Льюис Ҳэмилтон Дэвид Бекҳэмнинг рекордини янгилади

“Формула-1” пойгачиси Льюис Ҳэмилтон Британиянинг энг бой спортчисига айланди. У бу борада собиқ футболчи Дэвид Бекҳэмнинг рекордини янгилади.

Фото: AP /Kamran Jebreili

Sunday Times Rich List 2020 рейтингига кўра, “Формула-1” пойгаларининг 6 карра чемпионининг бойлиги 224 млн фунт стерлингга (250 млн евро) баҳоланмоқда.

Бу қиймат рейтинг олиб борилаётган 32 йил давомидаги рекорд сумма ҳисобланади.

Аввалги рекорд натижа “Манчестер Юнайтед” ва “Реал” клубларининг собиқ юлдузи Дэвид Бекҳэмга тегишли бўлган. Унинг 2013 йилда спортдан кетаётган вақтдаги бойлиги 200 млн фунт стерлингга (225 млн евро) баҳоланган.

35 ёшли Ҳэмилтон бир йил ичида 37 млн фунт стерлингга бойиган.

Асосан медиа соҳасидаги шахслар кўпчиликни ташкил қилган ушбу рейтингга Ҳэмилтондан ташқари яна бир спортчигина кирган. Бу шимолий ирландиялик голфчи Рори Макилрой бўлиб, унинг бойлиги 170 млн фунт стерлингга баҳоланган.

The Times нашри маълумотларига кўра, “Мерседес” жамоаси учун иштирок этувчи Ҳэмилтоннинг маоши бонуслар билан бирга йилига 40 млн фунт стерлингни ташкил қилади. Пойгачининг шартномаси 2020 йил охирида ўз ниҳоясига етади ва амалдаги чемпион ўз фаолиятини давом эттириши-йўқлиги айни вақтда номаълумлигича қолмоқда.

#Льюис Ҳэмилтон #Дэвид Бекҳэм