Бу йил Европа чемпионатларида ёзги трансферлар муддати коронавирус туфайли ўзгарган. Масалан, Англияда янги футболчиларни қайддан ўтказиш АПЛнинг ўтган мавсуми якунланиши билан – 25 июлдаёқ бошланганди. Германияда ёзги трансферлар ойнаси 15 июлда, Испанияда — 4 август куни очилди. Италияда эса янги футболчиларни рўйхатдан ўтказиш фақат 1 сентябрдан бошланди. Аллақачон янги мавсум старт олган Лига 1 чемпионатида эса маҳаллий трансферлар 8 июлдаёқ бошланганди. Европа клублари янги футболчиларни таркибга қўшиб олиши мумкин бўлган сўнгги муддат сифатида 5 октябрь санаси келтирилмоқда. Қуйида Европада ёзги трансферлардаги топ-15 трансфер келтирилган.
Лерой Сане («Манчестер Сити»дан «Бавария»га) Трансфер қиймати: 60 млн евро ва бонуслар.
Лерой Сане / Фото: fcbayern.com
Англиядаги тўрт мавсумдан кейин Лерой Сане яна Германияга қайтди ва «Бавария» билан беш йиллик шартномага имзо чекди. Трансфер ҳақида эълон қилинишидан олдин германиялик футболчининг янги клуби футболкасидаги сурати мюнхенликлар сайтининг арабча талқинида пайдо бўлганди, бунинг учун клуб дарҳол «Манчестер Сити»дан узр сўради. Ҳанс-Дитер Флик ушбу 24 ёшли футболчи билан яхши алоқаларга эга. Улар Сане Германия U21 жамоасига чақирилган вақтларда танишишган. Яқинда Лерой «Шальке»далигидаёқ «Бавария»га ўтиши мумкин бўлганини айтди. Аммо таркибда Франк Рибери ва Арьен Роббен борлиги туфайли ёш вингер Мюнхенга ўтишни кейинга қолдирган. Сане янги клубида 10-рақамли футболкани олди ва «Бавария» билан ЕЧЛда зафар қучиш ниятида эканини билдирди.
Тимо Вернер («Лейпциг»дан «Челси»га) Трансфер қиймати: 53 млн евро.
Фото: Steve Bardens/Getty Images
Тимо Вернернинг лондонликлар клубига ўтиши бўйича жараён етарлича узоқ вақт давом этди. 24 ёшли футболчига ўтган мавсумда «Ливерпуль» ҳам даъвогар эди, аммо мерсисайдликлар коронавирус келтирган инқироз туфайли немис футболчиси трансферидан воз кечишди. «Челси» эса ўз мақсадига эришиб, Вернер билан беш йиллик шартнома имзолади. Тимо Лондон клубига ўтишига асосий сабабчи Фрэнк Лэмпард бўлганини айтди. Футболчи «Челси»нинг янги эрасидаги муҳим футболчи бўлиш истаги ҳақида гапирган. Шу кунларда у «Брайтон»га қарши ўртоқлик учрашувида 4-дақиқада гол урди - бу унинг янги клуби сафидаги илк голи бўлди.
Мавзуга оид
Мауро Икарди («Интер»дан «ПСЖ»га) Трансфер қиймати: 58 млн евро ва бонуслар.
Фото: Dean Mouhtaropoulos/Getty Images
Французлар клуби Каванидан кўра Икардини олиб қолишни маъқул кўрди. Парижликлар бир йиллик ижарадан кейин Мауронинг трансфер ҳуқуқини «Интер»дан сотиб олишга қарор қилишди. Муддатидан олдин якунланган Лига 1 мавсумида Икарди 20 ўйин ўтказиб, 12 гол урди ва 3 голли узатмага муаллифлик қилди. Энди у 4 йиллик шартномага ва йилига 8 миллион евролик маошга эга. 27 ёшли аргентиналик «ПСЖ»га ўтишини совринлар сари қадам деб баҳолаган. Футболчи Эдинсон Каванидан бўш қолган 9-рақамли футболкани ўзиники қилган.
Артур («Барселона»дан «Ювентус»га) Трансфер қиймати: 82 млн евро ва бонуслар.
