Дубайдаги кўргазмада Ўзбекистоннинг кенг кўламли маданий дастури тақдим этилмоқда

БААнинг Дубай шаҳрида бўлиб ўтаётган “ЭКСПО-2020” бутунжаҳон кўргазмасида Ўзбекистон Республикасининг миллий павильони фаолият кўрсатмоқда. Унда республиканинг сўнгги йиллардаги илм-фан ва иқтисодий ютуқлари, маданий мероси ва туризм салоҳияти, шунингдек, мамлакатни ривожлантириш режаси, инвестициявий имкониятлари халқаро жамоатчиликка намойиш этилмоқда.

Ўзбекистон Маданият ва санъатни ривожлантириш жамғармаси мазкур кўргазмадаги Ўзбекистон павильони маданий дастурининг расмий ҳамкори ҳисобланади.  

Жамғарма 6 ой давом этадиган кўргазмада Ўзбекистон миллий павильони билан ҳамкорликда Ўзбекистоннинг маданий ва сайёҳлик салоҳиятини халқаро майдонда тарғиб этишга қаратилган қатор тадбирларни тақдим этади.

Жумладан, 27 ноябрь куни Dubai Opera ижро санъати марказида “Лазги – қалб ва муҳаббат рақси” балетининг халқаро премьераси бўлиб ўтади.

Унда Хоразм рақси ўзбек халқининг ўзига хос анъаналарини ўз ичига олган мутлақо янгича талқинда намойиш этилади. Ўзбекистоннинг энг машҳур рақси тарихи ва маданий мероси илк бор Dubai Opera ижро санъати марказида халқаро аудитория эътиборига ҳавола қилинади.

Алишер Навоий номидаги Давлат академик катта театри балет труппаси ижросида хореограф Раймонд Ребек саҳналаштирган спектакль премьераси 5 сентябрь куни ЮНEСКО шафелигида Тошкентда бўлиб ўтган ва томошабинлар ҳайратига ҳамда профессионал санъат ҳамжамиятининг юксак баҳосига сазовор бўлган.

2019 йил 12 декабрида ЮНEСКОнинг Номоддий маданий меросни муҳофаза қилиш бўйича ҳукуматлараро қўмитаси “Лазги”ни Инсониятнинг номоддий маданий мероси рўйхатига киритган.

Эслатиб ўтамиз, Бутунжаҳон «ЭКСПО-2020» кўргазмаси 2022 йилнинг 31 мартигача ўтказилади.