«Қироллик хонадонига қақшатқич зарба» – Шаҳзода Ҳарри ва Меган Маркл шов-шувли интервью берди
|19:41 / 09.03.202139 91213 мин
Америкалик машҳур журналист Опра Уинфри яна бир шов-шувли интервью уюштирди. Одатда дунёга машҳур инсонларни суҳбатга чақирувчи Уинфри хонимнинг бу галги меҳмонлари Британия шаҳзодаси Ҳарри ва унинг рафиқаси Меган Маркл бўлди. Меган ирқчилик ва суицид ҳақидаги ўйлари, Ҳарри — отаси билан зиддият ҳақида гапирди.
Британия шаҳзодаси шаҳзода Ҳарри ва унинг рафиқаси Меган Маркл америкалик телебошловчи Опре Уинфрига икки соатлик интервью беришди. Бу ушбу жуфтлик 2020 йил бошида қироллик оиласи ваколатларидан воз кечиб, Буюк Британиядан аввал Канадага, кейин АҚШга кўчиб ўтганидан буён илк бор телевидение орқали кўриниш беришидир. Интервью Американинг CBS телеканалида трансляция қилинди, аввалроқ тарқалган хабарларга кўра, намойиш учун 9 миллион доллар тўланиши кўзда тутилган. Сассекс герцоги ва герцогинясининг Опра Уинфри билан суҳбати ҳозирча интернетга жойлаштирилмади, аммо кўплаб нашрлар телевизион трансляцияга таяниб материаллар тарқатишмоқда. Унга кўра, Меган Британия қироллик хонадонида унинг ўғли Арчининг териси ранги қанчалар қора бўлишини муҳокама қилишганини айтган.
Дунёдаги энг қудратли оилани тарк этган жуфтлик
Сассекс герцоги ва герцогиняси бўлган шаҳзода Ҳарри ва собиқ актриса Меган Маркл бир ой аввал Буюк Британия қироллик оиласини тарк этганди. Жуфтлик бу қарорни аниқ изоҳламаган, лекин кўпчиликнинг фикрича, шаҳзода турмуш ўртоғининг ирқи ва у собиқ актриса бўлгани ҳақида аслзодалар орасидаги кинояларга тоқат қила олмагани учун шундай қарорга келган. Қиролича Елизавета ҳам невара келинини хушламаслиги ҳақида гаплар юради.
Қироллик оиласи Ҳарри ва Марклнинг оила мажбуриятларини бажариш ҳуқуқидан воз кечганини қайғули ҳолат деб атаган, шу билан бирга, улар оила аъзолари бўлиб қолишини маълум қилган. Монарх қиролича раҳбарлигидаги Британия қироллик оиласи дунёдаги энг таъсири катта сулола ҳисобланади. Амалда Британия бошқаруви тепасида турувчи оила дунёнинг кўплаб мамлакатларида катта таъсирга эга. Шаҳзода ва Меган оилани тарк этгач, эндиликда улар ҳарбий унвонини сақлаб қолган ҳолда қироллик тасарруфидаги хайрия ташкилотлари ва олийгоҳларга ҳомийлик қила олмайди. Жуфтлик бу қарорни қабул қилгач, Британия ҳудудини ҳам тарк этган. Меган ва шаҳзода Ҳаррининг бир нафар фарзанди бор, собиқ актриса иккинчи фарзандига ҳомиладор.
АҚШнинг биринчи рақамли интервью олувчи журналисти экани эътироф этиладиган Опра Уинфрининг навбатдаги шов-шувли интервьюси якшанба оқшомида CBS телеканалида эфирга узатилди. Суҳбат давомида шаҳзода Ҳарри оила кутаётган фарзанд қизалоқ эканини айтди. Меганнинг сўзларига кўра, ўғли Арчига ҳомиладор бўлган вақти унга шаҳзода унвони берилмаслиги ва қироллик қўриқчилари томонидан қўриқланмаслигини айтишган. Унинг фикрича, бу анъаналарнинг бузилиши бўлган: «Улар болам қорнимда эканидаёқ у учун анъаналарни ўзгартиришларини айтишди. Бу ҳам майли, туғилажак фарзандим хавфсизликда бўлмаслигининг ўзи даҳшат эди. Оиланинг биринчи оқ танли бўлмаган вакили бошқа набиралар каби шаҳзода унвонини олмаслигини билиш жуда ёмон. Болам ҳали туғилмасдан туриб у қанчалик қора танли бўлиши ҳақида очиқчасига гаплашишарди», деган Меган Маркл.
