2020 йилда режага киритилган 30 та симёғоч ва битта трансформатор Иштихонда нега ўрнатилмади? Пандемия яна қачонгача баҳона бўлади?

Kun.uz’га навбатдаги мурожаат Самарқанд вилояти Иштихон тумани «Ҳумо» маҳалла фуқаролар йиғини Чайжаул қишлоғи аҳолисидан йўлланди. Унда ёзилишича, қишлоқда битта трансформатор бор. Аҳоли хонадонларининг сони меъёрдан ошиб кетгани учун электр энергияси билан етарли даражада таъминлашда унинг қуввати етмаяпти. Қишлоқ аҳлининг бир қисми пул йиғиб ўз ҳисобидан сотиб олинган ёғочлардан қўлбола симёғоч тайёрлаб, икки километр узоқликдаги мактаб трансформаторига уланган. Аммо унинг ҳам қуввати паст. Шунингдек, қўлбола симёғочлар ҳам омонат турибди.

«Самарқанд вилояти Иштихон тумани «Ҳумо» маҳалла фуқаролар йиғини таркибидаги Чайжаул қишлоғи фуқаролари номидан мурожаат қиляпмиз. Аҳоли хонадонлари кўп бўлса-да, қишлоққа бир дона трансформатор қўйилган. Унинг қуввати барчага етмайди. Шу сабабли, ўз ҳисобимиздан симёғоч тайёрлаб, 2 километр узоқликда жойлашган мактаб трансформаторига уланганмиз. Шунда ҳам электр энергиясининг қуввати камлик қиляпти. Симёғочлар қўлбола бўлганлиги учун хароб аҳволда. Аксарияти чириб бўлган. Фарзандларимиз мактабга борган пайтда ёки кўчага ўйнаб чиққанда хавотирда ўтирамиз. Қувват камлиги сабаб кўпчиликнинг хўжалик техникалари куйиб қолган, бузилган. 2019 йилдан буён бу масалани туман ҳокимининг сайёр қабулларида ҳам бир неча марта кўтардик, аммо, натижа бўлмади. Аҳоли томонидан туман электр тармоқлари корхонасига, туман депутатига ёзма, яна Халқ қабулхонаси, Бош прокуратура, Президент портали, вилоят ҳокими телеграм мессенжерига мурожаат қилганмиз, аммо ҳеч кимни биз дуч келаётган муаммо билан иши йўқ», дейилади мурожаатда.

Қишлоқ аҳлининг билдиришича, уларнинг Президент порталига қилган мурожаатига 2020 йил 15 сентябр куни «Самарқанд ҳудудий электр тармоқлари» АЖ раҳбари У.Жўраев номидан жавоб хати берилган. Унда қишлоқ аҳлининг Шерали Шакаров номидан Президент порталига қилинган мурожаати «Самарқанд ҳудудий электр тармоқлари» АЖ томонидан ўрганиб чиқилгани, Чайжаул қишлоғидаги паст кучланишли электр энергияси таъминотини яхшилаш ишлари Президентнинг 2016 йил 23 ноябрдаги ПҚ 2661-сонли «2017-2021 йилларда паст кучланишли электр тармоқларини янада модернизация қилиш ва янгилаш дастури тўғрисида»ги қарорига асосан 2020 йил сентябр ойида амалга ошириши маълум қилинган. Аммо мурожаатда ёзилишича, сентябрда ҳам, ундан кейин ҳам ҳеч бир иш қилинмаган.

Мурожаат юзасидан изоҳ олиш учун аввал Иштихон туман электр тармоқлари корхонаси раҳбари Сардор Ортиқов билан боғландик. У Чайжаул қишлоғи аҳолиси дуч келаётган муаммодан хабардорлигини билдирди. Унинг айтишича, режага кўра Чайжаул қишлоғида амалга оширилиши лозим бўлган ишларни 2020 йилда юз берган пандемия сабабли амалга оширишнинг иложи бўлмаган.

«Режага кўра, Чайжаул қишлоғида 30 та симёғоч ва битта трансформатор ўрнатилиши белгиланган эди. Пандемия сабабли бу ишларни амалга ошира олмадик. Умуман олганда, Иштихон туманида режа қилинган ишларнинг 90 фоизини амалга оширишнинг имкони бўлмади. Энди уларни 2021 йилда амалга оширамиз», деди Сардор Ортиқов.

