Дексаметазон президентга шунинг учун тайинланганки, сўнгги кун давомида унинг қонида кислород даражаси икки марта кескин пасайиб кетган.
Доктор Конли Трампга қўшимча кислород қабул қилиш тавсия этилганини айтиб ўтган.
Конлининг сўзларига кўра, президент душанба куниёқ шифохонадан чиқарилиши, у даволанишни Оқ уйда давом эттириши режалаштирилмоқда.
- Дексаметазон – ўтган асрнинг 60 йилларидан бери яллиғланишга қарши восита сифатида фойдаланиб келинадиган стероид. У онкологияда ҳам қўлланади. Ушбу дори воситасининг ижобий таъсири фақат касалликнинг оғир босқичида бўлган беморларда кузатилган.
Трампнинг касаллиги ҳақида асосий маълумотлар
- Шанба куни Трампнинг шифокори президентнинг ҳолати ҳақида «эҳтиёткорона оптимизм» билан фикр билдирганди. У беморнинг хавф остида эмаслигини таъкидлаганди.
- Бу баёнот ортидан касалхона ва Оқ уйдан Трампнинг қачон касаллангани санасини чалкаштириб юборувчи турлича маълумотлар тарқалди.
- Трампни даволовчи шифокорнинг сўзлари шанба куни президент маъмурияти раҳбари Марк Мэдоуз айтган сўзлар билан мос эмасди. Медоуз Трампнинг сўнгги 24 соатдаги ҳолати «катта хавотир туғдиргани», кейинги 48 соат ҳал қилувчи палла бўлиши ҳақида гапирди. У президентга ташхис қўйилганидан кейин унинг аҳволи кескин ёмонлашгани, ҳарорати кўтарилиб, қондаги кислород миқдори кескин тушиб кетгани ҳақида қўшимча қилди.
- Якшанба куни Трамп видеомурожаат қилиб, ўзини нисбатан яхшироқ ҳис қилаётгани ҳақида гапирди.
Трамп қандай тадбирларни ўтказиб юборади?
АҚШдаги қоидаларга кўра, Трамп 14 кун давомида карантин режимига ўтиши керак, шунинг учун у 15 октябрь куни Демократик партиядан президентликка номзод Жо Байден билан теледебатда иштирок эта олмаслиги мумкин.
Олдинда эса унинг икки ҳафта ичида ўтказилиши режалаштирилган учта митинги бор.
Трамп президентлик вазифаларини бажара олмайдиган даражада касал бўлиб қолса, нима бўлади?
АҚШ конституциясининг 25-моддасига биноан, президент бу ҳолатда ўз вазифаларини вице-президентга топширади. Бу эса Майк Пенс ушбу вазифани бажаришини англатади. Трамп тузалиб кетгач, у яна ўз ўрнига қайтади.
