Қайд этилишича, аудиоёзувда Андижон вилояти ҳокимининг билдирган фикри барча ОАВ вакилларига эмас, аксинча айрим нохолис ОАВ ходимларига нисбатан айтилганлигини билиш мумкин.
Интернетда Андижон вилояти ҳокими Шуҳрат Абдураҳмонов марҳаматлик уч аёлни 15 суткага қаматгани ҳақида гапиргани тарқалган аудиоёзув бўйича вилоят ҳокимлиги матбуот хизмати расмий муносабат билдирди.
Унда айтилишича, аудиоёзув Андижон вилояти ҳокими Ш.Абдураҳмоновга тегишли эканлиги, аммо ушбу аудиоёзув бундан икки йил муқаддам ёзиб олинганлиги маълум бўлган.
“Бундан ташқари аудиоёзувда вилоят ҳокимининг билдирган фикрида барча ОАВ вакилларига эмас, аксинча айрим нохолис ОАВ ходимларига нисбатан айтилганлигини билиш мумкин.
Жумладан, ўтган давр мобайнида ОАВ вакиллари билан шахсан вилоят ҳокимининг иштирокида 20 дан зиёд очиқ мулоқотлар, брифинглар, пресс турлар ҳамда матбуот анжуманлари ўтказилди.
Шунингдек вилоят ҳокимлиги республикамизда фаолият олиб бораётган барча ОАВ вакиллари билан доимий равишда Андижон вилояти ижтимоий-иқтисодий ҳамда сиёсий янгиликларни ёритиб боришда ҳамкорликни йўлга қўйган”, дейилади расмий муносабатда.
Аммо расмий муносабатда вилоят ҳокими бу гапларни айнан қачон, қаерда ва нима учун айтгани, хусусан Марҳамат туманидан бўлган уч нафар аёл ҳоким топшириғи билан 15 суткага «тиқиб қўйилгани»га изоҳ берилмаган.
Эслатиб ўтамиз, Интернетда Андижон вилояти ҳокими Шуҳрат Абдураҳмонов унга «сассиқ гапирган» марҳаматлик уч аёлни 15 суткага қаматгани ҳақида гапирган аудио тарқалди. Аудиода ҳоким журналистлар ҳақида ҳам фикр билдирган.
