Қашқадарёда уруғлик картошка сифатидан норози фермерларнинг эътирозлари ўрганилди

Яккабоғ туманидаги фермерларнинг эътирозлари ортидан Kun.uz сайти Телеграм каналида Қашқадарё вилоятининг Яккабоғ туманида фермерларга чириган картошка уруғи тарқатилаётгани ҳақида материал эълон қилинганди.

Шунингдек, сайт мухбири масала юзасидан суриштирув олиб бориб, фермерлар ва «EGOIST AST» МЧЖ раҳбари фикрини ўрганган эди.

Қашқадарё вилояти ҳокимлиги ахборот хизмати вазият юзасидан таҳририятга муносабат билдирди. Маълум қилинишича, бу вақт оралиғида туман ҳокимлиги тегишли топшириқдан сўнг озиқ-овқат хавфсизлигини таъминлаш алоҳида миқёсга кўтарилган бир вақтда содир этилган ҳолат юзасидан чора-тадбирлар кўрган.

«Бу йил Яккабоғ туманида 107та фермер хўжаликлари томонидан 1000 гектар ер майдонида уруғлик картошка етиштирилади.

107та фермер хўжаликлари хақиқатан ҳам Қарши шаҳрида таъсис этилган «EGOIST AST» МЧЖ билан шартнома имзолаган. «EGOIST AST» МЧЖ томонидан фермер хўжаликларига 10 минг тоннага яқин картошка уруғлиги топширилган.

Ўрганишлар давомида аниқландики, туман фермерларига МЖЧнинг Яккабоғдаги ва Шаҳрисабз шаҳридаги «EGOIST AST»нинг омборхоналаридан уруғлик тарқатилган. Фермерларга кўра, Шаҳрисабз филиалида тарқатилган уруғлик картошканинг баъзи қисмининг сифати талабга жавоб бермаган.

Хулосадан сўнг, тузилган ишчи гуруҳи МЖЧнинг Шаҳрисабз филиалидан уруғлик картошка тарқатилган фермер хўжаликлари билан учрашиб, олинган уруғликни текширган.

Ростдан ҳам Шаҳрисабз филиалидан «Суюнов Мирза» ва «Темир Ҳабибулло ўғли» фермер хўжаликлари олган уруғлик картошка чиригани аниқланган. Шу боис, «Суюнов Мирза» фермер хўжалигига тарқатилган 6 тонна уруғлик картошканинг 500 килограмми, «Темир Ҳабибулло ўғли» фермер хўжалигидаги 9 тоннадан 1200 килограмм уруғлик картошка экинга яроқсиз деб топилиб, МЖЧ томонидан алмаштириб берилиши таъминланган.

Мазкур масала юзасидан Олий Мажлис Қонунчилик палатаси депутати Шаҳноза Холмаҳаматованинг депутатлик сўровига ижобий ечим билан жавоб қайтарилган.

Ҳозирда прокуратура ходимлари томонидан ушбу масала юзасидан суриштирув ва текширув ишлари олиб борилмоқда», дейилади вилоят ҳокимлиги ахборот хизмати муносабатида.