Манчестер ва Мадридда дерби, Германияда «Бавария» «Боруссия»га қарши. Ҳафта ўйинлари анонси

Бундеслига. 24-тур.

6 март (шанба)

БАВАРИЯ – БОРУССИЯ ДОРТМУНД

Ўйин бошланиш вақти: 22:30

ТВ-трансляция: SportTV

Ҳозир турнир жадвали ва тўпланган очколар нуқтайи назаридан қараганда, орадаги фарқ катта бўлса-да, бу ўйин барибир Бундеслигада энг марказий ўйин бўлиб қолаверади. Биринчидан, дортмундликлар ўз таркибидаги юлдуз футболчилари билан «Бавария»га яқин кела олишади, иккинчидан, айнан шу икки клуб Чемпионлар Лигасида ҳам Германия шарафини муносиб ҳимоя қилиб, кейинги босқичга чиқиш учун яхши имконият ҳосил қилишган. Дортмунддаги биринчи давра учрашуви ҳам жуда шиддатли ва қизиқарли ўтган ва унда меҳмонлар 3:2 ҳисобида иродали ғалаба қозонгандилар.

Бундан ташқари, дортмундликлар бир қатор муваффақиятсиз ўйинлардан сўнг, қаторасига тўрт ғалабага эришишди – Германия кубоги ярим финал йўлланмаси билан биргаликда, Бундеслигада яна ЕЧЛ йўлланмаси учун курашга қайтишди. Иккинчи мақсад жуда муҳим, зеро агар «Боруссия» бу мавсумда нуфузли еврокубокдан қуруқ қолса, Санчо, Ҳоланд, Рейна каби бир қатор юлдуз футболчиларни таркибда олиб қолиш янада қийинлашиб кетади. Шундоғам Европа грандлари ушбу футболчилар учун навбатда туришибди.  

«Бавария» эса «Арминия» ва «Айнтрахт»га қарши омадсиз ўйинлардан сўнг, турнир жадвалидаги қулай позицияни бой берди. Энди «Лейпциг» билан атиги 2 очко ажратиб турибди холос. «Редбулчилар» қаторасига беш ўйиндан бери Бундеслигада ғалаба қозонаётгани ва навбатдаги рақиб ўртамиёна «Фрайбург» эканини эътиборга олсак, мюнхенликларнинг хато қилишга ҳақлари йўқ. Миллий жамоалар билан боғлиқ танаффус ўтгач, икки пешқадам «Лейпциг» майдонида ўзаро куч синашади. Ўша ўйингача вазиятни назоратда ушлаб туриб айни дамда «Бавария»дан хатосиз ўйинларни талаб қилади.  

Жамоалар таркибида ўйин мувозанатига катта таъсир ўтказиши мумкин бўлган жароҳатлар кўп. Барча юлдузлар ўз ўрнида. Фақат дортмундликларни уч кун ўтиб, ЕЧЛда «Севилья»га қарши муҳим ўйин кутиб турганини унутмаслик керак. «Бавария» эса «Лацио» билан ўйинини 18 мартда ўтказади.  

А Серия. 26-тур.

6 март (шанба)

ЮВЕНТУС – ЛАЦИО

Ўйин бошланиш вақти: 00:45

ТВ-трансляция: UzReportTV

«Ювентус» пешқадам «Интер»дан 10 очко орқада қолиб кетди. Тўғри, туринликларда бир ўйин захираси бор, аммо бу учрашув ҳам «Наполи»га қарши ўтишини инобатга олсак, ҳали уч очкони олиш ҳам керак. Бунинг устига чемпион бўлиш сирини жуда яхши биладиган Конте «Ювентус» ўрганиб қолган режимга тушиб олди – охирги 9 ўйинда 8 ғалаба. Мавсумнинг охирги қисмини мана бундай формада ўтказиш, бунинг устига еврокубоклар ҳам халақит бермаслиги «Интер» рақиблари имкониятини кескин пасайтириб юборади. Бундай шартлар асосида «Ювентус» очко йўқотишга умуман ҳаққи йўқ.  

