Коронавирус сабабли Европада ҳосил йиғиб-териб олишда муаммолар бошланди

Ўтган ҳафтада Европа парламенти тадқиқот маркази мигрант ишчилар етишмаслиги сабабли супермаркетларда нархлар ошиши мумкинлигидан огоҳлантирганди.

Фото: sb.by

Европа мамлакатларидаги фермерлар коронавирус эпидемияси сабабли мавсумий ишчилар етишмаслигига дуч келмоқда.

Испанияда қулупнай териб олгани ҳеч ким йўқ, деб ёзмоқда Deutsche Welle. Коронавирус боис эълон қилинган чеклов чоралари сабабли марокашлик мавсумий ишчилар Испанияга кела олмаяпти. Бундан ташқари, Шарқий Европа мамлакатларидан келувчи ишчилар ҳам ўз ватанларига қайтиб кетган.

Испаниядаги барча қулупнайларнинг 97 фоизи етиштирилувчи Уэльва провинциясида 25 минг нафар ишчи етишмаяпти.

Германиядаги фермаларда ишлаш учун 300 минг киши керак.

Италияда сарсабил ва қулупнай етилди, аммо чеклов чоралари сабабли мигрант ишчилар мамлакатга кела олмаяпти, деб хабар бермоқда Politico нашри. Мамлакат озиқ-овқат, қишлоқ ва ўрмон хўжалиги вазири Тереза Белланова мигрантларга ҳужжат олмасдан ишлашга рухсат беришни таклиф қилди.

Маҳсулотларнинг катта қисми денгиз орқали ташилади. Чегаралар ёпилгани боис тижорат кемалари портларга эркин кира олмаяпти ёки экипажга янги аъзолар қабул қила олмаяпти. Бу ҳам озиқ-овқат маҳсулотлари етказиб беришга салбий таъсир қилмоқда.

Тайёрлаган Дилшод Аскаров

#Европа #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.