Антимонополия қўмитасида айни пайтда 21та иш ўрни вакант. Қўмита раиси ўринбосари бу ҳолатни «табиий» деб баҳолади

«Ўтган ҳафта охирида айрим блогерлар ва ОАВ томонидан қўмитамизда ходимлар оммавий равишда ишдан кетаётгани ҳақида хабарлар тарқалди. Лекин бу ҳақиқатдан йироқ, яъни ходимлар лавозимларини оммавий равишда тарк этаётгани мутлақо ҳақиқатга тўғри келмайди. Бу табиий равишда юзага келадиган жараён. Кимдир лавозимини тарк этади, кимдир унинг ўрнига келади.

Қўмитамиз 2019 йилда қайта ташкил этилгандан сўнг ходимларни моддий рағбатлантиришни бирмунча яхшиладик. Икки йил ичида ижтимоий пакет босқичма-босқич рақобатбардош даражага чиқарилди. Керак бўлса, давлат органлари билан ҳам, хусусий сектор билан ҳам бемалол рақобатлаша оладиган ижтимоий пакет шакллантирилди.

Ходимлар ишдан кетаётгани табиий рўй бераётганини қуйидагича тушунтириб ўтаман. Қўмитадан ишдан кетган аксарият раҳбар-ходимлар бошқа давлат органлари, йирик компанияларга тенг ёки каттароқ лавозимларга ишга ўтишди. Бу табиий ҳол. Бу ердан қандайдир негативни излашимиз умуман нотўғри. Қўмита штат режимида фаолият юритяпти. Фаолиятимизга таъсир қилувчи ҳеч қандай омил йўқ бугунги кунда. Кетаётганлар ўз ихтиёри билан кетяпти, қўмитадан норози эмас деб айтсак, вазиятга нисбатан объектив баҳо берган бўламиз», дейди Фаррух Қорабоев Kun.uz мухбири билан суҳбатда.

Қўмита раиси ўринбосари лавозимини тарк этган ходимлардан икки нафари Тошкент шаҳрининг Олмазор ҳамда Тошкент вилоятининг Қуйи Чирчиқ туманларида ҳоким ўринбосари этиб тайинлангани, айримлари Олмалиқ кон металлургия комбинати, Республика товар-хомашё биржаси АЖ, «Ўзбекистон республика валюта биржаси» АЖ ишга кетишгани, яқинда лавозимини тарк этган ходимлар «Uzbekistan Airports» АЖга ишга кирмоқчилигини айтиб ўтди.

Қўмита расмийси даставвал йил бошидан буён 25 нафар ходим ишдан кетгани, бироқ айни даврда 21 нафар янги ходим ишга олинганини таъкидлаган бўлса, интервью давомида айни пайтда 21та лавозим вакант эканини айтиб ўтди. Қўмита мулозимидан сўнгги икки ойда неча киши ишдан бўшагани ҳақида қайта-қайта сўралган бўлса-да, ушбу савол очиқ қолдирилди.

«Йил бошидан ҳисоблайдиган бўлсак, турли лавозимдаги 25 нафар ходимимиз ишдан бўшаган, лекин шу пайтда 21 нафар ходимни ишга олдик. Бу жуда нормал ҳолат, бу жараён давомий бўлади, чунки кимдир келади, кимдир кетади. Бугунги кунда вакант лавозимларга танлов бир нечта босқичлардан иборат ва албатта ходимларни танлаш жараёни бирмунча вақт талаб қилади. Ўртача бунга 1 ойдан 1,5 ойгача вақт талаб қилиняпти.

Ҳозирги кунда бизда бешта раҳбарлик ўрни вакант ҳисобланади. Бундан ташқари, мутахассислар, техник ходимлар, шу жумладан, бугундан бошлаб (интервью 1 ноябрь куни олинган – таҳририят) ахборот хизмати (3та иш ўрни) ҳам вакант ҳисобланади. Айни пайтда жами 21та вакант лавозимлар бор», дейди қўмита раиси ўринбосари.

Фаррух Қорабоев гарчи ходимлар оммавий равишда ишдан кетаётганини рад этаётган, ходимларнинг бошқа ишга ўтаётганини табиий деб айтаётган бўлса-да, 84та штат бирлигидан иборат қўмитада ходимларнинг тўртдан бир қисми йўқ эканини нормал ҳолат дея қабул қилиш қийин. Қолаверса, бир меҳнат жамоасидан ўнлаб ходимлар ёппасига тарк этиши ва бу кенг жамоатчиликка намойиш этилиши қўмитада ички муҳит раис ўринбосари айтгандек барқарор эмаслигига ишора қилмоқда.

Аввалроқ Kun.uz ўз манбаларига таяниб Монополияга қарши курашиш қўмитасидаги ички келишмовчиликлар сабаб кўплаб ходимлар ўз лавозимларини тарк этишгани, ҳозирги пайтда қўмитада 10га яқин раҳбарлик лавозими вакант экани ҳақида ёзганди.