Жиззах вилоятида бир кунда 5 ҳудуд раҳбари алмашди

Вилоят ҳокимлиги матбуот хизмати хабар беришича, 19 январ куни Халқ депутатлари Янгиобод тумани Кенгашининг навбатдан ташқари сессияси ўтказилди ва унда ташкилий масала кўрилди.

Сессия кун тартибидаги масала бўйича вилоят ҳокими Эргаш Солиев сўзга чиқиб, Иброҳим Болтаевич Қаршибоев номзодини Янгиобод тумани ҳокими лавозимига тавсия этган, депутатлар таклифни маъқуллашган.

Бунгача Янгиобод тумани ҳокими сифатида ишлаб келган Икром Синдарович Матиев Фориш тумани ҳокими лавозимига ўтганди.

Иброҳим Қаршибоев бунгача Зафаробод туманида ҳокимлик қилиб келганди. Зафаробод туманига эндиликда Жиззах вилояти ҳокимининг молия-иқтисодиёт ва камбағалликни қисқартириш масалалари бўйича собиқ биринчи ўринбосари бўлган Нодир Ражапов раҳбарлик қилади.

 19 январ куни Мирзачўл тумани ҳокими Комил Холмуродов Жиззах шаҳрига ҳоким этиб тайинланди. У янги лавозимда Акбар Шукуров ўрнини эгаллади.

Комил Холмуродов ўрнига Мирзачўл туманига Шерзод Аҳмедов янги ҳоким этиб тайинланган.

Фориш туманининг аввалги ҳокими Абдували Мустанов Нодир Ражапов ўрнига Жиззах вилояти ҳокимига ўринбосар бўлди.

Шунингдек, Жиззах вилояти ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари Акром Раҳмонқулов лавозимидан озод қилиниб, унинг ўрнига Баҳром Назаров тайинланган.

Айни вақтда Жиззах шаҳрининг собиқ ҳокими Акбар Шукуровнинг кейинги фаолияти ҳақида маълумот йўқ.