Мавзуга оид
У оиладаги бундай суҳбатларнинг тафсилотини эридан эшитганини айтди. Опра Уинфри бу тафсилот ҳақида шаҳзодадан ҳам сўради. Бироқ шаҳзода Ҳарри бу суҳбатлар ҳақида ҳеч қачон ҳеч қаерда гапирмаслигини айтди: «Ўша вақтда мен ҳайратдан ёқа ушлаб қолдим. Оила Меганнинг ирқи ҳақида таблоидларда тинимсиз ёзилаётганига қарши ҳеч нима қилмади. Бундай ирқчилик қилаётганларга қарши ҳатто парламент вакиллари фикр билдиришди, лекин бизнинг оиладан ҳеч ким бир оғиз ҳам гапирмади», дейди шаҳзода.
Ҳарри ва Меган Маркл британ қироллик оиласининг бошқа вакиллари билан ҳарбий авиация парадини кузатишмоқда, 2018 йил 10 июл
EPA / Scanpix / LETA
Ҳаррининг отаси, Британия тахти валиаҳди, шаҳзода Чарльз маълум вақт давомида ўғли билан гаплашишни ва унинг қўнғироқларига жавоб беришни тўхтатган. «Канадада яшаган пайтимиз бувим билан уч марта суҳбатлашдим, отам эса қўнғироқларимга жавоб беришни тўхтатмасидан олдин мен билан буларнинг ҳаммасини (қироллик ваколатларидан воз кечиш тўғрисидаги қарорни) ёзма равишда баён қилишимни сўраб, икки марта қўнғироқлашган», дейди герцог.
Ҳарри «масалани ўз қўлига олди», деган фикр билан шаҳзода Чарльз ўғли билан алоқаларни тўхтатган. «Мен оилам учун шундай қилишим керак эди. Бундай қарор жуда қайғули, аммо руҳий саломатлигим учун, хотиним ва Арчи учун нимадир қилишим керак эди», дейди шаҳзода. Унинг сўзларига кўра, ҳозир у отаси билан алоқаларни қайта тиклаган, аммо ўзаро муносабатларда «яхшилаш керак бўлган жиҳатлар қолмоқда».
Сассекс герцоги отасини яхши кўриши, лекин Чарльзнинг муносабати ва у билан ўзаро алоқалардаги муаммолардан ҳафсаласи пир бўлганини айтган: «Мен қаттиқ хафа бўлдим, чунки у ҳам қачонлардир шу вазиятни бошдан кечирганди-ку. У оғриқнинг нималигини билади... Кўплаб нохуш воқеалар содир бўлди». Ҳарри катта акаси, Кембриж герцоги Уильям ҳақида гапирар экан, улар «дўзахдан бирга ўтгани»ни айтди: «Тажрибамиз бир хил, лекин йўлларимиз бошқа-бошқа».
Ҳаррининг таъкидлашича, у бувиси Елизавета II билан «чиндан ҳам яхши муносабатда» ва бувиси унинг қарорларини ҳурмат қилади. Унга кўра, сўнгги олти ой ичида у қиролича билан «олдинги бир неча йилларга қараганда» кўпроқ мулоқот қилган.
ВВС таҳлилчиси Жонни Даймонд бу интервьюда кўп нарса очиб ташлангани ҳақида ёзади. Унинг айтишича, Меган бу суҳбатлардан кейин ўз жонига қасд қилиш ҳақида ўйлаган. Таҳлилчи қироллик оиласи 40 йилча аввал шаҳзода Ҳаррининг онаси Диана билан содир бўлган воқеадан хулоса чиқармаганини айтган. Меганга дўстлари билан учрашиш имкони берилмаган. У Британия нашрларида тинимсиз камситилган.
