Адлия вазирлиги Kun.uz ва бошқа интернет-нашрлар билан меморандумлар имзолади

27 июл куни Ўзбекистон Республикаси Адлия вазирлиги ва Kun.uz веб-сайти таҳририяти ўртасида ҳуқуқий ахборотни тарқатиш ва ундан фойдаланиш соҳасида ҳамкорлик меморандуми имзоланди.

Шунингдек, вазирлик яна 4та интернет нашри (Daryo.uz, Газета.uz, Human.uz ва Bugun.uz) билан ҳам шундай мазмунда меморандумлар имзолади.

Меморандум фуқароларнинг ҳуқуқий онги ва ҳуқуқий маданиятини юксалтириш, норматив-ҳуқуқий ҳужжатларнинг мазмун моҳиятини тушунтиришга қаратилган кўрсатувлар ва таҳлилий мақолалар тайёрлаш, мутахассис шарҳини бериб боришни назарда тутади.

Шунингдек, келишувга асосан, Адлия вазирлиги журналистик суриштирувларда амалий ёрдам кўрсатиши, ҳуқуқий мавзуларни ёритувчи журналистлар учун ҳуқуқий билимларини оширишга қаратилган семинарлар ташкил этиши зарур.

“Адлия вазирлиги давлат ҳуқуқий сиёсатини амалга оширишда бош орган ҳисобланиши негизида жамиятнинг ҳуқуқий ахборотга бўлган эҳтиёжини ҳам қондириш учун масъулдир. Бу борадаги ишларни самарали ташкил этишда энг катта ёрдамчи, кўмакдош оммавий ахборот воситалари ҳисобланади.

Адлия вазирлиги эркин оммавий ахборот воситаларини қўллаб-қувватлаган ҳолда ушбу соҳа вакиллари билан янада яқиндан ҳамкорлик ўрнатди”, – дейилади вазирлик хабарида.

Меморандумни имзолаш жараёнида қатнашган адлия вазири ўринбосари Музроф Икромовнинг таъкидлашича, ҳамкор сифатида танланган оммавий ахборот воситалари Ўзбекистонда энг кўп аудиторияга эга ҳамда фойдаланувчилар ҳурматини қозонган.

Икромов ўзи ҳам ҳар куни янгиликларни шу сайтлардан кузатиб боришини айтди.