Родриго Дутерте кутилмаганда сиёсатдан кетмоқда. Сайловларда унинг қизи ва боксчи Мэнни Пакьяо қатнашади

Экспертлар Дутерте бутунлай сиёсат билан хайрлашаётганига ишонқирамаяпти ва бу кетиш сабабини май ойидаги сайловларда унинг қизи президентликка номзод сифатида қатнашишида кўришмоқда.

Конституцияга биноан Дутерте иккинчи муддатга сайлана олмайди ва шу туфайли у вице-президент бўлиши кутилганди. Аммо шанба куни Манилада бўлиб ўтган, ўз номзодини илгари суриши кутилган тадбирда у барчани ҳайратлантирган ҳолда вице-президентликка номзодини қўйиши «конституцияга тўғри келмаслиги»ни айтди.

«Аксарият филиппинликлар мени номуносиб номзод ва конституция бузилиши мумкин деб ҳисобламоқда. Бир неча йил аввал мени президент этиб сайлаган одамлар хоҳишига бўйсунган ҳолда сиёсатдан кетишимни эълон қиламан», деди Дутерте.

Дутерте ўзининг ноодатий чиқишлари билан тилга тушган, шунингдек наркотик савдосига қарши муросасиз уруш очган, натижада Филиппинда минглаб кишилар судсиз, сўроқсиз кўчаларда отиб ташланган. Унинг ўзи бир неча бор наркофурушлар ва гиёҳвандларни жисмонан йўқ қилишга чақирган ҳамда ўз қўллари билан уч нафар наркофурушни ўлдирганини айтган.

Президентнинг қизи

Дутертенинг сиёсатдан кетиши унинг қизи Сара Дутерте-Карпио мамлакат президентлиги учун номзодини қўйиши ҳақидаги хабарлар фонида янгради.

Айни вақтда 42 ёшда бўлган Дутерте-Карпио Филиппин жанубидаги Давао шаҳри мэри ҳисобланади.

У жорий йилда Филиппинда ўтказилган барча жамоатчилик сўровларида етакчилик қилган, аммо шу вақтгача сайловларда иштирок этиши ҳақида гапирмаганди.

Хусусан, ўтган ойда у президентлик пойгасида иштирок этмаслигини айтган, отаси билан кейинги сайловларда (вице-президентлик учун) улардан бири иштирок этиши борасида келишиб олишганини маълум қилганди.

Лекин энди Дутертенинг ўзи қизи 2022 йил май ойида ўтказиладиган сайловларда президентликка номзодини илгари суришини маълум қилди.

Филиппинда президент ва вице-президент лавозимларига номзодлар биргаликда кураш олиб боради. Эндиликда Сара Дутерте-Карпио билан бирга вице-президент лавозимига Дутертенинг кўп йиллик ёрдамчиси, сенатор Кристофер Бонг Го кураш олиб боради. ABS-CBN телеканалининг хабар беришича, амалдаги президент мухбирнинг «Демак, бу Сара ва Го бўладими?» деган саволига «Сара ва Го» деб жавоб берган.

Филиппин президентлиги учун биринчи бўлиб 42 ёшли таниқли боксчи, 8та вазн тоифасида собиқ жаҳон чемпиони Мэнни Пакьяо ўз номзодини кўрсатган.

Дутерте президентлик лавозимини 2016 йилда эгаллаган, ўша йилги сайловда у катта фарқ билан устунлик қилганди.

Филиппинликлар етакчиси бир неча марта ўзи жиноятчи деб ҳисоблайдиган мухолифларини қатағон билан қўрқитган, Дутерте томонидан гиёҳвандлик савдосига қарши эълон қилинган бемисл кампания Филиппинда минглаб кишилар судсиз қатл этилишига олиб келганди.

2020 йил апрель ойида пандемия шароитида Дутерте полициянинг коронавирус чекловларига қарши бош кўтарган намойишчиларга қарата ўқ узишига рухсат берилиши ҳақида гапирган. 2021 йил май ойида у жамоат жойларида тиббий ниқобсиз юрган ёки уни нотўғри тақиб олган фуқароларни ҳибсга олиш кераклигини айтганди.

Amnesty International маълумотларига кўра, Дутерте президентлигининг дастлабки олти ойида полициячилар ёки номаълум қуролли шахслар томонидан етти мингдан ортиқ киши отиб ташланган.

Жорий йилнинг июнида Халқаро жиноий суд прокурори суддан 2016-2019 йилларда Филиппинда содир этилган жиноятлар бўйича текширув ўтказишни сўради - бу даврда Филиппинда наркотикларга қарши уруш номини олган кампания олиб борилганди.

Прокурорнинг фикрича, бу даврда инсониятга қарши жиноятлар содир этилган бўлиши мумкин. Сентябрь ойида Халқаро жиноий суд текширувлар ўтказиш учун санкция берди.

Дутерте вице-президентлик лавозимида Халқаро жиноий суд томонидан таъқиб этилмаслигини айтганди, аммо энди унда юридик иммунитет бўлиш-бўлмаслиги номаълум.