Самарқандда 34 кишига коронавирус юқишига сабабчи бўлган шифокорга жиноят иши очилди

Самарқанд вилояти прокуратураси ахборот хизмати вилоятдаги тиббиёт ходимлардан бири 34 кишига коронавирус юқишига сабабчи бўлгани, унга жиноий иш қўзғатилгани ҳақида маълумот берди.

Маълум қилинишича, вилоят ҳудудида Covid-19 келтириб чиқарувчи коронавирус инфекцияси тарқалиб кетишининг олдини олиш ва унинг манбасини аниқлаш бўйича ҳуқуқни муҳофаза қилувчи органлар ва тиббиёт ходимлари ҳамкорлигида тузилган «Ишчи гуруҳ» аъзолари томонидан эпидемиологик суриштирув ишлари олиб борилган.

Суриштирув якунларига кўра, фуқаро Х.Д. туман тиббиёт бирлашмасида бўлим мудири вазифасида ишлаб келиб, жорий йилнинг 20 апрель кунидан соғлигида ўзгариш бошланиб, ўзида йўтал, тана ҳароратининг 39°С гача кўтарилиши, нафас қисиши каби Covid-19 инфекцияси касаллиги белгиларини ҳис қилгани ҳолда ушбу кундан уй шароитида даволана бошлаганлиги аниқланган.

Х.Д. шифокор бўла туриб ўзи коронавирус инфекцияси касаллигига чалинганини гумон қилган бўлса-да, карантин шароитида тегишли тартибда давлат санитария назорати органларининг тиббий текширувидан ўтмасдан, 20 апрелдан 27 апрелга қадар тегишли тартибда тез тиббий ёрдамга мурожаат қилмасдан, уй шароитида ўзбошимчалик билан, яширинча ўзини ўзи даволаш билан шуғулланиб, санитарияга оид қонун ҳужжатларни қўпол равишда бузган.

Оқибатда, Х.Д. белгиланган тартибда ўзини ва бошқаларни ҳимоялаш, касаллик юқтирмаслик чораларини кўрмасдан, у билан доимий мулоқотда бўлган турмуш ўртоғи ва бошқа қариндошлари, ўзи даволаб келган бемор ва ҳамкасбларидан иборат жами 11 нафар кишига, шунингдек улар орқали яна 23 кишига ўта хавфли бўлган юқумли касалликни юқтириб, касаллик юқиш хавфи мавжуд бўлган даврда мулоқотда бўлган шахслар доирасини ҳамда борилган жойлар ҳақидаги маълумотларни қасддан яшириб, жами 34 нафар киши Covid-19 инфекцияси билан касалланишига сабабчи бўлган.

Х.Д. орқали касаллик юқтирган жами 34 нафар шахснинг барчаси карантинга олиниб, вилоят юқумли касалликлар шифохонасида даволанмоқда.

12 май куни Х.Д.га нисбатан ЖКнинг 257-1-моддаси 1-қисми (Санитарияга оид қонун ҳужжатларни ёки эпидемияга қарши кураш қоидалари бузиш) билан жиноят иши қўзғатилиб, тергов ҳаракатлари олиб борилмоқда. Жиноят ишининг тергови вилоят прокуратураси томонидан алоҳида назоратга олинган.

Қайд этиш керакки, Самарқанд вилояти сўнгги кунларда коронавирусдан зарарланиш билан боғлиқ янги ҳолатлар бўйича етакчилик қилмоқда. Коронавирус инфекцияси юқтириб, ҳали тузалмаган беморлар сони бўйича ҳам вилоят сўнгги ўринлардан бирида турибди.

• Вилоятда шу пайтга қадар 204 ҳолатда касаллик қайд этилган, улардан ҳозиргача 103 нафар бемор бутунлай ушбу инфекциядан соғайган, айни пайтда вилоятда 101 нафар бемор даволанмоқда.

Эслатиб ўтамиз, 12 май куни Самарқандда карантин чоралари яна кучайтирилиши маълум қилинди. Унга кўра, 13 майдан шаҳарга кириш ва шаҳардан чиқишда назорат кучайтирилади, шаҳар ичида автомобилда стикерсиз ҳаракатланиш тақиқланади, фаолиятига рухсат берилган тадбиркорлик субъектлари ҳар бир мижоз ҳароратини ўлчаб, уларга бепул янги ниқоб ва қўлқоп тарқатиши шарт ҳисобланади.