Apple алоҳида тушилган селфиларни бир суратга бирлаштирувчи технологияни патентлади

Apple компанияси турли жойларда бўлган одамлардан умумий сурат ҳосил қилувчи патентни рўйхатдан ўтказди.

Фото: Pinterest

Патентда суратнинг ҳосил қилиниши кетма-кетлиги баён қилинган.

Дастур умумий сурат иштирокчисини суратга олаётганда ундан олинган суратни қўллаш мумкинлигини сўрайди ёки уни рад этиб, янгитдан суратга тушишни сўраши мумкин. Шунингдек, аввал олинган суратлар ёки видеолардан лавҳалардан ҳам фойдаланиш мумкин.

Сўнгра дастур барча иштирокчилардан олинган суратларни бирлаштиради. Бунда иштирокчилар умумий суратда турадиган жойларини ўзлари танлашлари мумкин бўлади.

The Verge порталининг таъкидлашича, компания ушбу технологияга патент олиш учун 2018 йил июлда ариза топширган, бироқ уни 2020 йил июнидагина олишга муваффақ бўлди. Ушбу ғоя амалиётга қачон татбиқ қилиниши ҳозирча номаълум.