Чортоқ туманини ижтимоий-иқтисодий ривожлантириш бўйича ҳукумат қарори қабул қилинади

Президентнинг “2020-2022 йилларда Наманган вилояти Чортоқ туманини ижтимоий-иқтисодий ривожлантириш орқали камбағалликни қисқартириш чора-тадбирлари тўғрисида”ги қарори лойиҳаси эълон қилинди.

Қуйидаги асосий устувор йўналишларни назарда тутувчи Наманган вилоятининг Чортоқ туманини 2020-2022 йилларда ижтимоий-иқтисодий ривожлантириш орқали камбағалликни қисқартириш чора-тадбирлар дастури тасдиқланади:

аҳоли бандлиги даражасини ошириш ҳамда ишсизлик даражасини пасайтириш мақсадида тадбиркорликни ривожлантириш, саноат, хизмат кўрсатиш ва қишлоқ хўжалиги тармоқларини жадал ривожлантириш;

муҳандислик-коммуникация, хусусан ичимлик суви ва канализация тармоқларини қуриш, автомобиль йўллари ва ички кўчалар ҳолатини яхшилаш, шунингдек кўп хонадонли уй-жойлар қуриш;

ижтимоий соҳа муассасаларини замонавийлаштириш, уларни зарур жиҳозлар билан таъминлаш, мутахассислар малакасини ва хизмат кўрсатиш маданиятини ошириш ҳамда бу соҳада хусусий сектор улушини кўпайтириш;

суғориладиган ерларнинг мелиоратив ҳолатини яхшилаш ва фойдаланишдан чиққан ерларни ўзлаштириш орқали қишлоқ хўжалиги маҳсулотлари етиштиришни жадал ривожлантириш.

Қуйидагилар:

2020-2022 йилларда Наманган вилояти Чортоқ туманида қиймати 1,1 трлн. сўмга тенг 70 та саноат, 73 та хизмат кўрсатиш ва 86 та қишлоқ хўжалиги соҳаси ҳамда уларда 5 мингга яқин иш ўринларининг яратилишини кўзда тутувчи инвестиция лойиҳаларининг манзилли рўйхати;

2020-2022 йилларда Наманган вилояти Чортоқ туманида йўл-транспорт ҳамда муҳандислик-коммуникация инфратузилмасини ривожлантириш дастурининг манзилли рўйхати;

2020-2022 йилларда Наманган вилояти Чортоқ туманида мактабгача таълим ёшидаги болалар қамровини 65,6 фоизга етказиш мақсадида 15 та мактабгача таълим муассасасини, қўшимча 1200 та ўқувчи ўрни яратиш ҳисобига навбатлилик коэффициентини 1,2 га пасайтириш учун 12 та умумий ўрта таълим мактабларини, аҳолига хизмат кўрсатиш қуввати ва сифатини ошириш учун 12 та соғлиқни сақлаш муассасаларини ҳамда 6 та бошқа ижтимоий соҳа объектларини қуриш, реконструкция қилиш ва капитал таъмирлаш бўйича лойиҳаларнинг манзилли рўйхати;

2020-2022 йилларда Наманган вилояти Чортоқ тумани Саркор, Мустақиллик, А.Навоий, Дўстлик, Зафар Диёр ва Обод Диёр МФЙда 3 минг 109 та хонадонга мўлжалланган 50 та кўп квартирали уй-жойлар қурилишининг асосий кўрсаткичлари;

2020-2022 йилларда Наманган вилояти Чортоқ туманида 2 минг 740 та хонадондаги ишсиз фуқаролар бандлигини таъминлаш бўйича 12 млрд.сўм субсидия маблағлари ажратиш асосида енгил конструкцияли иссиқхона қуришнинг прогноз кўрсаткичлари;

2020-2022 йилларда Наманган вилояти Чортоқ туманида 7 минг 783 нафар фуқароларнинг ўзини ўзи банд қилиш прогноз кўрсаткичлари;

2020-2022 йилларда Наманган вилояти Чортоқ туманида фойдаланилмаётган 2 минг 193 гектар ер майдонларини ўзлаштириш параметрлари;

Наманган вилояти Чортоқ туманида “Темир дафтар”га киритилган 1 минг 668 та камбағал ва муҳтож оилаларнинг 2 минг 720 нафар аъзоларининг бандлигини таъминлаш, доимий даромад манбайини яратиш параметрлари тасдиқланади.

