Олимнинг таъкидлашича, Испанияда 15 майдан кейин бунгача бўлган даврга нисбатан коронавирусга чалинганлар кўпроқ аниқланган. Бу эса иккинчи тўлқин юз бераётганидан дарак беради. Иккинчи тўлқин биринчисига нисбатан ўзгача кечмоқда: бунда инфекция кўпроқ ёшларда қайд қилинмоқда ва касаллик вирус кучсизлангани сабабли енгил шаклда ўтмоқда. Мутахассиснинг айтишича, аввал ташхисларнинг катта қисми шифохоналарда қўйилган ва бунда касалланганлар асосан катта ёшлилар бўлган. Ҳозирда эса оммавий тестлар ўтказилаётгани эвазига беморлар касалликнинг эрта босқичида аниқланмоқда. Шу сабабли ташхисларнинг аксарияти шифохоналардан ташқарида қўйилмоқда.
Олимнинг таъкидлашича, айни вақтда вазиятнинг қандай тус олишини прогноз қилиш қийин, бироқ қатъий карантинга қайтишга ҳожат йўқлигига умид бор. Чунки хавф гуруҳига кирувчи одамлар касалликка чалинишдан қўрқиб, алоқаларни чекламоқдалар ва ўзларини ҳимоя қилмоқдалар.
25 августда Испания бош вазири Педро Санчес мамлакатда вирус билан боғлиқ вазият “хавотир уйғотаётганини”, бироқ март ойидаги каби оғир эмаслигини айтган.
Испанияда пандемия бошидан бери касалланганлар сони 412 мингдан ошди, 30 мингга яқин одам вирусдан вафот этди. Айни вақтда Испаниянинг бутун ҳудуди бўйлаб мажбурий ниқоб тақиш ва бошқа санитар чоралар амал қилмоқда.