Ана шу ерда бир ҳолат бизни бироз ажаблантирди. Чайжаул қишлоғи аҳолиси Президент порталига муаммо юзасидан 2020 йил 7 сентябрда мурожаат қилган. «Самарқанд ҳудудий электр тармоқлари» АЖ мурожаатга 15 сентябрда жавоб берган. Қишлоқ аҳли мурожаат қилган пайтда ҳам, унга У.Жўраев номидан жавоб хати берилганда ҳам пандемия давом этаётган эди. Шу ўринда ҳақли савол туғилади, «Самарқанд ҳудудий электр тармоқлари» АЖ ва унинг таркибидаги Иштихон туман электр тармоқлари корхонаси «пандемия сабабли» режалаштирилган ишни бажариб бера олмас экан, нега пандемия даврида муаммони ҳал қилишга ваъда беради? Ёки мақсад Президент порталига қилинган мурожаатни ёлғон ваъда бериб бўлса-да «амаллаб ёпиш» бўлганми?

Чайжаул қишлоғи аҳолисига муаммони «2020 йил сентябр ойида ҳал қиламиз» деб ваъда берган «Самарқанд ҳудудий электр тармоқлари» АЖ мутасаддилари билан боғланганимизда, улар ҳам пандемия сабабли режалаштирилган ишлар қолиб кетганини айтишди. Биз билан суҳбатлашган «Самарқанд ҳудудий электр тармоқлари» АЖ умумий ишлар бўйича директори Гулзухра Сайдуллаеванинг айтишича, пандемия шароити Иштихон туманида режа қилинган ишларнинг бажарилишига тўсқинлик қилган. Унга, Чайжаул қишлоғи аҳолиси томонидан турли мутасадди ташкилотларга қилинган мурожаатларга нега айнан пандемия даврида, сентябр ойида бажарамиз деб ваъда берилгани ҳақида сўрадик. У бу иш аввалги раҳбарнинг (Умар Жўраев ишдан кетган) масъулиятсизлиги бўлганини билдирди.

«Иштихон туманидаги «Ҳумо» МФЙ Чайжаул қишлоғи аҳолиси электр таъминотида дуч келаётган муаммодан барчанинг хабари бор. Бу муаммони жорий йилда ечиш режага киритилган. Ҳозир совуқ об-ҳаво бироз тўсқинлик қилиб турибди. Кунлар исиб кетгандан кейин ишларни бошлаймиз», деди Гулзухра Сайдуллаева.

Мазкур муаммо юзасидан Чайжаул қишлоқ аҳли номидан кўплаб мутасадди ташкилотларга мурожаат қилган Шерали Шакаров билан боғланганимизда, у «Самарқанд ҳудудий электр тармоқлари» АЖ ва Иштихон туман ЭТК масъулларига мутлақо ишонмаслигини, улар қишлоқ аҳлини 2018 йилнинг кузидан бери алдаб келаётганини билдирди.

«Булар қарийб 3 йилдан бери ваъда беради. Аммо бажармайди. Мазкур муаммони илк бор кўтариб чиққанимизда «Самарқанд ҳудудий электр тармоқлари» АЖ собиқ раҳбари Умар Жўраев Иштихон туман ЭТК раҳбари бўлиб ишларди. Ўша пайтларда у Чайжаул қишлоғига симёғоч ва трансформатор ўрнатиб бериш режага киритилганини айтган эди. Кейин вилоятга кўтарилиб кетгандан сўнг ҳам унга муаммони неча марта эслатдик, аммо нафи бўлмади. Ҳар доим «режага киритилган, қилиб берамиз» деган жавобни эшитамиз. Аммо амалий ишдан дарак йўқ. Ўтган йил, симёғоч ва трансформаторни сентябрда ўрнатиб берамиз дейишди. Аммо ваъдани бажаришмади. Вилоят ҲЭТКга яна мурожаат қилдик. Пандемияни баҳона қилишди. Ҳозир кунлар исиб кетса симёғоч ва трансформаторни ўрнатиб берамиз дейишяпти, аммо яна ваъдасида турмайди», дейди Шерали Шакаров.

P.S. Таҳририятга юқоридаги муаммога ўхшаш мурожаатлар кўп келади. Мутасаддилар билан боғланганимизда, улар 25 йилда йиғилиб қолган муаммоларни қисқа муддатда бартараф қилиб бўлмаслигини, шу учун навбати билан бажаришларини умумий қилиб айтишади. Аммо «Самарқанд ҲЭТК» АЖ ва Иштихон туман ЭТК мутасаддилари Чайжаул қишлоғида бажарилиши керак бўлган ишлар режага киритилганини билдиришди. Одамлар режага киритилган ишнинг бажарилишини қарийб 3 йиллаб кутса, унда бажарилиш санаси аниқ бўлмаган ва «навбати билан бажарилиши» айтилаётган ишларнинг амалга оширилишини неча йил кутаркин?

Ғайрат Йўлдош Kun.uz мухбири