Бувайдадаги абгор синф суратлари тарқалди: ўқувчилар зудлик билан кўчирилиб, хона таъмирланмоқда

Мурожаатчининг таъкидлашича, мазкур таълим муассасасида таҳсил олаётган ўқувчилар ачинарли ҳолатдаги синф хоналарида дарс ўтишаётгани, хонанинг пол қисми таъмирталаблигидан чангиб кетишини билдиришган. Мурожаатда директор камчиликларни била туриб, буни жамоатчиликдан яшириб келгани, туман халқ таълими мудири ҳам ҳолатдан бохабар бўлгани қайд этиб ўтилган.

Kun.uz мухбири таълим муассасасидаги асл ҳолатни кўриш ва муаммони ўрганиш учун 2-ИДУМда бўлди.

Таълим даргоҳи ҳовлисида бизни 2-ИДУМ директори Отабек Камолов қарши олди. У билан бирга мурожаатда тасвирланган хоналарга кирдик.

Ажабланарлиси, айни вақтда суратда акс эттирилган ҳолатдан асар ҳам йўқ. Кечагина ўқувчилар дарс ўтаётган хона бўм-бўш эди. Катта эҳтимол билан ижтимоий тармоқларда таълим даргоҳининг сурати тарқалганидан кейин раҳбарият хонани тезкорлик билан тозалаб, ўқувчиларни бошқа бир хонага кўчириб қўйган. Хонада эса таъмирлаш ишлари бошланган. Суриштирувлар давомида худди шундай бўлиб чиқди ҳам...

«Таъмирлаш ишлари ниҳоясига етгач, ўқувчилар яна эски жойига кўчирилади»

«Бувайда тумани ҳокимининг 2019 йил 26 июл кунги 6128-қарорига асосан эски биномиздан бу ерга кўчиб келганмиз. Аввал Агросаноат коллежи биноси бўлган бу бино. Коллеж фаолияти 2020 йил август ойидан тўхтатилди. Шу кунгача Агросаноат коллежи балансида турган биноларга биз эгалик қила олмаганмиз. Кадастр бўлими томонидан бино мактаб балансига ўтказилди. Яқин кунгача бинода туман халқ таълими бўлими ходимлари фаолият юритар эди.

Аввалги биномиз «Янгиқўрғон» МФЙга қарашли Дўстлик кўчасида жойлашган эди.

Ижтимоий тармоқларда тарқалган ҳолатнинг маълум бир қисми ҳақиқатга яқин. Хонанинг пол қисми абгор ҳолатда эди, туман ХТБ эксплуатация бўлими январ ойида хонани бизга бўшатиб берганди. Ўқувчилар кўплиги сабаб синф хонасининг пол қисми шу ҳолатда бўлганини тан оламиз. Бугуннинг ўзида камчиликлар бартараф қилиняпти. Ҳозирданоқ бинони таъмирлаш ишлари йўлга қўйилди.

Бинони таъмирлаш ишлари ёз фаслига қилиниши белгиланган. 100 млн сўм ХТБ томонидан таъмирлаш ишларига маблағ ажратилган. Узоғи бир ҳафта ичида хоналарнинг пол қисми тўлиқ таъмирланади.

Абгор ҳолатда дарс ўтаётганлар 6-«d» синфи ўқувчилари бўлиб, ҳозир улар 3-қаватда бўш турган хонада таҳсил олишяпти. Таъмирлаш ишлари ниҳоясига етгач, ўқувчилар яна эски жойига кўчирилади».

Директор билан суҳбатлашиб бўлгач, суратда тасвирланган синф хонасида шу кунгача ўқиб келган 6-«d» синф ўқувчилари учрашдик.

«Ота-оналар ҳомийлигида 2-3 марта ремонт қилганмиз»

«Аввалги синфимизга ўқувчилар сиғмагани учун 3-чоракда январнинг 12 саналаридан 1-қаватдаги хонага кўчган эдик. Синф хонасининг пол қисми йиртилган, таъмирталаб эди. Биз ота-оналар ҳомийлигида 2-3 марта ремонт қилганмиз. Лекин шунга қарамай, линолеум йиртилиб кетаверди. Ўтган ҳафтада блогерлар келиб расмга олиб кетишибди. Мен у пайтда тўгаракда эдим. Бугун эрталаб 3-қаватда жойлашган синф хонасига кўчиб чиқдик. Таъмири тугагач, яна ўз жойимизга қайтиб тушамиз».

