Қўшимча функционаллар
-
Тунги кўриниш
Ўзбекистон халқ ҳофизи Маҳмуджон Тожибоев вафот этди
Мақом илми ва санъатини пухта эгаллаган ижодкор, Ўзбекистон халқ ҳофизи, «Меҳнат шуҳрати» ордени соҳиби, Ўзбекистон давлат консерваторияси профессори, Ўзбек миллий мақом санъати маркази илмий ходими Маҳмуджон Тожибоев 63 ёшида оламдан ўтди. Бу маълумотни Kun.uz манбаси тасдиқлади.
Маҳмуджон Тожибоев 1957 йилда Фарғона вилояти Қува туманида туғилган. 1984 йилда Тошкент консерваториясини тугатган.
У қўшиқ айтишни дастлаб Э. Маматов, Ғ. Ҳожиқуловдан, кейинчалик хофизлик анъаналарини О. Отахонов, О. Алимаҳсумов, О. Ҳотамов ва Ф. Мамадалиевдан ўзлаштирган, созандалик сирларини эса Т. Алиматовдан ўрганган.
Маҳмуджон Тожибоев 1984 йилдан Юнус Ражабий номидаги «Мақом» ансамбли яккахони. 2000 йилдан эса Ўзбекистон давлат консерваторияси доценти сифатида фаолият кўрсатган. 2000 йилдан Ўзбекистон халқ ҳофизи.
Ижодкор репертуаридан Шашмақом («Сарахбори Наво», «Сарахбори Дугоҳ», «Мўғулчаи Сегоҳ», «Наврўзи Сабо», «Нимчўпоний» ва бошқалар) ва Фарғона-Тошкент мақом йўллари («Дугоҳ», «Чоргоҳ», «Ушшоқ», «Шаҳнози Гулёр», «Баёт» ва бошқалар), катта ашула («Ёввойи Чоргоҳ», «Ёлғиз», «Ей дилбари жононим» каби), мумтоз («Топмадим», «Асирий» ва «Лдоий», «Чорзарб», «Бозургоний») ўрин олган.
Кенг диапазонли овоз соҳибининг ижодий репертуарида шунингдек, ХХ аср бастакорлари («Келдик», «Наззора қил», К. Жабборов: «Кезарман», Ф. Тошматов: «Жоним эрурсан», М. Муртазоев: «Дилраболар», О. Нуриддинов: «Бу оқшом», О. Ҳотамов ва бошқалар) асарлари ўрин олган.
Маҳмуджон Тожибоев шоирнафас ҳофиз сифатида ижро услуби вазминлиги, лирикага мойиллиги, овоз ва чолғу мутаносиблиги билан ажралиб турган.
Марҳум ижодкор Осиё, Америка, Европа ва Шимолий Африка мамлакатларида гастролларда бўлган. 1987 йилда Юнус Ражабий номидаги Республика мақом ижрочилари танлови ғолиби бўлган.
Kun.uz марҳумнинг яқинларига ҳамдардлик билдиради.