Қироллик оиласи шаҳзода Ҳаррининг хотинига бўлиши мумкин бўлган энг ёмон сценарийни таклиф қилган. Бу ҳақда гапирар экан шаҳзода Ҳарри оиласини тунд одамлардан иборат деб тасвирлайди. Унинг айтишича, аслзода оила аъзолари фақат ким нима учун пул тўлашини муҳокама қилган. ВВС таҳлилчиси Меган боласи ҳақидаги муҳокамаларни ошкор қилмагани, бу борада шаҳзода Ҳарри сўз очганига эътибор қаратган. Таҳлилчининг тусмол қилишича, шаҳзоданинг исёнкорона иқрори оилага бўлган муносабатининг қанчалик жиддий эканини кўрсатади.
Кейинчалик маълум бўлишича, чақалоқнинг ранги қанчалик қора бўлиши ҳақидаги суҳбатга қиролича ва унинг турмуш ўртоғи алоқадор эмаслиги аниқ.
Ҳарри ва Меган Арчини қиролича Елизавета II’га кўрсатишмоқда, 2019 йил 8 май
Chris Allerton /Sussex Royal / AP / Scanpix / LETA
Овсинлар келишмовчилиги
Меган Марклнинг овсини – Кейт Мидлтон билан муносабатлари ҳам жуда машҳур бўлиб, Опра Уинфри бу борада ҳам савол берган. Меганнинг айтишича, овсини билан тўйдан олдинроқ уришиб қолган. Улар тўй куни келиннинг атрофида юрувчи қизларнинг қандай рангли кийим кийиши борасида тортишиб қолишган ва охир-оқибат Меган йиғлаб юборган.
Шаҳзода Ҳаррининг айтишича, тўй бутун дунёдаги йирик телекомпаниялар трансляция қилганидан уч кун аввал бўлиб ўтган. Шаҳзода ҳаммаси уюштирилган томоша бўлгани, жуфтлик никоҳдан ўтган ҳақиқий маросимда ҳатто оила аъзолари ҳам қатнашмаганини айтди.
Меган қироллик оиласи аъзосига айланганидан кейин ўзини жуда ёлғиз ҳис қилганини, кўп ўтмай ўзини ўлдириш ҳақида ўйлай бошлаганини айтди. «Бу жуда аниқ ва жуда қўрқинчли туйғу эди, мени ёлғиз қолдириб бўлмасди», деб эслайди қироличанинг илк қора танли келини. Ундан тўй ўтиши билан ҳайдовчилик гувоҳномаси, паспорти ва банк картаси олиб қўйилади. Меган гўёки асирда яшай бошлайди ва ўзини ўлдириш ҳақида ўйлайди. Бу дарддан қутулиш учун касалхонага ётмоқчи бўлганида қироллик оиласидагилар бу ёмон оқибатларга олиб келиши мумкинлигини тушунтиришади.
Шундан кейин Меган марҳум қайнонаси Диананинг яқин дугоналаридан бирига мурожаат қилади. Шаҳзода Ҳарри хотини билан ҳам онаси билан содир бўлган воқеа такрорланишидан қўрқа бошлайди, чунки унинг фикрича, ўхшашликлар жуда кўп эди. Маълумот учун, Уэльс маликаси Диана 1997 йилда мисрлик хуштори билан автоҳалокатда вафот этган. Бу бахтсиз ҳодиса эмас, қироллик оиласи томонидан ташкиллаштирилган суиқасд бўлгани ҳақидаги гумонлар мавжуд.
Шаҳзода босимдан қутулиш учун оиласидан ёрдам сўрайди. Бироқ ҳатто унинг отаси Чарльз телефон қўнғироқларига жавоб бермай қўйган. Жуфтлик дастлабки кунларданоқ оилани қандай тарк этишни муҳокама қила бошлайди. Шаҳзода бу борада қиролича билан ҳам гаплашади: «Бувимни бехабар қолдириб кетолмасдим», дейди шаҳзода бу ҳақда.
Шаҳзода Меган билан бирга оилани тарк этиш ҳақида Австралияга сафар вақтида бир қарорга келганини айтади. Ўшанда Меган одамлар билан жуда яхши чиқишиб кетади ва шу сабабли одамлар уни яхши кўриб қолишади. Бундай илиқ муносабатни эса оиланинг бошқа вакиллари ёмон кутиб олади. Меганга сафарга тайёргарлик учун ҳеч ким ёрдам бермайди, ҳатто давлат мадҳиясининг сўзларини ҳам у интернетдан қидириб топади.
