Лукашенко: глобал ўйинчилар коронавирусдан дунёни урушсиз бўлиб олишда фойдаланиши мумкин

Александр Лукашенко Беларусь коронавирус тарқалиши билан боғлиқ вазият бўйича жамоатчиликка ҳаққоний маълумотлар тақдим этаётганини билдирди.

Фото: Михаил Климентьев/ТАСС

Беларусь президенти Александр Лукашенко глобал ўйинчилар коронавирусдан дунёни урушсиз бўлиб олишда фойдаланиши мумкин, деб ҳисоблайди. У бу ҳақда "Мир" телерадиокомпаниясига берган интервьюсида айтди.

Унинг сўзларига кўра, бугун кўпчилик асосий савол устида бош қотирмоқда: коронавирус пандемиясидан сўнг нима бўлади.

"Эмманюэль Макрон буни уруш деб атади, дунёнинг энг кучлилари коронавирус васвасаси, инфодемия орқали дунёни бўлиб олишни хоҳлаётганга ўхшамаяптими?" – деди Беларусь президенти.

Лукашенко Беларусь коронавирус тарқалиши билан боғлиқ вазият бўйича жамоатчиликка ҳаққоний маълумотлар тақдим этаётганини билдирди.

"Беларусь ниманидир яширяпти ва вирус бўйича ишламаяпти деб айюҳаннос солишмоқда. ЖССТ ўчоқлар, нуқталар бўйича ишлашни тавсия қилмоқда. Яъни агар ўчоқни кўрсак, унга ташланяпмиз ва беморни ҳам, унинг атрофидагиларни ҳам даволашни бошлаяпмиз. Дунёда ҳеч ким бундай ишламаяпти. Улар фронт бўйлаб кетишмоқда. Шаҳарни ўраб олишяпти – чиқиш ҳам, кириш ҳам йўқ ва ҳаммани уйларига қамаб қўйишди", - деди у.

Охирги маълумотларга кўра,Беларусда коронавирусга чалиниш билан боғлиқ 160дан ортиқ ҳолат қайд этилган, 2 киши вафот этган.

Тайёрлаган: Дилшод Аскаров

#Беларусь #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.