Чехия ички ишлар вазири Врбетицедаги портлашни «ёпди-ёпди қилмоқчи» бўлганликда гумонланмоқда

Чехиянинг уюшган жиноятчиликка қарши курашиш миллий маркази мамлакат ички ишлар вазири Ян Гамачекнинг Москвага амалга ошмаган сафари юзасидан жиноий иш қўзғатди. Гамачек Врбетицеда жойлашган ўқ-дори омборларидаги портлашларни «ёпди-ёпди қилиш» эвазига Россиядан 1 млн «Спутник V» вакцинасини олишга уринишда гумон қилинмоқда. 

Марказ вакили Ярослав Ибегейнинг маълум қилишича, марказ иккита жиноят – махфий ахборотни ошкор қилиш ва хизмат мавқейини суиистеъмол қилишга гумон билан Гамачекнинг Москвага режалаштирган сафари тафсилотларини тергов қилишни бошлаган. Унинг таъкидлашича, ишнинг боришини Прага бош прокуратураси ўз назоратига олган.

Аввалроқ Пардубице ўлкаси губернатори Мартин Нетолицкий маҳаллий ОАВга Гамачек Россияга «Спутник V» вакцинаси эвазига Врбетицедаги портлашлар ишини «ёпди-ёпди қилиш»ни таклиф қилиш учун Москвага сафар амалга оширишни режалаштирганини маълум қилган. Шундан кейин Гамачек Нетолицкийни ўз лавозимидан бўшатиб юборган.

Гамачек ўзига қўйилаётган айбловларни қатъиян рад этмоқда. Аввалроқ Seznam Zprávy нашрида Гамачек 19 апрелда Россияга ташриф буюришни ва портлашлар билан боғлиқ можарони «ёпди-ёпди қилиш» бўйича Москва билан келишишни режалаштиргани маълум қилинган. Гамачек ушбу айбловлар юзасидан нашрни судга берган ва ундан 10 млн крона товон пули ундирмоқчи.

Апрел ойида Чехия Врбетицедаги портлашларга алоқадорликда гумон қилиб 18 россиялик дипломатни ўз ҳудудидан чиқариб юборганди. Чехиянинг таъкидлашича, дипломатлар аслида Россия разведкаси ходимлари бўлган. Москва ушбу айбловларни рад этиб, ўз дипломатларининг чиқариб юборилишига жавобан 20 нафар чехиялик дипломатни «персона нон грата» деб эълон қилганди.

14 май куни Россия «нодўст давлатлар» рўйхатини тасдиқлаб, унга Чехия ва АҚШни киритган. Чехия ташқи ишлар вазирлигида Москванинг ушбу қарори нафақат Прага, балки Европа Иттифоқи ва унинг иттифоқдошлари билан «муносабатларни янада кескинлаштириш учун яна бир қадам» сифатида қабул қилиниши айтилган.