Артур / Фото: juventus.com
Бразилиялик футболчи каталонияликлар клубини можаро билан тарк этди. Июнь ойи охирида «Барселона» Артур «Ювентус»га йўл олишини тасдиқлади. Аммо ҳали мавсум якунланмаган ва каталонияликлар Чемпионлар лигаси ўйинларида иштирок этиши керак эди. Коронавирус танаффусидан кейин футболчи жамоа машғулотларига келмади. Президент Жозеп Бартомеу 24 ёшли футболчи унга қўнғироқ қилиб, Бразилияда қолишини айтганини маълум қилди. Туринга кетиш арафасида яримҳимоячи ноқулай вазиятга тушиб қолди: у маст ҳолатда «Феррари» билан ЙТҲга учради. Жамоа ўйинида қатнашиш учун келганида эса уни стадионга киритишмади. Туринликларнинг янги бош мураббийи Андреа Пирло Артур ҳақида илиқ фикрлар билдириб, у «Ювентус» учун яримҳимоя чизиғининг бир неча позицияларида ҳаракатлана оладиган керакли футболчи бўлишига ишонч билдирган.
Миралем Пьянич («Ювентус»дан «Барселона»га) Трансфер қиймати: 65 млн евро ва бонуслар.
Миралем Пьянич / Фото: Marco Luzzani/Getty Images
Артур ўрнига тескари йўналишда «Ювентус»дан Миралем Пьянич Барселонага йўл олди. Босниялик футболчи каталонлар клуби билан тўрт йиллик шартнома тузган, унинг бадал пули сифатида 400 млн евро белгилаб қўйилган. Артурдан фарқли равишда 30 ёшли футболчи Чемпионлар лигасида охиригача ўйнаб берди ва туринлик мухлислар билан ҳаяжонли тарзда хайрлашди. Пьянич «Ювентус»ни фақат «Барселона» каби клуб учун тарк этиши мумкин бўлганини маълум қилган. У клубдан кетаётгани муносабати билан хайрлашув зиёфати уюштирган.
Виллиан («Арсенал»га эркин агент сифатида)
Виллиан / Фото: arsenal.com
Бразилиялик футболчи «Челси» билан янги шартнома бўйича келиша олмади. Кўклар клуби раҳбарияти ёши ўтиб қолган футболчисига икки йиллик шартнома таклиф қилди, аммо Виллиан клубда кўпроқ муддатга қолишни истади. Август ойи бошида 32 ёшли яримҳимоячида Лондоннинг бошқа бир клуби «Арсенал»га ўтиш варианти пайдо бўлди ва «Челси»ни эркин агент сифатида тарк этди. Виллиан «канонирлар» билан уч йиллик шартнома имзолаган. Daily Mail маълумотига кўра, бразилиялик футболчи янги клубида ҳафтасига 220 минг фунт олади. Футболчининг ўзи Артета шахсан унинг трансфери билан шуғуллангани, у клуб билан уч йил ичида Чемпионлар лигасида ғалаба қозонишни исташи ҳақида гапирган.
Виктор Осимхен («Лилль»дан «Наполи»га) Трансфер қиймати: 80 млн евро ва бонуслар.
Виктор Осимхен / Фото: sscnapoli.it
Нигериялик ҳужумчи «Лилль» таркибида ёрқин мавсум ўтказиб, 38 ўйинда 18 гол урди. Ёзда унга Европанинг кўплаб клублари қизиқиш билдиришди, аммо фақат «Наполи» французлар клуби талаб қилган 80 млн еврони тўлашга рози бўлди. Осимхеннинг «Наполи»га трансфери африкалик футболчилар орасидаги энг қимматбаҳо трансферлардан бири бўлди. Ҳозирда бу рекорд ивуарлик ҳужумчи Николя Пепега тегишли. Ўтган ёзда у айнан «Лилль»дан «Арсенал»га 80 миллион евродан ортиқроқ маблағ эвазига ўтганди. Неаполитанликлар билан Виктор йилига 4,5 миллион евродан маош кўзда тутилган 5 йиллик шартнома имзолаган. «Наполи» президенти Аурелио Де Лаурентис Corriere dello Sport нашрига берган интервьюсида, клуб аввалига «Зенит»нинг эронлик ҳужумчиси Сардор Озмунга қизиқиш билдиргани, аммо охир-оқибат Осимхен танловида тўхтагани ҳақида айтиб берган.
Ашраф Ҳакими («Реал»дан «Интер»га) Трансфер қиймати: 40 млн евро.