Президентнинг 2019 йил 30 июлдаги ПҚ-4409-сонли “Халқаро тикланиш ва тараққиёт банки иштирокида “Ўрта шаҳарларни комплекс ривожлантириш” лойиҳасини амалга оширишга доир чора-тадбирлар тўғрисида”ги қарорида Чортоқ тумани Чортоқ шаҳрида сув таъминоти ва канализация тизимини реконструкция қилиш, кўчаларни ёритиш тизимини яхшилаш, пиёдалар ва велосипед эко-йўлакчасини қуриш, автомобил кўприги (йўл ўтказгич)ни реконструкция қилиш ва бошқа тадбирлар кўзда тутилган.

Ўзбекистон Республикаси Иқтисодий тараққиёт ва камбағалликни қисқартириш вазирлиги, Инвестиция ва ташқи савдо вазирлиги, Молия вазирлиги ҳамда Наманган вилояти ҳокимлиги билан биргаликда Жаҳон банкининг халқаро тараққиёт ассоциацияси ва Осиё инфратузилмавий инвестициялар банки иштирокида “Қишлоқ инфратузилмасини ривожлантириш” лойиҳаси доирасида ажратиладиган кредит маблағлари ҳисобидан Наманган вилояти Чортоқ туманининг қишлоқ ҳудудларида ижтимоий соҳа ва базавий инфратузилмани ривожлантириш тадбирларига зарур маблағ ажратиш чораларини кўради.

Ўзбекистон Республикаси Вазирлар Маҳкамаси, Иқтисодий тараққиёт ва камбағалликни қисқартириш вазирлиги ва Наманган вилояти ҳокимлигининг Чортоқ туман ҳокими ўринбосарлари вазифаларини пухта таҳлил этган ҳолда, уларнинг айримларини қисқартириш ҳисобига ҳокимиятнинг мутлақо янги, бозор иқтисодиёти талабларига мос замонавий тузилмасини татбиқ этиш таклифи маъқулланади ҳамда Наманган вилояти Чортоқ тумани ҳокимлиги бошқарув аппаратининг органларининг тузилмаси тасдиқланади.

Қуйидагилар тегишлича Чортоқ тумани ҳокимлиги бўйсунувига ўтказилади:

Чортоқ тумани иқтисодий тараққиёт ва камбағалликни қисқартириш бўлими;

Чортоқ туман ҳокимлиги молия бўлими;

Чортоқ тумани инвестициялар ва ташқи савдо бўлими;

Чортоқ тумани бандликка кўмаклашиш маркази;

Чортоқ тумани қурилиш бўлими;                                  

Чортоқ тумани уй-жой коммунал хизмат кўрсатиш бўлими.

Ўзбекистон Республикаси Маҳалла ва оилани қўллаб-қувватлаш вазирлиги Наманган вилояти ҳокимлиги билан биргаликда 2021-2022 йилларда Чортоқ туманининг 20 та, шундан 2021 йилда камида 10 та маҳалла фуқаролар йиғинларига маъмурий бино қуриш учун “Обод ва хавфсиз маҳалла” жамғармасидан 7,0 млрд. сўм маблағ ажратилишини таъминлайди.

Наманган вилояти ҳокимлиги, Инвестициялар ва ташқи савдо вазирлиги ва “Ўзтўқимачиликсаноат” уюшмасининг Наманган вилоятида тўқимачилик брендини яратиш мақсадида Чортоқ туманида 100 гектар майдонда тўқимачиликка ихтисослашган эркин иқтисодий зонасини ташкил этиш таклифи маъқулланади.

Қуйидаги кичик саноат зоналарини:

“Ўзбекнефтгаз” АЖ билан биргаликда Чортоқ тумани А.Навоий МФЙда жойлашган “Андижоннефт” АЖга қарашли бир неча йилдан буён бўш турган 2,0 гектар ер майдонини ва 10,0 минг квадрат метр бўлган бино-иншоотларни бозор нархларида баҳолаб, Чортоқ тумани ҳокимлиги захирасига ўрнатилган тартибда ўтказган ҳолда унинг негизида “Чортоқ” кичик саноат зонасини;

зарур коммуникация тармоқлари (электр энергия, табиий газ, темир йўл, автомобиль йўли) мавжудлигини ҳисобга олиб, “Ласкидон” МФЙ ҳудудидаги 3,2 гектар ер майдонида “Ласкидон” кичик саноат зонасини;

туманнинг “Бешкапа” МФЙ ҳудудидаги “Ойқирон миришкорлари” массивининг 7 гектар ер майдонида зарур коммуникация тармоқларини ташкил этган ҳолда “Ойқирон” кичик саноат зонасини ташкил этиш тўғрисида Вазирлар Маҳкамасига таклиф киритадилар.