Рақиб эса очко жуда зарур бўлган «Лацио». Римликлар бу мавсумда Чемпионлар Лигаси ҳавосидан баҳра олишди ва албатта, у ерга қайтиш учун бор имкониятларини ишга солишади. Мағлубият эса ушбу курашдаги имкониятни кескин равишда тушириб юборади. «Лацио»ни ҳозирда кучли тўртликдан 6 очко ажратиб турибди, холос. 

«Ювентус», шунингдек, таркиб борасида ҳам бир қатор муаммоларга дуч келмоқда. Ҳимоя марказида биратўла уч футболчи – Кьеллини, Бонуччи ва Де Лигт сафдан чиққан. Дибала ва Бентанкур ҳам жамоага ёрдам бера олмайди. Бу ўйин «Порту»га қарши ЕЧЛдаги ўта муҳим тўқнашув олдидан рўй бераётганини инобатга олсак, Пирлонинг вазифаси янада қийинлашиб кетади. Дастлабки учрашув 2:1 ҳисобида португалияликларнинг ғалабаси билан якунига етганди. Меҳмонлар сафида эса Сколари, Ладзари ва Радуда шерикларига ёрдам бериш имконияти йўқ.  

Ўзаро ўйинларда «Ювентус»нинг яққол устунлиги сезилади: охирги 30 ўйиннинг 21 таси туринликларнинг ғалабаси билан якунланган. Лекин «Лацио» айнан сўнгги йилларда кучая бошлаганини ва барқарор равишда пешқадамлар сафида юрганини эътиборга олсак, бу мувозанат бироз ўзгараётганини кўришимиз мумкин. Масалан, айнан Римда бўлиб ўтган охирги икки ўйинда бир ғалаба ва бир дуранг «Лацио» фойдасига. Шунингдек, эсингизда бўлса, бир йил олдин Италия суперкубогида римликлар «Ювентус» устидан ғалаба қозониб, совринни қўлга киритгандилар.  

Ла Лига. 26-тур.

7 март (якшанба)

АТЛЕТИКО - РЕАЛ

Ўйин бошланиш вақти: 20:15

ТВ-трансляция: FutbolTV/UzReportTV

Ушбу мавсумда биринчи марта Ла Лигада турнир пешқадами ўзгариши мумкин эди, агар «Реал» ўтган турда сосьедадлик «адаши» устидан ғалаба қозона олганида. Ўшанда жамоалар ўртасидаги фарқ 3 очкогача қисқарган бўлар ва «Реал» ғалаба қозониб, «Атлетико»га етиб олиш имкониятига эга бўларди. Аммо аксинча бўлди, «Атлетико» «Вильяреал»га қарши қийин ўйинда ишончли ўйин кўрсатиб, «Леванте»га қарши ўйинларнинг жамоанинг умумий аҳволига таъсир кўрсатмаганини исботлай олди. Симеоне шогирдлари энди «Барселона» ва «Реал»дан 5 очко олдинда бормоқдалар ва яна бир ўйин захирада бор. Айтиш мумкинки, Испанияга бироз интрига қайтган бўлса-да, фаворит ўзгармади.  

Аммо кураш янада қизиши учун «Реал» ғалаба қозониб, ўртадаги фарқни янада қисқартириши керак. Зеро, Ла Лига доирасида ўтган охирги 9 дербида «Атлетико» ғалаба нималигини билмай келмоқда. Хусусан, сўнгги икки ўйин «Реал»нинг ғалабаси билан якунланганди. «Атлетико» охирги марта «Реал» устидан Примьерода 2016 йилнинг февралида ғалаба қозонган. Гризманнинг ягона голи учрашув тақдирини ҳал қилганида иштирок этган «Атлетико» футболчиларидан атиги 3 нафари ҳозир ҳам таркибда қолган, холос. Яъни бутунлай бошқа жамоа.

Жароҳатларга келсак, мезбонлардан марказий ҳимоячи Хосе Хименесда жароҳат бор. «Реал» таркибидаги жароҳатлар ёмғири бироз тўхтаган, аста-секин футболчилар таркибга қайта бошлаган бўлсалар-да, Карвахал ва Азар ҳамон тикланиб улгурганлари йўқ. Шунингдек, Зидан Мариано Диаснинг ҳам ёрдамидан фойдалана олмайди.  

