Андижонда қўшнининг томидан сув тушаётгани баҳонасида бошланган жанжал жиноят иши қўзғатилиши билан тугади

2020 йил 20 апрель куни соат 12:30да 53 ёшли К.М. Андижон вилояти Пахтаобод тумани Саноат МФЙ Иттифоқ кўчасида қўшниси, 39 ёшли А.Э. билан яшаш хонадони том қисмидан ёмғир сувлари тушаётганлиги сабабли ўзаро гап тортишиб жанжаллашган.

Ўзбекистон Республикаси ИИВ ҳузуридаги Тергов департаменти хабарига кўра, А.Э. ғишт бўлаги билан К.М.ни уриб, унга тан жароҳати етказган.

Ҳодиса содир бўлган жойни кўздан кечириш давомида бир дона ғишт бўлаги ашёвий далил тариқасида расмийлаштириб олиниб, К.М.нинг тан жароҳати даражасини аниқлаш мақсадида судга оид тиббий экспертиза тайинланган.

Суд-тиббий экспертизаси хулосасига кўра, К.М.га “оғир” даражада тан жароҳати етказганлиги аниқланган.

Ҳолат юзасидан Пахтаобод тумани ИИБ ҳузуридаги тергов бўлими томонидан фуқаро А.Э.га нисбатан Жиноят кодексининг 104-моддаси 1-қисми (Қасддан баданга оғир шикаст етказиш) билан жиноят иши қўзғатилган.

Ҳозирда жиноят иши бўйича дастлабки тергов ҳаракатлари олиб борилмоқда.