияси” мутахассислигига – 10 та квота ажратиш тўғрисидаги таклифларига розилик берилади.

Кимё ва биология йўналишида илмий-тадқиқот ишларини олиб бораётган иқтидорли ёш олимларнинг 2020 йилда қисқа муддатли хорижий илмий стажировкаларини мақсадли ташкил этиш учун:

а) Инновацион ривожланиш ва новаторлик ғояларини қўллаб-қувватлаш жамғармаси маблағлари ҳисобидан биология йўналишида 50 нафар ёш олимларнинг;

б) Вазирлар Маҳкамаси ҳузуридаги «Эл-юрт умиди» жамғармаси маблағлари ҳисобидан кимё йўналишида 50 нафар ёш олимларнинг нуфузли хорижий илмий марказлар ва университетларга қисқа муддатли илмий стажировкалари ташкил этилади.

Инновацион ривожланиш вазирлиги, Фанлар академияси, Соғлиқни сақлаш вазирлиги, Қишлоқ хўжалиги вазирлиги, Олий ва ўрта махсус таълими вазирлиги илм-фан ривожига, жумладан кимё ва биология фанлари ривожига салмоқли ҳисса қўшган ёш олимларнинг илмий тадқиқотлари натижалари учун Давлат мукофотлари билан тақдирлашни йўлга қўйиш, шу жумладан Президент стипендиясини таъсис этиш юзасидан Вазирлар Маҳкамасига таклиф киритади.

Молия вазирлиги кимё ва биология йўналишида амалга ошириладиган «стартап» лойиҳаларни молиялаштириш учун 2020 йилда Инновацион ривожланиш ва новаторлик ғояларини қўллаб-қувватлаш жамғармасига 40 миллиард сўм миқдорида бюджет маблағларини ажратади.

Иқтисодиёт ва саноат вазирлиги Молия вазирлиги, Инвестициялар ва ташқи савдо вазирлиги билан биргаликда Ўзбекистон Республикасининг Инвестиция дастуридаги параметрларини тегишли йилларда белгилашда капитал қўйилмалар лимитларини, шунингдек, кимёвий ҳамда қурилиш саноатини ривожлантириш дастурини амалга ошириш, илмий-тадқиқот ва синов лабораторияларини ташкил этиш ҳамда жиҳозлаш учун зарур бўлган марказлаштирилган инвестиция маблағларини ажратилишини таъминлайди.

Ташқи ишлар вазирлиги, Инвестициялар ва ташқи савдо вазирлиги Инновацион ривожланиш вазирлиги, Фанлар академияси, Олий ва ўрта махсус таълим вазирлиги билан биргаликда бир ой муддатда илм-фан соҳаси ва инновацион фаолиятга хорижий ташкилотларнинг, халқаро молия ва бошқа институтларнинг грантлари ва техник кўмаклашиш маблағларини жалб қилиш кўламини кенгайтириш, уларнинг сони ва жалб қилинадиган маблағлари ҳажмини ошириш юзасидан таклиф ишлаб чиқади ва Вазирлар Маҳкамасига киритади.