АПЛ. 28-тур.

7 март (якшанба)

МАНЧЕСТЕР СИТИ - МАНЧЕСТЕР ЮНАЙТЕД

Ўйин бошланиш вақти: 21:30

ТВ-трансляция: FutbolTV/UzReportTV

Мавсумнинг иккинчи ярми икки Манчестер клубининг Чемпионлик пойгаси остида ўтиши тахмин қилинган бўлса-да, бу фаразлар ўзини оқламади. Гвардиола шогирдларининг феноменал серияси ва «Юнайтед»нинг сўнгги икки ойда натижаларининг ёмонлашгани интригани йўқотди ва энди «Сити»нинг чемпионлиги вақт масаласи, холос. Шунга ўхшаш вазият эсингизда бўлса, Жозенинг «Олд Траффорд»даги иккинчи мавсумида ҳам юзага келганди. «Этиҳад»даги ғалаба «Манчестер Сити»ни расман чемпионга айлантириш мумкин бўлган паллада меҳмонлар 3:2 ҳисобида ғалаба қозонгандилар. Ҳозир расман чемпионлик ҳақида гапиришга эрта бўлса-да, ғалаба мезбонларнинг устунлигини 15 очкога етказади.  

Бошқа тарафдан Гвардиола шогирдларининг 21 ўйиндан иборат ғалабали сериясини тўхтатиш учун асосий номзод айнан «Манчестер Юнайтед» бўлиши мумкин. Бунга бир қатор сабаблар бор. Биринчидан, «МЮ»нинг ҳам ўз рекордли серияси давом этмоқда – жамоа 20 ўйиндан бери сафар ўйинларида мағлубиятга учрагани йўқ. АПЛнинг бу борадаги рекорди ўша енгилмас «Арсенал»га тегишли – 28 ўйин. Иккинчидан, айнан «Этиҳад» ҳам сўнгги йилларда Манчестер дербисида меҳмонларнинг устунлигини таъминламоқда. Бўлиб ўтган охирги 6 ўйиндан атиги 1тасида мезбонлар ғалаба қозона олишган, холос. Луи ван Гаал ҳам, Моуриньо ҳам, Сульшер ҳам «Этиҳад»да дербини ютишни уддалашган. Сульшер икки марта.  

Фақат бир ҳолат Сульшерга халақит бериши мумкин. «Юнайтед» иштирокидаги сўнгги 5 топ-ўйин 0:0 ҳисобида якунланди. Ўз навбатида «МЮ» ва топ учрашувлар» мавзусида Сульшер танқид остига олина бошлади. Ўтган йили айнан катта ўйинларни ютиб, аутсайдерларга бой берган «Юнайтед» учун бундай натижа аслида ижобий тенденцияни кўрсатиши ҳам мумкин эди – зеро ўша 0:0 ларнинг бирортасида ҳам жамоа ҳимоявий ўйин намойиш этмади, ҳар бирида ғалабага яқин бўлди. Аммо «Кристал Пэлас» билан ҳам дурангдан сўнг, бундай дуранглар салбий бўёқ акс этмоқда. «Сосьедад»га қарши 0:0 ни ҳам қўшсак, Сульшер шогирдлари ўйинларида уч ўйиндан бери гол бўлмаяпти. Мана шундай характердаги тўртинчи учрашув учун «Юнайтед» улкан танқидлар гирдоби остида қолиши мумкин.  

