Олмаотада коронавирус кенг тарқалган давлатлардан келган 500 га яқин киши қидирилмоқда   

Қозоғистоннинг Олмаота шаҳрида коронавирус эпидемияси бўйича вазият яхши бўлмаган давлатлардан келган 488 киши Миллий хавфсизлик қўмитаси (МХҚ) ва полиция томонидан қидирилмоқда. 

“24 февралдан 13 мартгача Олмаотага коронавирус бўйича вазият яхши бўлмаган давлатлардан 11340 киши келган. 10852 киши, яъни келганларнинг 95,7 фоизи топилиб, шифокорлар назорати остига олинган. Топилмаган қолган шахсларнинг маълумотлари миграция хизмати, полиция ва МХҚга берилган”, деб айтган жамоат саломатлиги бошқармаси бошлиғи Тлеухан Абилдаев.

Қидирилаётганларнинг барчаси коронавирусга чалинганлар ёки уни юқтирганликка шубҳа қилинганлар билан алоқада бўлганини англатмайди.

Таъкидланишича, маҳаллий ҳокимият Олмаотага 9 март куни коронавирусга чалинган киши билан бирга учиб келган 24 кишини ҳам қидирмоқда.

“9 март куни Франкфуртдан учиб келган касалланган киши билан бирга самолётда 68 киши бўлган. Биз улардан 4 нафари бошқа давлатларга учиб кетганини аниқлаганмиз, 40 нафари топилган. Улардан 11 нафари шифохонага жойлаштирилган, яна 24 киши қидирилмоқда. Эртагача уларнинг барчасини топамиз”, деб таъкидлаб ўтган Абилдаев.