Ўзбекистонга COVAX дастури доирасида Pfizer-BioNTech вакцинасидан 800 минг доза ва Sinovac вакцинасидан 1,7 млн доза келтирилади

Мамлакатимизга жорий йилнинг октябрь ойида COVAX дастури доирасида Pfizer-BioNTech вакцинасидан 800 минг доза ва Sinovac вакцинасидан 1,7 млн доза олиб келиш кўзда тутилган. Бу билан юртимизга олиб келинган вакциналар сони йил охиригача 47 миллион дозадан ошади, деб хабар бермоқда ССВ ахборот хизмати.

“Санитария-эпидемиологик осойишталик ва жамоат саломатлиги хизмати маълумотига кўра, мамлакатимизнинг ўзида 15,5 миллион доза ZF-UZ-VAC2001 ҳамда 633 минг дозадан ортиқ икки компонентли “Sputnik V” вакциналари ишлаб чиқарилиши режалаштирилган.

Умумий ҳисобда 18,9 миллион дозадан ортиқ вакцина келгусида эмлаш жараёнларида қўллаш учун Санитария-эпидемиологик осойишталик ва жамоат саломатлиги хизматига етказилади”, дейилади хабарда.

Ўзбекистонда аҳолини коронавирусга қарши эмлаш ишлари йўлга қўйилгандан буён 28 687 988 доза вакцина келтирилган бўлиб, йил охиригача бу кўрсаткич 47 миллион дозадан ошиши режалаштирилган. Ушбу миқдор билан Ўзбекистон аҳолисининг 17,4 миллион нафарини тўлиқ эмлаш мумкин бўлади. 

Эслатиб ўтамиз, 28 сентябрдан бошлаб мамлакатимизда 12 ёшдан катта болаларни ҳам коронавирусга қарши Pfizer вакцинаси билан ихтиёрий равишда эмлашга рухсат берилди. 6 октябрь ҳолатига кўра, Ўзбекистонда 87 мингдан ортиқ болалар ушбу вакцина билан эмлангани маълум қилинди.