Таркиб борасида мезбонларда йўқотишлар йўқ, ҳатто Гвардиола бемалол ҳимоя ва яримҳимоя марказида ротацияларни амалга ошириш имкониятига эга. Меҳмонларда вазият бошқачароқ – юқорида эсланган ўйин (3:2) қаҳрамони Погба жароҳатда, шунингдек, Мата, Марсиял, Ван Де Бек, Линделёф каби футболчиларнинг майдонга тушишлари сўроқ остида. Де Хеа фарзанд кўрди ва у ҳам Испанияда бўлиб турибди. Бундан ташқари, Маркус Рэшфорднинг ушбу мавсумда ёмон формада экани ҳақида ҳам янги маълумот чиқди: маълум бўлишича, футболчи бир йилдан бери орқасида оғриқлар остида ўйнаб келмоқда ва ёзда операция столига ётиши мумкин. Ҳужумчининг қайсидир маънода курашлардан ўзини олиб қочиши ва гўёки «лайт» режимда ўйнаётгани аслида мураббийларнинг кўрсатмалари асосида бўлиши мумкин.  

АПЛ. 28-тур.

8 март (душанба)

ЧЕЛСИ – ЭВЕРТОН

Ўйин бошланиш вақти: 23:00

ТВ-трансляция: FutbolTV/UzReportTV

Сўнгги ойда АПЛда «Манчестер Сити»дан сўнг, энг яхши ўйинни янги мураббий қўл остида «Челси» намойиш этмоқда. Тухел шогирдлари охирги 10 ўйиннинг 7 тасида ғалаба қозонишди ва уч маротаба дуранг ўйнашди. Бу ўйинларда «Челси» атиги 2та гол ўтказиб юборгани ва «Тоттенҳэм», «Ливерпуль» ва «Атлетико» каби рақиблар мағлуб этилганини эътиборга олсак, бундан ортиғини кутиш ҳам мушкул эди. Натижада «Челси» узоқ танаффусдан сўнг, яна кучли тўртликка қайтди.  

Аммо агар йўқотилган очколар бўйича ҳисобласак, «Челси» ҳамон пастда турган «Эвертон» ва «Вест Ҳэм»дан пастроқда эканини ҳам инобатга олиш керак. Бу жамоалар бир ўйин кам ўтказишган. Демак, ўз позициясини мустаҳкамлаш ва ҳақиқий маънода ЕЧЛ йўлланмаси учун курашда фаворитга айланиши учун «Челси» «Эвертон» устидан ғалаба қозониши шарт. Бу осон бўлмайди.  

Шу маънодаки, Анчелотти жамоаси айнан сафар ўйинларида жуда яхши натижалар кўрсатишмоқда. 1 ноябрь куни «Ньюкасл»дан қабул қилинган мағлубият «Эвертон»нинг сафар ўйинларидаги сўнггиси бўлиб турибди. Кейин «Фулҳэм», «Лестер», «Шеффилд», «Вулверҳэмптон», «Лидс», «Вест Бромвич», ҳатто «Ливерпуль» мағлубиятга учратилди. «Олд Траффорд»даги ўйинда 3:3 ҳисоби қайд этилди. АПЛда қаторасига уч ўйинда ғалаба қозонган ва бу ўйинларда бирорта ҳам гол ўтказиб юбормаган «Эвертон» «Челси» учун «чақилмас ёнғоқ» бўлиши табиий.  

Қизиғи, «Челси»нинг бугунги кўтарилишида қайсидир маънода «Эвертон»нинг ҳам ҳиссаси бор ва бунинг учун балки миннатдорлик ҳам билдириш керакдир. Зеро АПЛда етакчилик қилиб келган «Челси»нинг илк қоқилиши айнан «Гуддисон»да рўй берган ва айнан ўша мағлубиятдан сўнг, Лэмпарднинг шўнғиши бошланганди.  

Ўзаро ўйинларда «Эвертон» доим лондонликларга муаммо туғдирган, охирги 24 ўйиндаги 8 ғалаба ва 6 дуранг ҳам буни яққол кўрсатиб турибди. Лекин айнан «Стемфорд»да ғалаба қозониш «Эвертон»га 1994 йилдан буён насиб қилмаётган экан. Ўтган сафар «Энфилд»да ғалаба қозониб, 22 йиллик анъанага чек қўйган ливерпулликлар энди янада эскироқ қора серияга барҳам беришга уриниб кўришармикин? «Челси»ни Англия чемпионига айлантирган 3 мураббийдан бири Карло Анчеллотти учун бу довонни забт этиш ҳам ярашган бўларди... 