Наманган вилояти ҳокимлигига Иқтисодий тараққиёт ва камбағалликни қисқартириш вазирлиги билан биргаликда президентнинг 2020 йил 14 июлдаги “Ҳар бир оила - тадбиркор” дастурини ҳамда Наманган вилоятидаги кичик саноат зоналарини ривожлантиришни молиялаштиришга доир қўшимча чора-тадбирлар тўғрисида”ги ПҚ-4782-сонли қарорида Наманган вилояти ҳокимлигига ажратиладиган 50 миллион АҚШ доллари ҳисобидан туманда саноат тармоғи ривожланмаганлигини эътиборга олиб ва тадбиркорларни қўллаб-қувватлаш мақсадида, Чортоқ тумани “Бешкапа” МФЙ ҳудудидаги 7 гектар майдонда ташкил этиладиган “Ойқирон” кичик саноат зонасида ишлаб чиқариш майдонлари ва бино-иншоотларини қурилишига маблағ йўналтириш топширилади.

Келгусида мазкур кичик саноат зонасида ташкил этилган ишлаб чиқариш бинолари ва майдонларини тадбиркорларга сотиш ёки ижарага берган ҳолда бўлиб тўлаш тажрибасини жорий этади.

Олий ва ўрта махсус таълим вазирлиги, Бандлик ва меҳнат муносабатлари вазирлиги, Наманган вилояти ҳокимлиги билан биргаликда Чортоқ тумани “Наманган” МФЙда жойлашган Чортоқ туман 1-сон касб-ҳунар мактабида ишсиз ёшлар, хотин қизлар ҳамда ўзининг касбий малакасини оширмоқчи (янги касб эгалламоқчи) бўлган фуқаролар учун қисқа муддатли ўқув курсларини ташкил этади.

Молия вазирлиги қисқа муддатли ўқув курсларини ташкил этиш билан боғлиқ сарф-харажатларга Ўзбекистон Республикаси Бандлик ва меҳнат муносабатлари вазирлигининг асосланган ҳисоб-китобларига кўра маблағ ажратилишини таъминлайди.

Ўзбекистон Республикаси Қишлоқ хўжалиги вазирлиги, Иқтисодий тараққиёт ва камбағалликни қисқартириш вазирлиги, Боғдорчилик ва иссиқхона хўжалигини ривожлантириш агентлиги Наманган вилояти ҳокимлиги билан биргаликда 2020-2022 йилларда Чортоқ туманини мева-сабзавотчиликка ихтисослаштириш, кам ҳосилли ғалла ва пахта майдонларини қисқартириш ҳисобига 2-3 турдаги экспортбоп қишлоқ хўжалиги маҳсулотларини етиштириш, жумладан 1000 гектарида саноат усулида ва томчилатиб суғориш технологиясини жорий қилиб, интенсив боғ-токзорларни барпо этиш бўйича аниқ ҳисоб-китоблар асосида таклифлар ишлаб чиқиб, Вазирлар Маҳкамасига киритади.

Бунда, Қишлоқ хўжалиги вазирлиги, Инвестициялар ва ташқи савдо вазирлиги, Иқтисодий тараққиёт ва камбағалликни қисқартириш вазирлиги қисқартирилган майдонларда мева-сабзавот етиштириш, сақлаш, қайта ишлаш инфратузилмасини ривожлантириш учун инвестицияларни жалб этиш, маҳсулотлар бозорини топиш бўйича аниқ дастурлар ишлаб чиқилишини ташкил этади.

