Қўшимча функционаллар
-
Тунги кўриниш
Coca-Cola Uzbekistan’даги давлат улушини сотишнинг учинчи босқичи якунланди
Давлат активларини бошқариш агентлиги томонидан 2020 йил 16 декабрдаги “Coca-cola Ichimligi Uzbekiston, Ltd” МЧЖ устав капиталидаги давлат улушини сотиш тўғрисидаги эълонга мувофиқ, сотиш жараёнининг учинчи босқичи якунланди.
Фото: Ccbu.uz
Агентлик хабарига кўра, жорий йил 12 апрелдан 24 майгача бўлган муддатда талабгорларга компанияга ташриф буюриш, жойига чиққан ҳолда ўрганишлар ўтказиш, компания раҳбариятига қўшимча саволлар бериш ва улар билан суҳбат ўтказиш имконияти берилди.
Шунингдек, талабгорлардан (ва уларнинг ваколатли маслаҳатчиларидан) келиб тушган тушган саволларга жавоблар берилиб, менежмент тақдимоти сессиялари ва онлайн мулоқотлар ўтказилди ҳамда талабгорларга давлат улушини олди-сотди шартномаси лойиҳаси тақдим этилди.
“Бугунги кунда талабгорлардан компанияни сотиб олиш бўйича қатъий нарх таклифлари ва олди-сотди шартномаси лойиҳасига қўшимча таклиф ҳамда изоҳлари олинди.
Мазкур таклифлар “Rothschild & Cie” инвестиция банки ва “Dentons” юридик фирмаси билан биргаликда ўрганиб чиқилиб, Давлат тендер комиссияси томонидан сотиш жараёнининг якуний босқичини ташкил этиш бўйича қарор қабул қилинди.
Мазкур босқичда давлат улушини сотиш нархини аниқлаштириш ва олди-сотди шартларини яхшилаш мақсадида талабгорлар билан қўшимча музокаралар ўтказилади. Натижаси бўйича савдо ғолиби компания иккинчи мулкдори билан келишилган ҳолда Давлат тендер комиссияси қарорига мувофиқ эълон қилинади”, дейилади “Давактив” хабарида.
Аввалроқ, агентлик раҳбари Акмалхон Ортиқов Давлат активларини бошқариш агентлиги Coca-Cola Ichimligi Uzbekistan'да давлат улушини амалга оширишнинг якуний босқичига яқинлашаётгани ҳақида айтиб ўтганди.
Эслатиб ўтамиз, 2020 йилда Давлат активларини бошқариш агентлиги Coca-Cola Uzbekistan устав капиталида 57,1 фоиз сотилиши тўғрисида эълон қилди, қолган 42,9 фоиз эса The Coca-Cola Export Corporation (АҚШ)га тегишли. Давлатнинг ўз улушини сотиш режалари 2018 йилда маълум бўлди.
Coca-Cola Ichimligi Uzbekiston Ltd 1993 йилдан бери ишлаб келмоқда. Бугунги кунда қўшма корхона Тошкент, Наманган ва Урганчда жойлашган учта заводга эгалик қилади ҳамда Ўзбекистонда газланган ичимликлар ишлаб чиқарувчи энг йирик компания ҳисобланади. 2019 йилда компаниянинг бозордаги улуши қарийб 47 фоиз бўлган.