Шаҳзода Ҳаррининг айтишича, Меганга уйлангандан кейин унинг кўзи очилган. «Агар Меганга уйланмаганимда, оилани ҳеч қачон тарк этмаган бўлардим. У менинг кўзимни очди, умуман, саройдаги ҳолат қанақа эканини кўрсатиб қўйди», дейди шаҳзода. Унинг айтишича, қироллик оиласи бир тузоқ ва акаси, дадаси шу тузоқда яшаб юришга мажбур, улар исён қилолмайди.
Ҳарри қироллик оиласи уни молиялаштиришни тўхтатганини, эндиликда йирик реклама компаниялари билан ишлашга тайёрлигини айтди. Шунингдек, онаси Диана ҳам Ҳаррига яхшигина пул қолдириб кетган.
Қироллик оиласига қақшатқич зарба
HARPO PRODUCTIONS/JOE PUGLIESE
Меген ва шаҳзоданинг интервьюси шунчалик шов-шувли бўлдики, уни қироллик оиласига берилган қақшатқич зарба деб баҳолашмоқда. Ахир дунёдаги энг қудратли оилада ирқчилик қандай урчигани ҳақида олдин кимнинг ҳам гапиришга ҳадди сиғарди? Қизиғи, Опра Уинфридан интервьюни кечроқ чиқаришни сўрашади, чунки қироличанинг 99 ёшли турмуш ўртоғи, Эдинбург герцоги Филипп уч ҳафтадан буён касалхонада ётибди ва интервьюда айтилган гаплар бобонинг ҳолатига ёмон таъсир қилиши мумкинлиги ҳақида хавотирлар бор.
«Улар бўлиб ўтган воқеалардан кейин қандай қилиб бизни жим ўтиради деб ўйлашди, ҳайронман. Улар биз ҳақимизда жуда кўп ёлғон тарқатишди», дейди суҳбат давомида Меган.
Шаҳзода Ҳарри Меганга уйланиши 2017 йилда маълум бўлганди. Табиийки, қироличани бир марта «куйдирган» Диананинг ўғли Ҳарри олдин турмуш қурган (!), актриса (!) ва қора танли (!) аёлга уйланиши оилада норозилик келтириб чиқарган. Кейин ҳам Меган аристократларнинг кўплаб анъаналарини бузган. Масалан, одатда кўра оиланинг келинлари фарзандининг илк суратини Vogue журналига фотосессия қилган ҳолда эълон қилиши керак. Бироқ Меган Арчининг расмини ўзининг инстаграмдаги саҳифасига жойлаб қўйганди.
Қироллик оиласи назоратида бўлган таблоидларда жуфтлик танқид қилина бошлагач, Меган ва Ҳарри улар билан ҳамкорликни тўхтатганини эълон қилди. 2020 йил январда эса Меган ва Ҳарри қироллик оиласини тарк этмоқчилигини маълум қилди. Ўшанда оиладаги ирқчилик ҳақида сўз бўлмаган ва Ҳарри шунчаки мустақил ҳаётда, мустақил маблағлари эвазига яшамоқчи эканини айтганди. Опра Уинфрига берилган интервьюга анонс берилгач, жуфтлик ҳақида яна миш-мишлар тарқала бошлади. Times Меган иккита матбуот котибининг «бошига етганини», улар билан жуда қўпол муомалада бўлганини ёзди. Қироллик вакиллари бу интервью эълон қилингач, тезда муносабат билдиришди ва унда айтилган маълумотлар текширилишини билдирди. Шу билан бирга, Меган ва Ҳарри «оиланинг севимли вакили бўлиб қолиши» таъкидланди.
Меган ва Ҳарри хайрия компаниялари билан ишлашда давом этган ҳолда ўтган йили Neftlix ва Spotify компаниялари билан ҳужжатли фильмлар ишлаш бўйича шартнома имзолашган. Жуфтлик айни дамда Калифорнияда истиқомат қилади ва улар иккинчи фарзандини кутмоқда.
