Жароҳат сабабли майдонга туша олмаётган 7 юлдуз. Улар қачон сафга қайтишади?

Европада кучли бешлик чемпионатлари старт олган бўлса-да, бир қатор клубларнинг етакчилари жароҳат сабабли ҳали ҳамон майдонга қайта олишмаяпти. Tribuna.uz қуйида топ-клубларнинг жароҳат олган юлдуз футболчилари қачон сафга қайтиши мумкинлиги ҳақида маълумот беради.

Златан Ибраҳимович

Жароҳат: ўнг оёқ товони шикастланиши

Сафга қайтиш муддати: сентябрь

«Милан» клуби ҳужумчиси Златан Ибраҳимович А Серия янги мавсуми дастлабки турларида жамоасига ёрдам бера олмайди. 39 ёшли швециялик ҳужумчи ҳалигача «Милан»нинг жамоавий машғулотларига қўшилмаган ва якка тартибда тайёргарлик кўрмоқда.

Gazetta della Sport’нинг ёзишича, мураббийлар швециялик голеадорнинг эртароқ сафга қайтишига умид қилишган, аммо 39 ёшли форвард ҳалигача тўлиқ тикланиб улгурмаган.

Шу тариқа, Ибраҳимович А Серия 1-тури доирасидаги «Сампдория» ва 2-турдаги «Кальяри»га қарши баҳсни ўтказиб юбориши деярли аниқ.

Златан А Серия якунланган мавсумининг 9 май куни ўтган «Ювентус»га қарши баҳсда жароҳат олиб, июнь ойида Евро-2020га бора олмай, жарроҳлик столига ётган эди.

Тони Кроос

Жароҳат: қорин ости қисми

Сафга қайтиш муддати: номаълум

«Реал» яримҳимоячиси Тони Кроос 3 август куни жароҳат олиб сафдан чиқди. Клуб расмий сайти хабарига кўра, футболчи қорин ости қисмида оғриқ сезмоқда. Клуб шифокорлари футболчининг қачон сафга қайтишини маълум қилмаган.

Германиялик яримҳимоячи Ла Лига 1-тури доирасидаги «Алавес»га қарши ўйинни (4:1) ҳам ўтказиб юборди. 31 ёшли немис футболчиси Евро-2020дан кейин миллий жамоадаги фаолиятини якунлаганини эълон қилганди.

Серхио Агуэро

Жароҳат: оёқ мушаклари шикастланиши

Сафга қайтиш муддати: октябрь

«Манчестер Сити»дан эркин агент сифатида «Барселона»га ўтган Серхио Агуэронинг жароҳати кутилганидан ҳам жиддийроқ бўлиб чиқди. Diario Sport хабарига кўра, 33 ёшли аргентиналик ҳужумчи оёқ мушакларидаги шикастланиш сабабли 10 ҳафтагача майдонга туша олмайди. Футболчининг янги клубидаги дебюти октябрь ойига қадар чўзилиши тахмин қилинган.

Шу тариқа, аргентиналик форвард «Реал Сосьедад» билан ўтган ўйин билан бирга «Атлетик» (22 август), «Хетафе» (29 август), «Севилья» (12 сентябрь), «Гранада» (19 сентябрь), «Кадис» (22 сентябрь) ва «Леванте» (26 сентябрь) билан баҳсларни ўтказиб юбориши кутилмоқда. Агуэро клубдаги дебютини 3 октябрь куни собиқ клуби «Атлетико» билан баҳсда нишонлаши мумкин.

Маркус Рэшфорд

Жароҳат: елка жарроҳлик амалиёти

Сафга қайтиш муддати: октябрь

«Манчестер Юнайтед» ҳужумчиси Маркус Рэшфорд август ойи бошида елкасидан жарроҳлик амалиётини ўтказди. The Telegraph хабарига кўра, англиялик форвард энди 12 ҳафтагача майдонга туша олмайди. Евро-2020дан кейин ёзги таътилни ўтказган Маркус ноябрь ойидан буён қийнаб келаётган жароҳатини даволашга қарор қилган.

Рэшфорд 2020 йилнинг 1 ноябрь кунида «Арсенал» билан баҳсда елкасидан жароҳат олиб, шу кунгача оғриқ қолдирувчи укол билан ўйнаб келаётганди.

Шу тариқа, Рэшфорд 3 ой давомида АПЛ доирасидаги 9 ўйинда, шу жумладан «Лестер» ва «Ливерпуль» билан баҳсни, шунингдек ЕЧЛ доирасидаги 3та ўйинни ўтказиб юбориши кутилмоқда.

Фил Фоден

Жароҳат: тизза бўғимлари шикастланиши

Сафга қайтиш муддати: сентябрь

«Манчестер Сити» ва Англия миллий жамоаси яримҳимоячиси Фил Фоден август ойи бошида жароҳат сабабли бир ойга сафдан чиқди. 21 ёшли яримҳимоячи миллий жамоадаги машғулотларда олган эски жароҳатини қўзғатган. Натижада Фоден «Манчестер Сити»нинг мавсум олди машғулотларини тарк этиб, камида бир ой давомида тикланиш жараёнини ўтказади. Фил АПЛ 1-тури доирасидаги «Тоттенҳэм» билан баҳсда ҳам жамоасига ёрдам бера олмади. Шу тариқа, у «Норвич» (21 август) ва «Арсенал» (28 август) билан баҳсларда «Манчестер Сити»га ёрдам бера олмайди.

Шунингдек, у Англия миллий жамоасининг ЖЧ-2022 саралаш босқичи доирасидаги Венгрия (2 сентябрь), Андорра (5 сентябрь) ва Польша (8 сентябрь) билан ўйинларини ўтказиб юборади.

Эндрю Робертсон

Жароҳат: ўнг оёқ товони шикастланиши

Сафга қайтиш муддати: сентябрь

«Ливерпуль» ҳимоячиси Эндрю Робертсон мавсум олдидан «Атлетик»га қарши кечган ўртоқлик ўйинида жароҳат олиб сафдан чиққанди. Шотландиялик футболчи танаффусга яқин ўнг оёқ товонини қайириб олганди.

«Бу жуда оғриқли бўлгани кўриниб турганди. Робертсон қачон қайтишини аниқ билмайман. Умид қиламанки, у сентябрь ойидан бизга ёрдам бера олади», - дея бош мураббий Юрген Клоппнинг сўзларини келтирган Goal.com.

АПЛ 1-тури доирасида «Норвич» билан ўйинни ўтказиб юборган шотландиялик чап қанот ҳимоячиси «Бернли» (21 август), «Челси» (28 август) ва Шотландия миллий жамоасининг ЖЧ-2022 саралаш босқичидаги ўйинларини ҳам ўтказиб юборади.

Серхио Рамос

Жароҳат: чап оёқ суяги шикастланиши

Сафга қайтиш муддати: сентябрь

Мадриднинг «Реал» клубидан эркин агент сифатида «ПСЖ» сафига келиб қўшилган Серхио Рамос парижликлар сафида ҳалигача дебютини ўтказгани йўқ. 35 ёшли ҳимоячи жароҳати сабабли майдонга туша олмаяпти. Рамосни ўтган мавсумдаги жароҳати – чап оёқ суягидаги шикастланиш ҳалигача безовта қилмоқда. Ҳозирда якка тартибда тикланиш жараёнини ўтказаётган испаниялик ҳимоячи сентябрь ойи ўрталарида Франция чемпионатидаги дебютини ўтказиши кутилмоқда.