Термиз шаҳрида трансформатор ёниб кетди

Термиз шаҳридаги трансформаторларнинг бирида ёнғин содир бўлган. Бу ҳақда Фавқулодда вазиятлар вазирлиги хабар бермоқда.

Маълум қилинишича, бугун, 28 июнь куни соат 12:03да Термиз шаҳар «Тупроққўрғон» МФЙ, Денов кўчасида жойлашган электр подстанция ҳудудидаги трансформаторларнинг бирида ёнғин содир бўлган.

Олинган хабар бўйича соат 12:08да воқеа жойига Термиз шаҳар Фавқулодда вазиятлар бўлимининг 2та ёнғин-қутқарув бўлинмаси етиб борган. Ёнғин соат 12:10да ўраб олиниб, 12:18да тўлиқ ўчирилган.

Қайд этилишича, мазкур ҳодисада ҳеч ким жабрланмаган ва ҳалок бўлмаган. Ҳозирда ёнғин сабаблари ва у келтирилган зарар миқдори аниқланмоқда.