Ашраф Ҳакими / Фото: twitter.com/Inter
«Реал»нинг ушбу тарбияланувчиси ўз клубида ўйнаб кета олмади (мадридликларнинг асосий жамоаси сафида у жами 17 ўйинда майдонга тушган). Сўнгги икки мавсумни Ҳакими Дортмунднинг «Боруссия» клубида ижара асосида ўтказди. Айнан шу клубда марокашлик футболчи ўзини кўрсатди ва ўзига қизиқиш уйғотди. Немислар клуби уни трансфер қилишга жазм этмади, «Интер» эса жиддий таклиф билан чиқди. Улар Ашрафга йилига 5 млн евро тўлаш назарда тутилган 5 йиллик шартнома таклиф қилишди ва Ҳакими бунга рад жавоби бера олмади. Миланликлар клубига трансфер амалга ошгач, унинг агенти Алехандро Камано мижози нега «Реал»дан кетганини тушунтирди. Маълум бўлишича, Зидан ҳеч қачон Ҳакими ҳақида ўйламаган ва унинг келажагини у билан ҳатто телефон орқали ҳам муҳокама қилмаган. Шу туфайли ёш футболчи Италияга йўл олишга ва Антонио Конте жамоасига қўшилишга қарор қилган.
Дани Парехо («Вильярреал»га эркин агент мақомида)
Дани Парехо / Фото: villarrealcf.es
Кўплаб фанатлар учун Дани Парехонинг «Валенсия»дан кетиши кутилмаган ҳол бўлди. Испаниялик яримҳимоячи 9 йилдан буён «кўршапалаклар» сафида ўйнаб келаётганди, у жамоа етакчиси ва сардори эди. Аммо клубдаги молиявий инқироз туфайли президент Питер Лима жамоа етакчиларини сотиб юборишга ва ойлик маошларни сезиларли даражада қисқартиришга мажбур бўди. Шартномаси муддати шусиз ҳам якунланган Парехо эса «Вильярреал»дан қўним топди. Франсис Коклен ҳам испаниялик футболчи билан бирга «сариқ субмарина» сафига йўл олди.
Ферран Торрес («Валенсия»дан «Манчестер Сити»га) Трансфер қиймати: 27 млн евро ва бонуслар.
Ферран Торрес / Фото: mancity.com
«Валенсия»дан кетган яна бир етакчи футболчи Ферран Торрес бўлди. Аммо клуб раҳбарияти унинг трансферидан яхшигина маблағ ишлаб олишди. «Манчестер Сити» 20 ёшли испанияликни «Бавария»га кетган Лерой Саненинг ўрнини тўлдириш учун сотиб олди. Торрес «шаҳарликлар» билан беш йиллик шартнома тузди ва Хосеп Гвардиола шаънига мақтовлар ёғдирди. Ёш футболчи ҳамиша «Ман Сити» устози билан ишлашни орзу қилганини айтди. Энди Ферран мураббийлар штабига чиндан ҳам Саненинг муносиб ўринбосари бўлишини исботлаб бериши керак.
Бен Чиллуэлл («Лестер»дан «Челси»га) Трансфер қиймати: 50,2 млн евро
Ёзнинг энг фаол жамоаси бўлаётган «Челси» ҳужум чизиғини Ҳаким Зиёш ва Тимо Вернер билан тўлдиргач (Германиядан яна бир ҳужумкор футболчи Кай Ҳавертц ҳам келиши кутилмоқда), эътиборини ҳимоя чизиғини кучайтиришга қаратди. Лэмпард истаганига эришди ва унда чап қанот ҳимояси ишончли қўлларда - клубда АПЛнинг энг кучли ҳимоячиларидан бири, Англия терма жамоасига номзод бўлган яна бир футболчи пайдо бўлди.
«Лестер» «Челси»га ЕЧЛ йўлланмасини бой бериб қўйгани ҳам ушбу трансферни осонлаштирди - 23 ёшли футболчи шу орқали «тулкилар» раҳбариятига босим ўтказиб, ўзини қўйиб юборишни сўради.
Родриго («Валенсия»дан «Лидс»га) Трансфер қиймати: 30 млн евро + 10 млн евролик бонуслар
Марсело Бьелса АПЛга «Лидс» билан Чемпионшип ғолиби сифатида чиқди, аммо бир қатор трансферлар билан таркибни кучайтирмасдан АПЛда жон сақлаб қолиш осон эмас. Шунинг учун,«Лидс» ўз тарихидаги энг қимматбаҳо трансферни амалга оширди. Дарвоқе, Родриго муқаддам Англияда тўп сурган, айни вақтда 29 ёшда бўлган ҳужумчи 10 йил аввал «Болтон»да камтаргина мавсум ўтказган: 17 ўйин ва атиги бир гол.
