«SULTON TEX GROUP» ишида яна бир тўсқинлик: томчилатиб суғориш технологияси субсидиясиз қоладими?

Қашқадарё вилоятидаги «SULTON TEX GROUP» кластери бошига тушган кўргуликлар ҳақида аввал ҳам хабар берган эдик. Қарши туман ҳокимлиги тумандаги фермерларнинг кластер билан ишлашига тўсқинлик қилиб келмоқда. Ҳозир бу масала туман маъмурий судида кўрилмоқда.

Бу орада Қарши туман ҳокими Мақсуда Мустафоева кластернинг яна бир фаолиятига тўсқинлик қилаётгани маълум қилинди.

Вазият шундай: фермерлар билан ишлашига йўл қўйилмаётган кластер жорий мавсумда фақат ўзига тегишли 1300 гектар майдонда пахта етиштирмоқда. Мазкур ерларнинг 73,6 гектарида Қашқадарё тарихида илк марта томчилатиб суғориш йўлга қўйилмоқда.

Чунки «Насаф» ҳудудидаги мазкур ерда азалдан пахта етиштириш мушкул бўлган. Ерлар унумсиз, Қарши магистрал каналидан насосда икки кўтариш билан сув чиқарилган.

Кластер 140 минг доллар сарфлаб, Туркия технологияси асосида мазкур ерларда томчилатиб суғоришни йўлга қўймоқчи. Айни пайтда замонавий насос станцияси қурилган, магистрал қувурлар ётқизилган, янги трасформатор уланган. Пушта ораларида резина шланглар ётқизилмоқда. Улардан 5 йил давомида фойдаланиш мумкин. Хуллас, иш қизғин.

Ушбу технология жорий этилгач, далаларга сув сарфи 90 фоизга камаяди. Боз устига, канал суви фильтрланиб тозаланиб, насос станциясининг ўзида керакли минерал ўғитлар қўшилиб, гидропоника усулида ғўза ниҳоли остига етказилади.

Бу ҳақда «SULTON TEX GROUP» кластери бош мироби Анвар Бобоназаров бизга ҳикоя қилиб берди.

Вазирлар Маҳкамасининг шу йил 19 февралдаги №98-сонли қарорига кўра, қишлоқ хўжалиги ишлаб чиқарувчиларининг сув тежовчи суғориш технологияларини жорий этиш бўйича харажатларининг бир қисми қоплаб берилиши керак.

Кластер бу борада йиғма жилд қилган. Далолатнома тузилиб, тумандаги керакли ташкилотларнинг рухсати ва маъқуллови олинган. Энди улар қилган харажатларнинг бир қисми субсидия ҳисобига давлат томонидан қопланиб берилиши керак. Гап туман ҳокимига бориб тақалганда эса, ҳокимлик вакиллари ҳужжатларни 20 кундан буён имзоламасдан келмоқда. Хусусан, туман ҳокимининг қишлоқ хўжалиги бўйича ўринбосари Акром Арипов ҳам далолатномани имзолаган.

Мазкур далолатнома имзоланса, Ҳукумат қарорига кўра 73,6 гектар ернинг ҳар гектарига 8 миллион сўмдан жами 588 миллион сўм субсидия давлат томонидан берилади. Яъни туман ҳокими чўнтагидан тўламайди у пулни.

Бу йил қишлоқ хўжалиги учун анча оғир йил келди. Нега Қарши туман ҳокими Мақсуда Мустафоева пахтачиликни юксалтиришга бел боғлаган инсонларга ёрдам қўлини чўзиш ўрнига очиқчасига илғор кластернинг новаторлик ишларига ҳам тўсқинлик қилмоқда? Бу нимадан дарак?

Туманга янгича технология, янгича ёндашувлар керакми, керак эмасми? Қашқадарёда илк марта қилинаётган ишни қўллаб-қувватлаш ўрнига, унга тиш-тирноқ билан тўсқинлик қилишдан муддао не?

Масала юзасидан Қарши туман ҳокимлиги ва вилоятдаги мутасаддилардан муносабат кутамиз.

Шуҳрат Шокиржонов,
Kun.uz махсус мухбири.