Ўзбекистонда “Давлат сирлари тўғрисида”ги ҳамда “Коррупцион жиноят содир этганларнинг реестри тўғрисида”ги қонунлар лойиҳалари ишлаб чиқилди.
Бу ҳақда маълум қилган Коррупцияга қарши курашиш агентлиги директори Акмал Бурҳоновнинг сўзларига кўра, тайёрланган лойиҳалар “яқин кунларда” жамоатчилик муҳокамасига қўйилади.
“Очиқлик презумпцияси амалга ошиши учун биринчи ўринда “Давлат сирлари тўғрисида”ги қонун бўлиши керак. Ўша қонунда қайси нарса давлат сирлари экани кўрсатиб ўтилади, унда йўқ нарсаларнинг барчаси очиқ бўлиши керак.
2021 йил сентябрь ойида масъул идоралар, жумладан агентлик иштирокида “Давлат сирлари тўғрисида”ги қонун лойиҳаси ишлаб чиқилган. Яқин кунларда бу лойиҳа жамоатчилик муҳокамаси учун эълон қилинади”, – деди Бурҳонов 19 октябр кунги давра суҳбатида.
У коррупцион жиноят содир этган мансабдорларнинг очиқ реестрини юритиш фуқароларнинг турли ҳуқуқларига таъсир қилишини инобатга олган ҳолда, бу тартибни қонун сифатида қабул қилиш таклифи билдирилганини таъкидлади.
“Биз “Коррупцион жиноят содир этганларнинг реестри тўғрисида”ги қонун лойиҳасини ишлаб чиқдик. Бу лойиҳа, насиб қилса, келаси ҳафта жамоатчилик муҳокамаси учун эълон қилинади. Мана шу қонун асосида бу реестр юритилади.
Сизни ишонтириб айтаманки, 2022 йил 1 январдан бошлаб [коррупцион жиноят содир этган мансабдорлар рўйхати] эълон қилиб борилади, бу фармонда ҳам кўзда тутилган.
Бу тартибнинг ҳуқуқий механизми ва тизим устида ишлаяпмиз. Яъни очиқ реестрда нималар бўлади: мансабдорни исми-шарифи, қайси коррупцион жиноятни содир этгани каби. Ҳозирча бизда бу бўйича муаммолар йўқ, ҳаммаси режа бўйича кетяпти”, – дея аксилкоррупцион орган раҳбарининг сўзларини келтирмоқда Kun.uz мухбири.
Эслатиб ўтамиз, 2021 йил июлида қабул қилинган очиқликка доир президент фармонида 2021 йил август ойига қадар “Давлат сирларини сақлаш тўғрисида” қонун лойиҳаси ишлаб чиқилиши лозимлиги айтилган.
