Бугун, 24 август куни Давлат хизматлари агентлиги брифингида никоҳдан ажрашишни қайд этиш учун қандай ҳужжатлар кераклиги маълум қилинди.
ДХA бўлим бошлиғи Камолиддин Хўжаевнинг сўзларига кўра, Ўзбекистон Республикаси Оила кодексининг 218-моддасига асосан эр-хотиннинг ўзаро розилиги бўлганда ҳамда ўртада вояга етмаган болалари ва мулкий низолари йўқлиги тасдиқланган ҳолатда никоҳдан ажралиш фуқаролик ҳолати далолатномаларини ёзиш органига берган аризаларига асосан қайд этилади.
Эр-хотиндан бирининг аризаси бўйича никоҳдан ажралишни қайд этиш учун фуқаролик ҳолати далолатномаларини ёзиш органига қуйидагилар тақдим этилади:
- эр (хотин)нинг муомалага лаёқатсиз ёхуд бедарак йўқолган деб топилгани тўғрисида суднинг қонуний кучга кирган ҳал қилувчи қарори;
- эр (хотин) уч йилдан кам бўлмаган муддатга озодликдан маҳрум қилингани тўғрисида суднинг қонуний кучга кирган ҳукмидан кўчирма, шунингдек, судланган эр (хотин)нинг ўртадаги болалари ва мол-мулки юзасидан низоси йўқлиги тўғрисидаги тилхат.
«Никоҳдан ажралиш ариза берувчиларнинг яшаш жойидаги ФҲДЁ органига ариза берилган кундан бошлаб уч ой муддат ўтгач қайд этилади», деди ДХA бўлим бошлиғи.
