Жаҳон бозорида олтинга бўлган талаб 2009 йилдан буён энг қуйи кўрсаткичга тушиб кетди

Коронавирус пандемияси келтириб чиқарган инқироз туфайли 2020 йилнинг 3 кварталида дунё бозорида олтинга бўлган талаб ўтган йилнинг шу даврига нисбатан 19 фоиз – 892 тоннагача камайди. Бутун жаҳон олтин кенгашининг (World Gold Council, WGC) ҳисоботига кўра бу 2009 йилдан бери кузатилган энг паст чораклик кўрсаткичдир.

Ушбу чоракда олтин таклифи эса 3 фоизга қисқарган. 2020 йилнинг бошида ҳам ушбу металлга бўлган талаб ўтган йилга нисбатан 10 фоизга камроқ (2,97 минг тонна) бўлган эди.

Шу сабабли учинчи чоракда олтинга бўлган инвестициявий талаб 20 фоизга ўсиб кетган. Ушбу даврда дунё бўйлаб инвесторлар 222,1 тонна олтин қуймаси ва олтин тангалар сотиб олган. Асосий ўсиш кўрсаткичлари ғарб бозорларида эмас, Хитой ва Туркияда кузатилган. Бундан ташқари инвесторлар қўшимча тарзда олтин билан таъминланган фонд биржалари орқали яна 272,5 тонна олтин сотиб олишган.

Бутун жаҳон олтин кенгаши таҳлилчиси Луиза Стритнинг сўзларига кўра, олтин – ушбу чоракда ўзгарувчан бозорлардан барқарорлик қидираётган турли инвесторларнинг пули учун «бошпана» вазифасини ўтаб бермоқда.

Ташкилотнинг яна бир мутахассиси Жон Маллиганнинг билидиришича, коронавирус пандемияси келтириб чиқарган инқироз оқибатларини баҳолашга ҳали эрта бўлсада, турли таваккалчилик ва муаммоларнинг пайдо бўлиш эҳтимоли инвесторларни олтинга бўлган қизиқишини оширмоқда.