Ёзги трансферлар давомида «Лидс» «Вулвз»дан ўнг қанот вингери Элдер Коштуни 17,7 млн еврога, «Фрайбург»дан марказий ҳимоячи Робин Кохни 13 млн еврога сотиб олди. «Валенсия» эса яқин орада ЕЧЛ учун курашда иштирок этмайди. Ферран Торрес «Сити»га, Парехо ва Коклен «Вильярреал»га йўл олган, Гарай эркин агент, Родриго «Лидс»да.
Мэтт Доэрти («Вулверҳэмптон»дан «Тоттенҳэм»га) Трансфер қиймати 16,8 млн евро
Доэртининг трансферидан кейин кичик шов-шув рўй берди, у 2012 йилда эҳтиёткорсизлик билан иккита твит ёзгани маълум бўлди: 1) «Арсенал»ни севаман ва ҳамиша севиб қоламан», 2) «Ҳа, мен «Арсенал»нинг катта фанатиман. «Тоттенҳэм» эса буни тақдимот роликига олиб чиқди: Доэрти хижолатомуз кўринишда икки постини ҳам ўчирди.
Катта трансфер эмас, аммо сифатли трансфер. Барча параметрларни ҳисобга олган — нарх, сифат, тажриба, зарур позиция. «Тоттенҳэм» ўнг қанот учун рақобатни кучайтирди (бу позицияда фақат Серж Орье ҳаракатланаётганди) ва ўйинда ранг-баранглик ошишини таъминлади. Доэрти уч марказий ҳимоячи билан ўйналганида бутун флангни ёпиши мумкин. Ҳарт, Ҳегбёрг ва Доэртининг трансфери, шунингдек, Ло Чельсонинг трансфер ҳуқуқи тўлиқ сотиб олиниши «Челси»нинг харидлари олдида камтар кўринади, аммо «Тоттенҳэм» учун асосийси — етакчиликни сақлаб қолиш ва Моуриньога мос футболчиларни олиб келиш. Клуб ЕЧЛ учун курашади.
Тиаго Силва («ПСЖ»дан «Челси»га эркин агент мақомида)
«ПСЖ» ўзининг кўп йиллик футболчисига янги шартнома таклиф қилмади, «Челси» эса Силва клуб учун бир йил давомида ўйнаб бериши мумкин деб ҳисоблади. Сентябрь ойида у 36 ёшга чиқади, аммо унинг тажрибаси ва даражаси барчага аён. Лэмпард энди марказий ҳимояда кўпроқ ротация имконига эга бўлади. Клуб ўтган ҳафта яна бир марказий ҳимоячини текинга қўлга киритди. «Ницца»дан 21 ёшли Маланг Сарр эркин агент сифатида Лондонга келди. Ҳали ёш бўлишига қарамай ушбу футболчи Франция чемпионати ва Европа Лигаси ўйинларида жами 102 ўйинда майдонга тушишга улгурган ва жамоасида сардорлик боғичини таққан. 2016 /17 йилги мавсумда унинг узатмалари аниқлиги — 89,8 фоизни ташкил этган. Бу 21 ёшгача бўлган марказий ҳимоячилар орасида иккинчи энг яхши кўрсаткичдир (50+ ўйин). Энди «Челси»да бир дарвозабон муаммосини ҳал қилиш қолди.
Мадридликлар сафидаги яна бразилиялик футболчи ҳали асосий таркибга тайёр эмас ва клуб ушбу 18 ёшли истеъдодни Европа яшил майдонларида тажриба тўплаш учун жўнатди. Бразилияда «янги Кака» лақабини олишга улгурган футболчи ҳали катталар футболида ўзини кўрсатишга улгурмаган.
У икки йил давомида «Боруссия Дортмунд» клубида ижара асосида ўйнайди (Ҳакими ортидан). Немислар клуби унга қанчалик кўп ўйин амалиёти бериши маълум эмас, чунки ҳимоядан фарқли равишда ҳужум чизиғида рақобат катта. Ушбу трансфер қай даражада ўзини оқлашини олдиндаги мавсумда кўриб оламиз.
