Қизиғи, пандемия оғир жароҳатлар сабабли узоқ муддатга сафдан чиққан аксарият футболчилар фойдасига ишлади. Бир неча ой олдин улар учун мавсум якунлангани айтилган бўлса, карантин боис мажбурий таътилда жароҳатидан тикланган бу етакчилар энди мавсумнинг якуний палласини интизорлик билан кутишмоқда.
Луис Суарес
Клуби: «Барселона»
Қачон жароҳат олди: 11 январь куни «Атлетико»га қарши кубок баҳсида
Жароҳат ташхиси: ўнг тизза тўқимасининг шикастланиши
Тикланиш учун кетган вақт: 4 ой
«Барселона» ҳужумчиси Луис Суарес Испания Суперкубоги доирасида «Атлетико»га қарши баҳсда ўнг тиззасидан олган жароҳати сабаб жарроҳлик амалиётини бошдан ўтказганди. Шундан кейин «Барса» уругвайлик ҳужумчи учун мавсум якунланганлигини эълон қилиб, қишки трансфер ойнасида Луиснинг ўрнига Мартин Брейтуэйтни ярим йилга таклиф этганди. Аммо 4 ойлик танаффусдан кейин Суарес тикланиб, яна жамоаси билан бирга.
«Машғулотларда яхши спорт формасига кира олдик. Жамоа билан бирга мавсумнинг якуний палласига тайёргарлик кўраяпман. «Мавсум сен учун тугади», дейишганди. Аммо коронавирус менга вақтдан ютишга ёрдам берди. Энди «Барса»га яна ёрдам бера оламан», - дейди Луис Mundo Deportivo нашрига.
Усмон Дембеле
Клуби: «Барселона»
Қачон жароҳат олди: 11 февраль куни машғулот пайтида
Жароҳат ташхиси: сон мушакларининг ёрилиши
Тикланиш учун кетган вақт: 5 ой
Жароҳатларга мойиллиги учун «биллур оёқ» номини олган Усмон Дембеле Ла Лигада мавсумнинг энг омадсиз футболчиларидан бирига айланишга яқин. 103 миллион евролик трансфер ўзини оқлай олмаётгани испан матбуоти томонидан бот-бот такрорланмоқда. Пандемия сабабли юзага келган мажбурий танаффусдан франциялик ҳужумкор футболчи унумли фойдалана олди ва жамоавий машғулотларни бошлади. Каталония клубини тарк этиши кутилаётган Дембеле жамоасининг чемпионликни қўлга киритиши йўлида ўз улушини қўшиш учун курашса ажабмас.
