МСК сайлов жараёнларида жамоат хавфсизлигини таъминловчи органларнинг мажбуриятларини белгилади

Kun.uz мухбирининг хабар беришича, брифинг давомида Марказий сайлов комиссияси раиси ўринбосари Баҳром Қўчқоров сайлов жараёнларида жамоат хавфсизлигини таъминловчи органлар, уларнинг вазифа ва мажбуриятлари ҳақида маълумот берди.

«Бўлажак сайловнинг ҳар томонлама пухта тайёргарлик асосида ўтказилишида жамоат тартиби ва жамоат хавфсизлигини таъминлаш муҳим.

Сайлов кодексининг 49-моддасига асосан Жамоат тартибини сақлаш, сайлов ўтказиладиган бинолар ва жойларни қўриқлаш, шунингдек сайлов натижаларига доир ҳужжатларни ташиш чоғида участка сайлов комиссиялари аъзоларини кузатиб бориш тегишли ваколатли органларнинг зиммасига юклатилиши белгиланган.

Шуни алоҳида айтиш лозимки, 2019 йилда ўтказилган парламент ва маҳаллий Кенгашлар сайловларида сайлов комиссиялари билан Ички ишлар вазирлиги, Миллий гвардия ҳамда Фавқулодда вазиятлар вазирлиги тизимлари ҳамкорлиги яхши самара берган.

Айниқса сайлов бюллетенларини етказиб бериш ва сақлаш, овоз бериш жараёнида жамоат тартибини сақлаш ҳамда овоз бериш якунларини тегишли сайлов комиссияларига етказиш билан боғлиқ масалалар тизим ходимлари томонидан юқори савияда бажарилган.

Шундан келиб чиққан ҳолда президентлик сайловини ўтказишда жамоат тартибини сақлаш ва жамоат хавфсизлигини таъминлаш мақсадида Марказий сайлов комиссияси қарори қабул қилинди», деди у.

Сайлов кодексининг 49-моддаси талабларидан келиб чиққан қарорда қуйидагилар акс этган:

• Президентлик сайловини ўтказишда жамоат тартибини сақлаш ва жамоат хавфсизлигини таъминлаш Ўзбекистон Республикаси Ички ишлар вазирлиги, Миллий гвардияси томонидан;
• сайлов округлари ва участкалари ҳудудларини фавқулодда вазиятлардан муҳофаза қилиш ҳамда ёнғин хавфсизлигини таъминлаш бўйича тадбирлар Фавқулодда вазиятлар вазирлиги томонидан амалга оширилиши белгиланди.

Улар қарорга мувофиқ сайловни ўтказишда жамоат тартибини сақлаш ва жамоат хавфсизлигини таъминлашда сайлов округлари ва участкалари ҳудудларида, комиссия жойлашган биноларда, шу жумладан, овоз бериш биноларида жамоат тартибини сақлаш ва жамоат хавфсизлигини таъминлашга масъул ходимларини  бириктиради.

Шунингдек, масъул ходимларига уларнинг жамоат хавфсизлигини таъминлашдаги вазифалари, ҳуқуқ ва мажбуриятлари бўйича тушунтиришлар берилишини ва ўқув машғулотлари ўтказилишини ташкил этади.

Йиғилиш қарори билан жамоат хавфсизлигини таъминлашга масъул ходимларга сайлов бюллетенлари олинган кундан эътиборан бюллетенлар ҳамда бошқа ҳужжатлар сақланадиган бинонинг қўриқланишини таъминлаш талаби қўйилади.

«Бинолар ва жойларнинг қўриқлови Миллий гвардия ва ички ишлар органларининг ҳудудий раҳбарлари томонидан тасдиқланган навбатчилик жадвали асосида комиссияларнинг кундалик иш фаолияти тугаган вақтдан эътиборан кейинги кундаги иш фаолияти бошлангунига қадар амалга оширилади», – деди у.

Шунингдек,

• округ ва участка сайлов комиссиялари аъзолари кузатуви остида сайлов натижаларига доир ҳужжатларни транспорт воситасида ташиш жараёнида хавфсизликни таъминлайди;
• сайлов куни хизмат фаолиятини овоз бериш биносига кирмаган ҳолда олиб боради;
• сайловчиларнинг яширин овоз бериш ҳуқуқи, ўз хоҳиш-иродасини билдириш тенглиги ва эркинлигини, шунингдек сайлов жараёни иштирокчиларининг қонуний манфаатлари, ҳуқуқлари ва эркинликларини бузмаган ҳолда жамоат тартибини сақлаш ва жамоат хавфсизлигини таъминлаш чораларини кўради.

Баҳром Қўчқоров жамоат хавфсизлигини таъминлашга масъул ходимга тақиқланган хатти-ҳаракатлар ҳақида ҳам эслатиш берди. Унга кўра,

• сайловчилар, кузатувчилар ва сайлов жараёнининг бошқа иштирокчиларига таъсир ўтказиш;
• сайловчи сайлов бюллетенига ўз белгисини қўяётган пайтда яширин овоз бериш кабинасида ёки хонасига кириш;
• бирор-бир ташвиқот материалини ёки адабиётини тарқатиш;
• сайловчилардан улар қандай овоз берганини суриштириш ёки сайловчиларга сайлов бюллетенига белги қўйишда бирор-бир тарзда ёрдам кўрсатиш;
• сайлов комиссиясининг фаолиятига, шу жумладан сайлов қутиларини муҳрлашга, уларни очишга, овозларни санаб чиқишга аралашиш;

ва сайлов комиссиясининг мажлисларида иштирок этиш жамоат хавфсизлигини таъминлашга масъул ходимларга тақиқланади.

Шунингдек, амалдаги қонун ҳужжатларига мувофиқ, сайловчининг яширин овоз бериш ҳуқуқи, ўз хоҳиш-иродасини билдириш тенглиги ва эркинлигини бузиш, сайлов жараёни иштирокчиларининг қонуний манфаатлари, ҳуқуқлари ва эркинликларига ғайриқонуний равишда путур етказиш маъмурий ёхуд жиноий жавобгарликка сабаб бўлиши мумкин.

Илёс Сафаров тайёрлади.
Тасвирчи ва монтаж устаси – Муҳиддин Қурбонов.