«Блогерлар келган куни биз ўқувчилар хонани тозалаётган эдик. Улар келиб, хонани тасвирга олиб, бу синфда қачондан буён ўқишимизни сўрашди. Синф хонани суратга олган блогер ўқувчилар номидан ҳам айтилмаган гапларни ёзиб юборишибди. Синф хонанинг пол қисмини ота-оналар ҳомийлигида таъмирлаган эдик. Лекин кўп ўтмай линолеум йиртилиб кетди. Ҳозир ўқиётган хонамизга бугун эрталаб кўчиришди».

«Хонани таъмирлаб беришларини сўраб бир неча марта раҳбарларга айтган эдим»

«Мактабимизда 2та корпус бор. Асли ўқувчилар бошқа бир корпусда ўқишади. Бу хонада аввал МТБ бўлинмаларидан бири фаолият юритишарди. Туман ХТБ янги бинога кўчиб ўтгандан кейин синфимиз билан шу хонага кўчган эдик. Блогер келиб суратга олиб кетган куни, ўтган пайшанбада дарсим йўқлиги учун мактабга тушдан кейин келган эдим. Ўқувчиларим синф хона ҳолатини суратга олиб кетишганини айтишди. Шундан кейин директоримизга хонамизни суратга олиб кетишгани ҳақида айтдим. У бундан хабарим борлигини айтди.

Хонанинг ҳолати яхши эмасди. Бу ҳақда бир неча марта раҳбарларга ҳам айтган эдим. Мана шу йил ёзда ремонтдан чиқади, дейишган эди».

ХТБ мудири Адҳам Умаров ҳолат бўйича нима дейди?

«Авваллари ХТБ биноси бўлмагани сабаб бинонинг 1-қаватида вақтинча ишлаб турганмиз. 10 апрел куни янги бинога кўчиб чиқдик. Ижтимоий тармоқларда сурати тарқаган синф хонасида эксплуатация бўлимимиз ходимлари ўтирар эди.

Аслида бўлим янги бинога кўчиб ўтгандан кейин синф хонасини таъмирлаб ундан кейин ўқувчилар хонага кириши керак эди. Лекин бизнинг рухсатимизсиз синф хонасига парталар олиб кирилган.

2021 йилда бино таъмирланиши назарда тутилган».

Мудир билан суҳбатдан сўнг Бувайда туман ХТБнинг бир неча кун аввал қуриб фойдаланишга топширилган янги биносига кирдик. Бино 2-ИДУМнинг шундоқ ёнида жойлашган экан. Соҳа мутахассислари замонавий ва шинам бино хоналарида фаолият юритиши, албатта, қувонарли ҳолат. Икки бино ёнма-ён жойлашган. 2-ИДУМ синф хоналари абгор ҳолатда, туман ХТБ ходимларининг мукаммал таъмирдан чиққан бинода ўтириши бизга эриш туюлди. Шу адолатданми?

Ўқувчиларнинг чанг ютиб, таъмирталаб хонада таҳсил олаётгани бир бинода бўла туриб, наҳотки, туман ХТБ мудири эътиборидан четда қолди.

Синф хоналарининг ҳолати акс этган суратлар ижтимоий тармоққа чиқарилмаганида ўқувчилар шу хонада яна қанча таҳсил олишар эди? Бу томони бизга қоронғи. Энг ачинарлиси — асл ҳолати ҳақида жамоатчилик хабар топгачгина ўқувчилар бошқа синфга кўчирилиб, хонада таъмирлаш ишлари бошланяпти.

Биз қачонгача ўзимизни алдаймиз? Нега синф раҳбарининг хоналарни таъмирлаш беришларини сўраб айтган илтимослари раҳбарият томонидан инобатга олинмади? Бугунги кун ёшлари шундай хоналарда таҳсил олишга лойиқми? Саволлар бисёр...

Сарвар Зияев, Файзулло Султонов
Kun.uz мухбирлари