Наманган вилояти ҳокимлигининг президентнинг 2019 йил 11 декабрдаги ПҚ-4549-сонли “Мева-сабзавотчилик ва узумчилик тармоғини янада ривожлантириш, соҳада қўшилган қиймат занжирини яратишга доир қўшимча чора-тадбирлар тўғрисида”ги қарорнинг 4-бандига мувофиқ тижорат банклари ҳамда Боғдорчилик ва иссиқхона хўжалигини ривожлантириш агентлиги билан биргаликда Наманган вилояти Чортоқ туманида ҳосилдорлиги паст бўлган пахта-ғалладан бўшаган майдонларда, шунингдек яроқсиз боғ-токзорлар жойлашган ерларда интенсив боғ-токзорлар барпо этиш ва уларни аҳолига лизинг асосида, жумладан тижорат банклари ва лизинг компаниялари орқали бериш тадбирларини ташкил этиш таклифи маъқулланади.

Ўзбекистон Республикаси Қишлоқ хўжалиги вазирлиги, Сув хўжалиги вазирлиги, Давлат геология ва минерал ресурслар қўмитаси, Ўрмон хўжалиги қўмитаси, Ер ресурслари, геодезия, картография ва давлат кадастри қўмитаси Наманган вилояти ҳокимлиги билан биргаликда Чортоқ туманида фойдаланилмаётган 2 минг 193 гектар ер майдонини ўзлаштириш ва тупроқ-иқлим шароитига мос экин турларини жойлаштириш чораларини кўради.

Бунда, Ўзбекистон Республикаси Бандлик ва меҳнат муносабатлари вазирлиги, Ўзбекистон Фермер, деҳқон хўжаликлари ва томорқа ер эгалари кенгаши жамғармалари ҳисобидан Чортоқ туманида тик қудуқларни қазиш ва сув таъминотини яхшилаш, иссиқхона ва интенсив боғ-токзорларга ажратилаётган субсидиянинг 2020 йилдаги миқдорини 2 баробарга оширади.

Ўзбекистон Республикаси Бандлик ва меҳнат муносабатлари вазирлиги, Марказий банки Наманган вилояти ҳокимлиги билан биргаликда камбағал оилаларни кооперация асосида бириктириш орқали Чортоқ тумани “Баландадир” массивида жойлашган “Голден Натс” МЧЖ кластери томонидан ташкил этилган иссиқхона майдонини кенгайтириш ва оилавий тадбиркорликнинг бошқа йўналишлари ҳисобига 10 минг нафар кам таъминланган оилалар аъзоларининг бандлигини субсидия ажратиш йўли билан таъминлаш чораларини кўради.

Наманган вилояти ҳокимлиги Чортоқ туманида ишсиз аҳолини вақтинчалик иш билан таъминлаш мақсадида “Голден Бредер” МЧЖ томонидан қиймати 3,6 млн. доллар бўлган “Меҳнат гузари” ҳамда қишлоқ хўжалиги маҳсулотлари тайёрлаш ва экспорт қилиш учун “Логистика маркази”ини ташкил этиш лойиҳаси маъқулланади ва зарур ер майдонини ажратиш чораси кўрилади.

Ўзбекистон Республикаси Иқтисодий тараққиёт ва камбағалликни қисқартириш вазирлиги, Молия вазирлиги Наманган вилоят ҳокимлиги билан биргаликда Чортоқ туманининг бош режасига асосан 2020-2022 йилларда 50 та 5-7 қаватли уй-жойлар қуриш чораларини кўради.

Бунда, қуриладиган 5 та кўп қаватли уйдаги хонадонларни давлат бюджетидан субсидия бериш тартибига мувофиқ кам таъминланган, уй-жойга муҳтож оилаларга ажратиш кўзда тутилади.

Туризмни ривожлантириш давлат қўмитаси, Наманган вилояти ҳокимлиги, Ўзбекистон Республикаси Фанлар Академияси Маданият вазирлиги билан биргаликда бир ой муддатда Султон Увайс Қароний зиёратгоҳи ва Биби Наима она мақбарасини кенг тарғиб қилган ҳолда маънавият-маърифат марказига айлантириш, ушбу объектларни туристик маршрутлар арзон ва қулай автобус қатновини йўлга қўйиш, ташриф буюрадиган маҳаллий ва хорижий туристлар кенг танишиши учун Султон Увайс Кароний ва Биби Наима она тўғрисида тарихий маълумотларни турли тилларда тайёрлаб, мажмуада жойлаштириш ва ҳудудда ўриндиқлар сонини кўпайтириш бўйича аниқ чора-тадбирларни амалга оширади.