Профилактика инспекторлари учун Хитойдан 690 долларлик планшетлар харид қилинмоқда

Бу ҳақда Қонунчилик палатасидаги “Адолат” СДП фракциясининг Маъмурий жавобгарлик тўғрисидаги кодексига ўзгартишлар киритиш орқали бир қатор масалаларнинг маъмурий судлардан профилактик инспекторларига ўтказилишига бағишланган йиғилишда ИИВ бошқарма бошлиғи Раҳим Наимов айтиб ўтган.

Йиғилишда депутатлар томонидан маъмурий ишларни кўриб чиқиш учун бугунги кунда маҳаллаларда хизмат олиб бораётган профилактика инспекторларининг салоҳияти нечоғлик етарли эканлиги, бу борада маълум таҳлиллар ўтказилганлигини исботловчи рақамларнинг йўқлиги ҳамда профилактика инспекторлари томонидан расмийлаштирилган жарималар давлат бюджетига тушмаслиги танқид остига олинди.

Шунингдек, ушбу норма қабул қилингач, бу йўналишдаги фаолият ҳар бир профилактика инспекторининг шахсий кўрсаткичларига таъсир этиши таъкидланди. Ҳозирги 400-500та маъмурий ҳолатларда аҳолига ёрдам бериб, эртага ҳар бир инспектор шахсий кўрсаткичи учун биттадан бундай ҳолатни расмийлаштирган тақдирда ҳам ўн минглаб фуқароларни қамраб олиши мумкинлиги айтилди.

Депутатлар томонидан билдирилган эътирозларга жавобан ИИВ бошқарма бошлиғи Раҳим Наимов бугунги кунда Ўзбекистонда 9875 нафар маҳалла профилактика инспекторлари фаолият олиб бораётгани, уларнинг ҳар 4 нафарига 1 нафардан катта профилактика инспектори бириктирилганлигини айтиб ўтди.

У бу йўналишда шаффофликни таъминлаш учун Хитой давлатидан 690 доллардан планшетлар харид қилинаётганлигини маълум қилди. 

"Мазкур планшетлар фақатгина жавобгарнинг бармоқ излари мониторга босилган тақдирдагина маъмурий баённомалар расмийлаштиради. Бугунги кунгача Наманган, Самарқанд ва Тошкент вилояти профилактика инспекторлари ушбу турдаги планшетлар билан таъминланган", — деди Наимов.

Эслатиб ўтамиз, “Ўзбекистон Республикасининг Маъмурий жавобгарлик тўғрисидаги кодексига ўзгартишлар киритиш ҳақида”ги қонун лойиҳаси орқали кодекс 110-моддаси 1-қисми, 111-моддаси 1-қисмида назарда тутилган ҳуқуқбузарликлар бўйича (Шаҳарлар ва бошқа аҳоли пунктларида ит ва мушук боқишнинг қоидаларини бузиш ҳамда ҳайвонларга нисбатан шафқатсиз муносабатда бўлиш) маъмурий жазо қўллаш ҳуқуқи ички ишлар органлари профилактика инспекторларига берилмоқда.