NYT 27 октябрда Россия–АҚШ музокараларидан хабардор манбаларга таяниб хабар беришича, АҚШ Молия вазирлиги фонднинг санкцияларни бекор қилиш ҳақидаги аризасини одатий тартибда ўрганмоқда.
Нашр суҳбатдошларидан бирига кўра, бу жараёнда фонд чекловлар жорий этилишига сабаб бўлган асослар ўз кучини йўқотганини исботлаши керак. Ҳозирча санкцияларни бекор қилиш бўйича якуний қарор қабул қилингани ҳақида маълумот йўқ.
Газета бу муҳокамани Кремлнинг Украинадаги урушга оид дипломатик жараёнлардан иқтисодий манфаатларини илгари суриш учун фойдаланишга уриниши сифатида баҳолаган.
Дмитриев бошқарадиган фонд ҳақида
Россия тўғридан тўғри инвестициялар фонди 2011 йилда мамлакатга хорижий сармояларни жалб қилиш мақсадида ташкил этилган. Унинг лойиҳаларидан бири COVID-19га қарши «Спутник V» вакцинаси бўлган.
Фонд раҳбари Кирилл Дмитриев Россия–АҚШ музокараларининг муҳим иштирокчиларидан ҳисобланади. У икки мамлакат ўртасида эҳтимолий қўшма бизнес лойиҳаларини илгари суриб, Трамп маъмурияти вакиллари билан бир неча бор учрашган.
Жо Байден маъмурияти Россия Украинага кенг кўламли ҳужум бошлаганидан тўрт кун ўтиб фондга санкциялар жорий қилган. Ўшанда АҚШ Молия вазирлиги уни расман суверен инвестиция фонди бўлса-да, кўпчилик Владимир Путиннинг «қора кассаси» деб ҳисоблашини билдирган эди.
Санкциялар масаласи дизел келишуви фонида кўтарилмоқда
Доналд Трамп 9 октябрда Владимир Путин билан музокаралардан сўнг Россия дизелини АҚШ ва жаҳон бозорига етказиб бериш бўйича келишувга эришилганини эълон қилган.
Унинг баёнотига кўра, Россия:
зудлик билан 300 минг тоннадан ортиқ;
ноябр давомида яна 500 минг тонна;
шундан сўнг 1 миллион тонна дизел етказиб бериши керак.
Трамп Россия нефтни қайта ишлаш заводларининг ҳолатига қараб, кейинчалик қисқа муддатда қўшимча 3 миллион тонна ёнилғи етказиб берилиши ҳам мумкинлигини айтган. У бу таъминот дизел нархларини пасайтиришини билдирган.
