Хитойда учар автомобил ишлаб чиқарилади
Хитойнинг XPeng автомобил ишлаб чиқариш компанияси учадиган автомобил прототипини намойиш этди. Улов HT Aero деб номланади. У ташқи кўринишидан Xpeng P7 автомобилини эслатади: машина уч эшик ва икки ўриндиқли бўлиб, электр двигател ва парвоз парраклари билан жиҳозланган.
Автомобилнинг узунлиги 5,5 метрни ташкил этади. Унинг кузови Xpeng P7 моделиникига нисбатан 50 фоизга енгил. Машина ҳавода тезлигини соатига 130 километрга етказа олади, парвоз вақти 30 дақиқага тенг.
Xpeng ушбу автомобилни 2024 йилдан оммавий ишлаб чиқаришни режалаштирган. Унинг нархи бир миллион юан (156 минг 500 доллар) атрофида бўлади.
Google’нинг энг арзон смартфони
Google Ҳиндистоннинг Reliance Jio компанияси билан биргаликда ишлаб чиқарилган Jio Phone Next смартфонини тақдим этди.
Смартфон 2 ГБ тезкор ва 16 ГБ доимий ҳамда 3 ГБ тезкор ва 32 ГБ доимий хотирага эга иккита версияда чиқарилади. Батарея сиғими 2500 мАс.
Jio Phone Next 13 мегапикселли асосий ва 8 мегапикселли олд камерага эга. Basic версиясининг нархи 66 доллар ва Advanced версиясининг нархи 93 долларни ташкил этади.
309 км/соат тезликда ҳаракатлана оладиган электромобил
Ҳиндистоннинг Vazirani Automotive компанияси Ekonk электр гиперкарини тақдим этди. Бир ўринли электромобилнинг қуввати 722 от кучига тенг, оғирлиги 738 кг. Электромобил 2,54 сония ичида тезлигини соатига 100 километрга етказа олади. Унинг максимал тезлиги 309 км/соатни ташкил этади. Авто электр батареяларини совитувчи махсус тизим билан жиҳозланган.
