Францияда таълим муассасаларининг хавфсизлик тизими ва ижтимоий тармоқларда хабарларни текшириш кучайтирилади 

Франция президенти Эммануэль Макрон Мудофаа кенгаши йиғилишида “Францияда радикаллар энди тинч ухламайди” деган. Бу ҳақда 18 октябрь, якшанба куни, BFMTV телеканали ўз манбаларига асосланиб хабар берди.

Сиёсатчи бу фикрини 16 октябрь, жума куни Париж яқинида тарих ўқитувчиси ўлдирилиши муносабати билан бўлиб ўтган Мудофаа кенгаши йиғилишида айтиб ўтган. 

Телеканал хабарига кўра, йиғилиш давомида бутун мамлакат бўйлаб таълим муассасаларининг хавфсизлик тизимини кучайтиришга қарор қилинди. Бундан ташқари, Францияда ижтимоий тармоқларда хабарларни текширишга эътибор кучайтирилади. Хусусан, қотилликдан сўнг, ижтимоий тармоқларда ўқитувчининг қотилини қўллаб-қувватловчи 20дан ортиқ хабар топилди. Уларнинг муаллифлари жавобгарликка тортилади. Шунингдек, телеканал душанба куни ижтимоий тармоқларда тажовузкорга ҳамдардлик билдирган 80та хабар муаллифларини текшириш бошланишини таъкидламоқда. 

Эслатиб ўтамиз, 16 октябрь, жума куни Париж яқинидаги маҳаллий коллеж талабаларидан бири Муҳаммад алайҳиссаломнинг карикатура мультфильмларини намойиш этган тарих ўқитувчиси 47 ёшли Самуэл Патининг бошини танасидан жудо қилганди. Бир неча дақиқадан сўнг полиция уни отиб ўлдирган.

Аввалроқ, Францияда ҳуқуқни муҳофаза қилиш органлари ходимлари экстремистик ҳаракатларда гумон қилинаётган хорижий фуқароликка эга бўлган 230дан ортиқ радикалларни мамлакатдан чиқариб юборишга тайёр эканликлари ҳақида хабар берилган эди.