А Серия. 26-тур.

8 март (душанба)

ИНТЕР – АТАЛАНТА

Ўйин бошланиш вақти: 00:45

ТВ-трансляция: FutbolTV/UzReportTV 

«А Серия»да юқорида тилга олинган Римдаги ўйин характеридаги яна бир ўйин бўлиб ўтади. Чемпионлик учун асосий даъвогар «Интер»нинг рақиби Чемпионлар Лигаси йўлланмаси учун курашаётган «Аталанта».  

Конте жамоасининг сўнгги ўйинлардаги барқарор натижалари ҳақида юқорида ҳам айтиб ўтилди. Яна бир жиҳатга эътибор бериш керак – миланликлар таркибининг кенглиги, захира футболчиларининг юқори савияда экани, айтиш мумкинки, «Интер»нинг бу мавсумдаги асосий ютуғи бўлиб келмоқда. Эсингизда бўлса, ўтган йили ҳам Европа Лигаси, ҳам чемпионатда сўнгги турларгача курашган Конте кўп маротаба таркибнинг ўта қисқа эканидан ва шогирдларининг чарчаб қолаётганидан нолиганди. Шундай паллалар бу мавсумда ҳам бўлгандир, лекин ротациялар, ҳар ўйинда янги қаҳрамонларнинг пайдо бўлаётгани «Интер»даги пасайишни сездирмаяпти.  

Масалан, охирги икки ғалабада асосий ишни Алексис Санчес бажарди ва учта гол уришга муваффақ бўлди. Сўнгги беш ўйинда Кристиан Эриксен жамоанинг асосий қуролига айланди. Хакими йўқлигида Маттео Дармиян унинг ўрнини эгаллади ва «Женоа» дарвозасига гол урди. Зеро, бу футболчилар мавсумнинг биринчи ярмида умуман таркибдан четда қолаётгандилар. Жуда кўп тажрибали футболчиларни керакли паллада майдонга тушириш учун яхши спорт формасида бўлганликлари, албатта, Контенинг ютуғидир. Мураббий ёзда юлдузли трансферларни амалга оширмаган бўлса-да, ўтган мавсумда айнан нима етишмагани борасида энг тўғри хулосага эга бўлган ва ечимлар ҳам нишонга теккан. Лукаку эса шубҳасиз, А Сериянинг бу мавсумдаги энг яхши ўйинчиси ва нега Конте «Челси»да ҳам айнан уни сотиб олишга уринганини майдонда исботламоқда. Футболчи ўз мураббийини топди, дейиш мумкин.  

«Аталанта»да эса бироз фарқли ҳолат. Шундоқ ҳам қисқа таркиб ва чекланган ижрочилар билан Европанинг ўтган мавсумдаги энг яхшиларидан бири бўлган «Аталанта»да муҳит бироз ёмонлашди. Мураббийнинг етакчи футболчилар билан зиддияти жамоа ўйинларига таъсир ўтказмай қолмаяпти. Аввал Гомес «Севилья»га кетиб қолган бўлса, энди Иличич билан келишмовчиликлар бошланди. «Аталанта» баъзи ўйинларда ўзини эслатиб турган бўлса-да, барқарорлик борасида муаммолар кўзга ташланяпти.

Биринчи даврадаги ўйинда 1:1 ҳисоби қайд этилганди. Ушбу жамоаларнинг «Жузепе Миацца»да ўтган охирги икки ўйинида ҳам ғолиб аниқланмаганди.  

БОШҚА ЎЙИНЛАР:

7 март. Бёрнли – АРСЕНАЛ (17:30), Брайтон – ЛЕСТЕР (8 мартга ўтар кечаси, 01:00), Осасуна – БАРСЕЛОНА (8 мартга ўтар кечаси, 01:00)

8 март. РОМА – Женоа (16:30), ЛИВЕРПУЛЬ – Фулҳэм (19:00), Верона – МИЛАН (19:00), ТОТТЕНҲЭМ – Кристал Пэлас (9 мартга ўтар кечаси, 00:15), НАПОЛИ – Болонья (9 мартга ўтар кечаси, 00:45).